Ti Amerikana a Nalaing nga Ag-Ilokano ken Managayat iti Pannakatagiben ti Aglawlaw

TI AMERIKANA A NALAING NGA AG-ILOKANO KEN MANAGAYAT ITI PANNAKATAGIBEN TI AGLAWLAW. Pinadayawan itay nabiit ii Department of Environment and Natural Resources-Ilocos Norte nga idauluan ni PENRO Juan Delos Reyes ti maysa a social activist ken dati a US Peace Corps Volunteer a ni Julia Crowley, 25, gapu iti anep ken tulongna iti pannakaaywan ti aglawlaw aglalo iti panangibingayna iti kapanunotanna tapno maipasa ti maysa nga ordinansa iti Sarrat, Ilocos Norte tapno makontrol ti panagusar iti plastik iti tiendaan ken iti pannakaipaay iti $2,100 a kas tulong manipud iti gobierno ti Estados Unidos para iti pannakaaramid iti cloth bag manipud iti Sarrat Binakol tapno isu ti agbalin nga alternatibo nga usaren dagiti mapan makitienda imbes a plastik.  Iti agdama, madama ti panagsukisok ni Crowley no kasano nga imanehar dagiti tallo a napili a munisipio iti Ilocos Norte a kas iti Sarrat, Vintar ken Solsona ti basurada a kas paset ti masteral thesis-na  iti Cornell University, New York. Ania man nga agbalin a resulta daytoy, maibingayto kadagiti amin a maseknan a pagadalan ken pagpampanunotan tapno masaluadan iti aglawlaw. Maipalagip a nagserbi ni Crowley a kas US peace corps volunteer iti Ilocos Norte manipud 2009 agingga iti 2011 sa nagsubli met laeng ita a tawen tapno leppasenna ti panagsukisokna. Malaksid ken ni Crowley, sumagmamano pay nga indibidual ken grupo iti gobierno ken pribado a sektor ti pinadayawan ti DENR kabayatan iti culminating activity ti Environment Month a naangay iti La Tabacalera Function Hall idi Hunio 24, 2013. (Leilanie G. Adriano)


(Naipablaak iti Bannawag, Hulio 8, 2013 a bilang.)

Sayang!

SAYANG! No pagay la koma wenno dadduma pay a pakairanudan a kas kadagiti mula a para taraon ti naimula, saan a mapuoran a kas iti daytoy dagumpo ti marihuana a sinilmutan ti maysa nga ahente ti Philippine Drug Enforcement Agency-Cordillera itay Hunio 24, 2013. Karaman dagitoy a marihuana iti P150-milion ti pategna a plantasion ti marihuana a naduktalan iti Bantay Bitulayungan iti Kalinga. (Rizaldy Comanda)


(Naipablaak iti Bannawag, Hulio 8, 2013 a bilang.)

“Dayta la agpapaubing ti pampanunotenyo”

Ni LESLIE ANN G. AQUINO

Binabalaw ti maysa a padi a Katoliko itay lawasna ti nakaro unay a kinamanagayat dagiti Filipino a mangpapaubing iti langada.

Kangrunaan a nangiturongan ni Manila Auxiliary Bishop Broderick Pabillo, agpapaay a chairman ti Catholic Bishops’ Conference of the Philippines National Secretariat for Social Action (CBCP-NASSA), ti pammabalawna dagiti mangar-aramat iti stem cell therapy iti namnamada a mapagtalinaedda ti kinaubingda.

“Ti parikuttayo ket isu ti nakaro unay a panangin-intonartayo no kasano a mapagtalinaedtayo ti kinaubingtayo ngem ditay met ikkan iti pateg ti tunggal minuto a kaaddatayo ditoy Daga,” kinuna ni Pabillo iti maysa nga innuman.

“Ib-ibusentayo ti adu nga orastayo kadagiti banag a di met nasken ket inton lumallakay ken bumabbakettayon, maamiristayo nga adu pay gayam dagiti rumbeng nga aramidentayo,” innayonna.
Impalagip pay ni Pabillo a ti kangrunaan a panggep ti stem cell therapy ket isu ti panangagasna iti sakit, saan ket a pagpapintas wenno pagpaguapo.

