“Animation” ken “game development,” napintas a panguartaan

Napintas a damag kadagiti interesado iti tay-ak ti “animation” ken “game development.”

Kas maibatay iti panagsukisok ti international research firm a MarketsandMarkets, manamnama a dumakkel ti pateg daytoy nga industria manipud iti $122.20-bilion iti 2010 iti $242.93-bilion iti 2016.

Iti agdama, ti India ti mangdomdominar iti merkado iti iggemna a 40 a porsiento iti nasurok a $122.20-bilion ti pategna nga industria. Sumaruno ti Korea (15 a porsiento), maikatlo ti Filipinas (10-porsiento).

Kinuna ni Grace Dimaranan, presidente ti Animation Council of the Philippines, Inc. (ACPI) a narimat ti masakbayan ti Filipinas iti sektor ti “animation” ken “game development” isu a nasken a masanay dagiti aginteres kadagitoy a tay-ak.

Itay laeng nabiit, nakikadua ti Information Technology and Business Process Association of the Philippines (IBPAP) ken ti Technical Education and Skills Development Authority (TESDA) iti gobierno ti Korea tapno masanay dagiti animator ken game developer a Filipino.


(Naipablaak iti Bannawag, Marso 25, 2013 a bilang.)