Kalinga, naideklara a Tourism Dev’t Area

Manamnama ti idudur-as ti probinsia ti Kalinga iti Cordillera iti pannakaideklara daytoy itay nabiit a kas Tourism Development Area (TDA) kalpasan ti panangpirma ni Presidente Aquino iti Akta Republika 10561 a nakaideklaraan pay ti Davao Oriental a TDA.

Mabigbig ti Kalinga gapu kadagiti napipintas a buya ti nakaparsuaan a naiparabur iti nasao a lugar a kas kadagiti karayan, dan-aw, bambantay, malaksid kadagiti historikal ken kultural a pakaitanduduannna.

Iti pannakaideklara ti Kalinga, ken uray pay ti Davao Oriental, a TDA, manamnama ti naan-anay a tulong ti gobierno nasional tapno mapadur-as ti turismo iti nasao a lugar.

Maibilang kadagiti “tourism zones” iti Kalinga dagiti makapikapik-ti-sukogna a kabambantayanna, ti Palan-ah Falls ken Hot Springs iti Tanudan, ti rainforest ti Bantay Binaratan, dagiti karayan a mangusok iti daga ken dagiti kueba iti Balbalan, ti Aguinaldo Hill ken dagiti dan-aw iti Pinukpuk, ti posibilidad ti pannakapatan-ay ti “white water rafting” iti Chico River a mangrugi iti Tinglayan a sumalog iti Lubuagan, Pasil ken Tabuk City; dagiti namsek-iti-pakasaritaan a lugar iti Tabuk City; ti Padharao Lake ken ti historical a Guina-ang Village iti Pasil; ken ti Elephant Hill ken ti man-made lagoon iti Rizal.

(Naipablaak iti Bannawag, Hunio 10, 2013 a bilang.)