Sakbayna, kinuna ni CBCP-Episcopal Commission on Bioethics Chairman Bishop Jose Oliveros a saan a kontra ti Simbaan Katolika iti stem cell therapy no la ket maiparbeng ti pannakaaramat daytoy— wenno agbatay iti kita ti stem cells a maaramat ken no ania a gapu a maaramat— kas koma dagiti laeng “adult stem cells” ti mausar a kas pagagas.


(Naipablaak iti Bannawag, Hulio 8, 2013 a bilang.)

HULIO 8, 2013

SARITA
 6 Ti Bituen nga Arapaap ni Lilang Utiang
    Jobert M. Pacnis

NOBELA
28 Ay, ni Reberen! (7)
Ariel S. Tabag
32 Galiera Queen (18)
  Dionisio S. Bulong

DANIW
4 Mangparsuatanto iti Bukodta a Pagtaengan
   John B. Buhay
8 Yarasaasto Laengen ti Angin
   Pearl Lovedyn A. Dacuag
30 Segseggaanka
   Roselyn C. Campano
48 Dandaniw a Para Ubbing
     Gregorio T. Amano/ Rolando A. Seguro, Jr.

SALAYSAY
10 Gapu Ta Daytoy ti Linteg (96)
    Hues Joven F. Costales (Ret.)
12 Drug Test ti LTO: Paggastuan Laeng, Awan Mamaayna
    Neyo Mario E. Valdez
40 Kayatmo Met ti Agmula iti Nagrarapang a Lasona?
    Reynaldo E. Andres

KOMIKS
17 Tres Muchos (112)
20 Aritosan (36)
22 Miks & Tiks

KOLUM
14 Okeyka, Apong!
16 Dear Doc
34 TIPS
37 Kastoy, Kapid, Ditoy Hawaii
38 Ading Kosinera
42 Padasem Daytoy, Kailian

PAGLINGLINGAYAN
44 Showbiz
46 Face-Buko, Kdp.
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
15 Maika-25 nga Anibersario ti NCCA: Tinampokan ti Konsierto a “Mga Kulturang Filipino…Buhay na Buhay”
24 Pasnaan 4: Pinnitpit ken Pinnaludip, Innadal ken Innangaw
26 Siled ti Kararag
27 Natural a Kinabaknang: Makatulongtayo iti Pannakasaluadna
31 Nalaka ti Agaramid iti Ubing: Ngem Narigat ti Agpadakkel
33 Txtm8
35 Ti Gasatmo Ita a Lawas
36 Ammuem Pay Dagitoy
39 Ania, Di Kayat ti Anakmo ti Paria?

Higante nga Uong

HIGANTE NGA UONG. Siraragsak ni Romeo Ganiron, 47, residente iti Brgy. Ben-agan, Siudad ti Batac a mangipakpakita ti kadakkelan a patubona nga uong. Ket insagutna pay daytoy ken ni Mayor Jeffrey Jubal Nalupta iti isasarungkarna iti opisina ni Mayor Nalupta a kas pagyamanna iti panangsupsuporta ti mayor kadagiti gakat a mangpadur-as iti agrikultura iti siudad. Nagturpos ni Romeo iti BS in Forestry ngem kinaykayatna ti agobra a kas pribado tapno maipamaysana ti agtalon. Malaksid iti welding shop a tartarawidwidanna, nasursurona pay ti ag-culture iti oyster sipud pay idi 2007. Ngem iti isusurotna kadagiti nadumaduma a field trip dagiti mannalon, nasursurona no kasano ti agpatanor iti uong a Milky Indian mushroom – nga isu ita ti ipampamaysana a paaduen ta natakuatanna a naim-imas daytoy ngem ti oyster ken bassit ti imetna a uric acid. Malaksid a nalaka nga istimaren ta taep wenno carbonized rice hull laeng ti kasapulan, nangina pay (P250 ti sangakilo). Kayatna a sawen a no makaapitka iti uppat a kilo iti kada aldaw, mapanen a P30,000 ti paglakuam iti binulan. (Leilanie G. Adriano)


(Naipablaak iti Bannawag, Hulio 1, 2013 a bilang.)

