Botelia a plastik nga addaan iti BPA, nakiddaw a maiparit

Kiniddaw ti maysa nga agdadamo a diputado ti madagdagus a pannakaiparit dagiti botelia a plastik a pagyanan dagiti makan ken inumen a para ubbing a naaramid manipud iti bisphenol A (BPA), maysa a paset ti plastik, a naduktalan a makadidigra iti tao.

Indatag ni Dip. Angelina Tan (NPC, Quezon) ti House Bill (HB) 2340 a mangibilin ti permanente a pannakaipagel dagiti produkto a plastik nga addaan iti BPA ken ti pannakaipakat ti dusa iti pannakaangkat, pannakapartuat, pannakailako ken pannakaiwaras dagitoy.

Kuna ni Tan, maysa a doktor iti medisina, a ti BPA ti agraraira a kemikal iti agdama ken isu ti kangrunaan a paset ti polycarbonate plastic a masarakan kadagiti container a pagyanan ti taraon ken botelia a para kadagiti ubbing.

Kunana a mabalin a maligsay daytoy BPA babaen ti pudot wenno dadduma pay a kondision ti temperatura ket mabalin a mailaok iti taraon ket agpeggad ti salun-at ti tao.

Kuna pay ni Tan a dagiti umad-adu a parikut iti salun-at kas iti prostate cancer, kanser iti suso, sobra a kinalukmeg, attention deficit and hyperactivity disorder (ADHD), natungday a panagdebelop ti utek ken resistensia, nababa a bilang ti semilia ket mainanaigiti BPA, segun kadagiti panagadal.


(Naipablaak iti Bannawag, Nobiembre 18, 2013 a bilang.)