Benepisiario ti 4Ps, dakami ti agpili – DSWD

Inlawlawag ni Department of Social Welfare and Development (DSWD) Secretary Corazon Soliman a di rebbeng a makibiang dagiti local government unit (LGU) iti panagpili kadagiti benepisiario ti Pantawid Pamilyang Pilipino Program (4Ps) ti gobierno.

Iti maysa nga innuman, kinuna ni Soliman a ti laeng DSWD ti addaan iti karbengan nga agpili kadagiti agnaar iti 4Ps tapno maliklikan ti maaw-awagan iti “palakasan.”

Impetteng ti DSWD a nupay bigbigen ti departamento a maseknan dagiti lokal a gobierno kadagiti masakupanda, masapul a surotenda ti international standard ta dakkel a paset ti pondo ti 4Ps ti nautang iti World Bank ken Asian Development Bank.

Paset pay ti pondo ti $434-milion nga ayuda ti Millenium Challenge Corporation, maysa a korporasion a kukua ken imatonan ti gobierno ti America, a mangay-ayuda kadagiti programa ken proyekto a manglablaban iti kinakurapay.

Panggepna nga ital-o ti kasasaad dagiti nakurapay a Filipino, iti babaen ti programa, adda tulong a pinansial a para iti tallo nga annak (agtawen iti 13 agpababa) dagiti kakurapayan a pamilia iti pagilian.

Mapili dagiti benepisiario ti 4Ps iti babaen ti National Household Targeting System for Poverty Reduction (NHTS-PR), a maus-usar met iti panangpili kadagiti benepisiario ti Self-Employment Assistance-Kaunlaran (SEA-K), social pension ken cash-for-work.


(Naipablaak iti Bannawag, Hulio 1, 2013 a bilang.)

Ipa-Ilokos-da

IPA-ILOKOS-DA. Isaksako dagitoy a negosiante a taga-Allacapan dagiti ginatangda a saba ken niog tapno nalaklakanton nga ikargada iti trak sa ibiaheda nga ipan iti IloKos.  Tunggal  Huebes ken Domingo a kaaldawan ti dapon (wenno tienda) ti Allacapan, adu dagiti aglako kadagiti apitda a saba ken niog a gagangay met a kompraen dagiti negosiante tapno ilakoda iti Ilokos. (ROLANDO A. SEGURO, JR.)


(Naipablaak iti Bannawag, Hulio 1, 2013 a bilang.)

Enrile, P150.4-M ti nagastona iti panagkandidatona a senador

Ni naabak a kandidato a senador Juan “Jack” Ponce Enrile Jr., anak ni naglusulos a Senate President Juan Ponce Enrile, ti kaaduan iti nagastos iti 2013 senatorial race, kas maibatay iti record ti Commission on Elections (Comelec).

Nakagastos ni Enrile, a nakagun-od iti 15th a puesto, iti P150,797,910.18 iti napaay a kandidaturana para iti Senado ken isu pay ti kaaduan iti naala a donasion para iti panagkampaniana nga aggatad iti P150,401,072.09, kas maibatay iti indatagna nga statement of contributions and expenditures (SOCE).
Maikadua a kaaduan iti nagastos ni Senator-elect JV Ejercito (maika-11 iti 12 a nangabak a senador): P138,207,825.76.Kunana a nakagastos iti P2,276,085.01 iti bukodna a kuarta idinto a naukkonna a donasion ti P135,931,740.75. Mairaman kadagiti nagdonasion ni Iñigo U. Zobel a nangted iti P15-milion.
Mairaman kadagiti nangusar iti bukodda a kuarta iti panagkampaniada ni Senator-elect Cynthia Villar: P131,656,672.84. Iti nasao a dagup, mapan a P133,979,127.25 ti bukod a kuarta ni Villar (No. 10) idinto a kontribusion met ti P2,616,454.41.

Kinuna ni Comelec Chairman Sixto Brillantes Jr. a maibatay iti pagalagadan, saan koma nga aggastos ti tunggal kandidato a senador iti nasursurok ngem P156-milion iti panagkampaniada iti napalabas nga eleksion.

Mairaman kadagiti kaaduan iti nagastos da Alan Peter Cayetano (P131,044,782.33), Nancy Binay (P128,695,057.10) ken Bam Aquino (P124,327,987.81).

Maika-7 a kaaduan iti nagastos ni Grace Poe (No. 1): P123,448,994.86. Sumarsaruno da Juan Edgardo Angara (P120,136,752.86), Chiz Escudero (P100,723,309.10), Risa Hontiveros (P88,628,348.11), Loren Legarda (P83,034,205) ken Koko Pimentel (P75,552,863.49).

Kadagiti 12 a kaaduan iti nagastos, da laeng Enrile ken Hontiveros, a nangusar iti P8,835.448.11 manipud iti bukodna a petaka, ti saan a nangabak.

Mairaman kadagiti Magic 12 da Senator-elect Gregorio Honasan (No. 12) a nakagastos iti P24,111,848.96, a P1,009,707.92 ti naggapu iti bolsana.

Nakagastos met ni Senator-elect Antonio Trillanes IV (No. 9) iti P30,135,014.77.


(Naipablaak iti Bannawag, Hulio 1, 2013 a bilang.)

HULIO 1, 2013

SARITA
6 “No ‘Mirkanok, Kunak, ‘Mirkano!”
Rolando A. Seguro, Jr.

NOBELA
28 Ay, ni Reberen! (6)
Ariel S. Tabag
32 Galiera Queen (17)
Dionisio S. Bulong

DANIW
4 Villanelle Kenka Hawaii
Lilia Quindoza Santiago
30 2 a Soneto
Honor Blanco Cabie
48 Dandaniw a Para Ubbing
Ridel T. Cabulisan/ Ryan A. Dulig

SALAYSAY
8 Gapu Ta Daytoy ti Linteg (95)
Hues Joven F. Costales (Ret.)
10 Aw-awaganda Daytoy a Mangngagas iti “Miracle Doctor”
Liezle Basa Iñigo ken Ellson A. Quismorio
12 Katulongan Idi, Kasambahay Itan
Neyo Mario E. Valdez
24 Naidumduma ti Lussok Crystal Cave iti Luna
Leilanie G. Adriano
40 Mapagbungam ti Dragon Cactus iti Uray Ania a Bulan ti Tawen
Reynaldo E. Andres

KOMIKS
17 Tres Muchos (111)
20 Aritosan (35)
22 Miks & Tiks

KOLUM
14 Okeyka, Apong!
16 Dear Doc
34 TIPS
37 Kastoy, Kapid, Ditoy Hawaii
38 Ading Kosinera
42 Padasem Daytoy, Kailian

PAGLINGLINGAYAN
44 Showbiz
46 Double Dick, Kdp.
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
2 Ti Makunami
15 Tao, Lugar, Pasamak
26 Siled ti Kararag
27 Apay nga Agkusit Dagiti Agad-adal?
31 Dakkel ti Akem da Ma’am ken Sir iti Panagballigi Dagiti Adalanda
33 Txtm8
35 Ti Gasatmo Ita a Lawas
36 Ammuem Pay Dagitoy
39 Ania, Agsigsigarilio Met ti Tagibim, Komari?

Uong a Laplapayag

UONG A LAPLAPAYAG. Umad-adu dagiti aggatang kadagiti oyster mushroom wenno laplapayag a patanor ni Outstanding High-Value Crop Farmer Marcelo “Celong” Peralta ti Banayoyo, Ilocos Sur. Maipagpannakkelna ken ti asawana a ni Antonia ti organiko a produktoda a nangted iti nayon a pamastrekan dagiti kabarangayanda. Makita iti ladawan ni Nana Antonia a mangam-amiris iti kalidad ti patanorda sakbay ti panagapitda. (Teksto/Ladawan: Ricardo P. Raguini)


(Naipablaak iti Bannawag, Hunio 24, 2013 a bilang.)

Umad-adu dagiti mayat nga agpadi

Ni LESLIE ANN G. AQUINO

Umad-adu dagiti agtutubo a Filipino a mayat nga agpadi.

Maibatay daytoy iti bilang dagiti aplikante nga agkalikagum a sumrek iti San Carlos Seminary iti Siudad ti Makati.

Kinuna ni Fr. Yulito Ignacio, spiritual director ti San Carlos Seminary, a tinawen a nakaad-adu dagiti maaw-awatda nga aplikasion manipud kadagiti agtutubo a lallaki nga agtawen iti manipud iti 16 agingga iti 19 ngem nakaladladingit laeng ta saanda a maakomodar amin dagitoy.

Kinunana nga iti daytoy a tawen laeng, nakaawatda iti di nakurkurang ngem 150 nga aplikasion ngem 32 laeng ti inawatda para iti First Year Philosophy.

Kinuna ni Fr. Ignacio a sakbay a makapagpadi ti maysa a tao, nasken a maileppasna ti uppat-a-tawen a kurso iti Pilosopia (kaibatogan ti College degree) sa maisaruno ti lima-a-tawen a kurso iti Teolohia.

Innayon ni Fr. Ignacio nga estriktoda iti panagawatda kadagiti aplikante ta kayatda a masigurado a dagiti sumrek, isu dagitay “naawagan” tapno agbalin a padi.


(Naipablaak iti Bannawag, Hunio 24, 2013 a bilang.)

Jeremiah, nailayon a presidente ti OFCC

Nailayon ni Jean Jeremiah a presidente ti Oahu Filipino Community Council (OFCC) iti eleksion ti pannakaina a gunglo dagiti gunglo dagiti Filipino iti Oahu, Hawaii.

Kadua ni Jeremiah a nabotosan dagiti sumaganad nga opisial nga agtakem manipud iti Hulio 1, 2013 agingga iti Hunio 30, 2014: Angie Santiago, umuna a bise; Rhoda Alvarez, maikadua a bise; Loida Yamamoto, sekretaria; Eleanor Bru, katulongan a sekretaria; Luz Pierson, tesorera; Ben Pulido, katulongan a tesorero; ken Baybee Ablan, auditor.

Dagiti direktor (para iti 2 a tawen): Rev. Alex Vergara, Cesar Bonilla, Hermie Pagaduan ken Lydia Agustin.

Dagiti agpaay iti makatawen: Eddie Bueno, Rossi Patton, Davelyn Quijano ken Dr. Ignacio Torres.

Ni Consul General Julius Torres ti namagsapata kadakuada. (Amado I. Yoro)


(Naipablaak iti Bannawag, Hunio 24, 2013 a bilang.)

Abel a Bandera

ABEL A BANDERA. Agen-ensayo dagitoy a kameng ti Philippine National Police iti pannakaiwagayway ti kaunaan a higante a bandera ti Filipinas a naaramid manipud iti abel-Iloko para iti pannakarambak ti maika-115 a tawen ti panagwaywayas ti Filipinas iti sango ti kapitolio ti Ilocos Norte. Aramid dagiti umaabel iti Paoay, Ilocos Norte ti nasao nga abel a naaramid a wagayway nga agatiddog iti tallo a metro ken agakaba iti kagudua ti metro. (Leilanie G. Adriano)


(Naipablaak iti Bannawag, Hunio 24, 2013 a bilang.)

HUNIO 24, 2013

SARITA
 6 Kulibangbang
   Marichel E. Suguitan

NOBELA
28 Ay, ni Reberen! (5)
Ariel S. Tabag
32 Galiera Queen (16)
  Dionisio S. Bulong

DANIW
4 Pananglipat
   Rhea Rose D. Berroy
8 Ti Naganmo iti Kadaratan
   Michael John B. Ancheta
30 Dua a Daniw
     Jake F. Ilac
48 Dandaniw a Para Ubbing
     Dexter M. Fabito/ Jobert M. Pacnis

SALAYSAY
10 Gapu Ta Daytoy ti Linteg (94)
    Hues Joven F. Costales (Ret.)
12 Ditoy Filipinas: Maipapaigid Dagiti Pandek?
     Neyo Mario E. Valdez
24 Kastoy Ditoy Micronesia (2)
     Virginia A. Duldulao
40 Peste a Bisukol: Dimo Ipalubos a Didigraennaka
     Reynaldo E. Andres

KOMIKS
17 Tres Muchos (110)
20 Aritosan (34)
22 Miks & Tiks

KOLUM
14 Okeyka, Apong!
34 TIPS
37 Kastoy, Kapid, Ditoy Hawaii
38 Ading Kosinera
42 Padasem Daytoy, Kailian

PAGLINGLINGAYAN
44 Showbiz
46 For The Whore Family, Kdp.
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
15 Tao, Lugar, Pasamak
16 Kasano a Mailiklik iti Pannakadadael Dagiti Muebles?
26 Siled ti Kararag
27 “Gifted” Kadi ti Anakmo?
31 Ania Kadi ti “Special Education”?
33 Txtm8
35 Ti Gasatmo Ita a Lawas
36 Ammuem Pay Dagitoy
39 Tapno Maipaugali ti Naimbag a Kababalin Kadagiti Ubbing

Panagtitinnulong

PANAGTITINNULONG. Tultulongan dagitoy nga agindeg iti Brgy. Ammubuan, Ballesteros, Cagayan dagiti mangngalap a kalugaranda iti panangisang-at dagitoy iti bilogda a napan nagsigay iti maysa nga agsapa. No adu ti maala, mawarasan dagitoy iti ikan. Ngem no bassit ti nakalapan, saan a dayta ti tubeng iti itutulongda kadagitoy napan nagkalap a kalugaranda. (Jobert M. Pacnis)


(Naipablaak iti Bannawag, Hunio 17, 2013 a bilang.)

Pagadalan a Katoliko, maburiboran iti K to 12

Inako ti gunglo dagiti pagadalan a Katoliko iti pagilian a marigatanda a mangipakat iti K to 12 a programa gapu iti panagkurangda iti siled-pagadalan ken panagsanay kadagiti titser.

Iti laksid daytoy, sinigurado ni Catholic Educational Association of the Philippines Executive Director Rhodora Angela Ferrer nga ikagkagumaananda a maipakat a naimbag ti programa, a naan-anayen a linteg ita.

Inlawlawag pay ni Ferrer nga adda tallo a paset ti programa a yunay-unayda tapno maipakatda a naimbag ti K to 12: ti Mother Tongue-Based Multilingual Education, Spiral Progression Approach ken Standard-Based Assessment.

Segun ken ni Ferrer, masapul met a mayunay-unay kadagiti pribado a pagadalan dagiti edad dagiti ubbing, ta kadagiti para publiko nga eskuela, masapul nga adda lima a tawen ti ubing a maawat iti kindergarten, agtawen iti innem ti sumrek iti Grado 1 ken pito iti Grado 2.

Iti agdama, kuna ni Ferrer, dagiti Grado 1, 2, 7 ken 8 a curriculum laeng ti maipatpatungpal para iti K to 12 a programa ket manamnama a kadagiti sumaruno a maysa agingga iti dua a tawen, maipatungpal metten dagiti Grado 9 ken 10. 

Kuna ni Ferrer a napateg met a maammuan ti publiko, partikular dagiti nagannak ken agad-adal, ti kinapateg ti nainayon a dua a tawen, nga adda latta core curriculum a maisuro kadagiti estudiante tapno mausarda iti kolehio.

(Naipablaak iti Bannawag, Hunio 17, 2013 a bilang.)

Special meeting ti GF: Hunio 23

Angayen ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, ti maysa nga special meeting inton Hunio 23, 2013 iti San Antonio, Narvacan, I.S., iti panangsangaili da Eden Cachola Bulong, tesorera ti gunglo, ken Dionisio S. Bulong, maysa kadagiti mamagbaga ti gunglo.

Kangrunaan a mataming iti miting ti maipapan iti Balay ti GUMIL a proyekto ti gunglo, malaksid iti dadduma pay a pakaseknan ti gunglo.

Kidkiddawen ni Arthur P. Urata Sr., presidente ti gunglo, ti idadar-ay amin nga opisial, da Mario Tejada (bise-presidente), Roy V. Aragon (sekretario-heneral), Estela Bisquera-Guerrero (auditor), Benjamin P. Pacris (business manager), Reynaldo E. Andres (PRO); board of directors: Sherma E. Benosa, Emy Amad Z. Bucaneg, Eliseo B. Contillo, Freddie P. Masuli, Aileen R. Rambaud, Martin T. Rochina, Ariel S. Tabag ken Vilmer V. Viloria.

Manamnama met ti kaaddanto dagiti dadduma pay a mamagbaga ti gunglo a da Juan S.P. Hidalgo Jr., Jose A. Bragado, Manuel S. Diaz, Baldovino A. Valdez, ken Cles B. Rambaud.

Maigunamgunam pay ti itatabuno dagiti presidente dagiti aktibo a Chapter ti GF, da Villamor Visaya (Isabela), Elizabeth M. Raquel (Ilocos Norte), Edilberto H. Angco (Ilocos Sur), Djuna R. Alcantara (La Union), Marianito Machacon (Pangasinan), Ret. RTC Judge Vivencio S. Baclig (Metro Manila), Joey Guzman (Abra), Rizal Fernandez (GUMIL Oahu), Arnold C. Baxa (GUMIL Maui) ken Nexon Agcaoili (GUMIL Hong Kong). (REA)


(Naipablaak iti Bannawag, Hunio 17, 2013 a bilang.)

HUNIO 17, 2013

SARITA
 6 Ina
   Ronelyn B. Ramones

NOBELA
28 Ay, ni Reberen! (4)
Ariel S. Tabag
32 Galiera Queen (15)
  Dionisio S. Bulong

DANIW
4 Dua a Daniw ti Pakasaritaan ti Ayat a Rimsua
   Roy V. Aragon
8 Ken ni Liwliwa (2)
   Arnold C. Baxa
30 3 a Haiku ti Sardam
    Dumay Solinggay
48 Dandaniw a Para Ubbing
    Melody V. Aguinaldo/ Cyrus Daniel A. Barrion

SALAYSAY
10 Gapu Ta Daytoy ti Linteg (93)
    Hues Joven F. Costales (Ret.)
12 Nangabak? Ngem Apay a Di Naiproklama ti Partidoyo, Lilong?
     Neyo Mario E. Valdez
24 Kastoy Ditoy Micronesia (1)
    Virginia A. Duldulao
40 Adu ti Pagsayaatan ti Nasimpa a Talon
     Reynaldo E. Andres

KOMIKS
17 Tres Muchos (109)
20 Aritosan (33)
22 Miks & Tiks

KOLUM
14 Okeyka, Apong!
16 Dear Doc
34 TIPS
37 Kastoy, Kapid, Ditoy Hawaii
38 Ading Kosinera
42 Padasem Daytoy, Kailian

PAGLINGLINGAYAN
44 Showbiz
46 Coffe, Kdp.
47 Sinniriban
47 Sapukas
47 Sudoku
47 Agkatawa ti Mayat

DADDUMA PAY
 2 Ti Makunami
15 Tao, Lugar, Pasamak
26 Saganaan ti Idadateng ti Kalamidad
27 Siled ti Kararag
31 Agpaling-etka Met, Nakkong!
33 Txtm8
35 Ti Gasatmo Ita a Lawas
36 Ammuem Pay Dagitoy
39 Sungbasungbatannaka Kadi ti Anakmo, ‘Mari?

Kalinga, naideklara a Tourism Dev’t Area

Manamnama ti idudur-as ti probinsia ti Kalinga iti Cordillera iti pannakaideklara daytoy itay nabiit a kas Tourism Development Area (TDA) kalpasan ti panangpirma ni Presidente Aquino iti Akta Republika 10561 a nakaideklaraan pay ti Davao Oriental a TDA.

Mabigbig ti Kalinga gapu kadagiti napipintas a buya ti nakaparsuaan a naiparabur iti nasao a lugar a kas kadagiti karayan, dan-aw, bambantay, malaksid kadagiti historikal ken kultural a pakaitanduduannna.

Iti pannakaideklara ti Kalinga, ken uray pay ti Davao Oriental, a TDA, manamnama ti naan-anay a tulong ti gobierno nasional tapno mapadur-as ti turismo iti nasao a lugar.

Maibilang kadagiti “tourism zones” iti Kalinga dagiti makapikapik-ti-sukogna a kabambantayanna, ti Palan-ah Falls ken Hot Springs iti Tanudan, ti rainforest ti Bantay Binaratan, dagiti karayan a mangusok iti daga ken dagiti kueba iti Balbalan, ti Aguinaldo Hill ken dagiti dan-aw iti Pinukpuk, ti posibilidad ti pannakapatan-ay ti “white water rafting” iti Chico River a mangrugi iti Tinglayan a sumalog iti Lubuagan, Pasil ken Tabuk City; dagiti namsek-iti-pakasaritaan a lugar iti Tabuk City; ti Padharao Lake ken ti historical a Guina-ang Village iti Pasil; ken ti Elephant Hill ken ti man-made lagoon iti Rizal.

(Naipablaak iti Bannawag, Hunio 10, 2013 a bilang.)

Padua, nailayon a FAMAS president

Nailayon ni showbiz columnist iti Bannawag Angelo “Eloy” Padua a presidente ti FAMAS (Filipino Academy of Movie Arts and Sciences) iti eleksion ti gunglo a naangay iti Manila Bulletin idi Mayo 10 itoy a tawen.

Kadua ni Padua, tubo iti Sison, Pangasinan, a nabotosan dagiti sumaganad nga agtakem iti uneg ti dua a tawen (2013-2015):

Alice H. Reyes, 1st Vice-President; Efren Montano, 2nd Vice-President; Francia C. Conrado, Secretary; Dennis Aguilar, Treasurer; Tita Arcilla, Auditor; Art Tapalla ken Elvie Gonzales, Public Relation Officers; Brian J. Lu, Marshal, ken dagiiti Trustees: Juan Al. Asuncion, Richel Dorotan, Edgar Godin, Ner Jedeliz, Cles B. Rambaud, Saturnino Sofranes, Teresita Tan, Jun Velasco ken Wilberto Villamin.


(Naipablaak iti Bannawag, Hunio 10, 2013 a bilang.)

Daing ti Gonzaga

DAING TI GONZAGA. Nadumaduma a nadaing a nakalapan nga ikan ken dadduma pay a mabiag iti baybay ti Gonzaga, Cagayan ti bambantayan dagitoy naanus nga agassawa iti maysa nga aldaw ti dapon (tienda) iti merkado publiko ti Gonzaga, Cagayan. Adda daing a pusit, munamon, espada wenno bulong-unas, aramang, kdp. (Roy V. Aragon)


(Naipablaak iti Bannawag, Hunio 10, 2013 a bilang.)

Kombension ti Oahu Filipino Community Council, Hunio 9

Angayen dagiti nadumaduma a gunglo dagiti Filipino iti Oahu a kameng ti Oahu Filipino Community Council (OFCC) ti kombensionda iti daytoy a Hunio 9 iti Philippine Consulate General Social Hall, 2433 Pali Highway, Honolulu, Hawaii.

Ti tema ti kombension: “Commitment. Action. Responsibility. Excellence (C.A.R.E).”

Panggep ti kombension ti agpaay a silulukat a pakatamingan dagiti isyu a pakaseknan dagiti kadaraan, pakatamingan ti pannakaiwayat dagiti nakaprograma a proyekto a pakairanudan dagiti kameng, agpaay a pakatubayan dagiti agtutubo ken agkabannuag tapno maisaganada ti bagida a kas dadaulo iti masakbayan, ken kangrunaanna, pakabotosan dagiti mangidaulo iti Konseho a pagkamengan dagiti aganay a 44 a unit organization iti Oahu a pakapilian ti 12 nga opisial manipud iti presidente agingga kadagiti kameng ti hunta dagiti direktor.

Para iti nayon nga impormasion, mabalin a kontaken ti asino man kada OFCC Convention Chair Jake Manegdeg iti 524-6993, OFCC President Jean Jeremiah iti 387-5481; ken Amado Yoro iti 699-9814. (AIY)

(Naipablaak iti Bannawag, Hunio 10, 2013 a bilang.)