Nagtalinaed ni Henry Sy, akinkukua iti SM, a numero uno iti listaan dagiti bilionario iti Filipinas, kas kuna ti magasin a Forbes itay lawasna.
Innayon ti Forbes nga immadu metten ti bilionario a Filipino, nga agingga iti maudi a listaanna, nagbalindan a 11 manipud iti 6 itay napan a tawen.
Kas kuna ti Forbes, addaan ni Sy iti kinabaknang nga agpateg iti $13.2-bilion (P538.6-bilion). Isu met ti maika-68 iti listaan dagiti kababaknangan iti lubong.
Iti agdama, agdagup laeng iti 1,426 a tattao iti sibubukel a lubong ti addaan iti kinabaknang nga agdagup iti $1-bilion wenno ad-adu pay a mangig-iggem iti $5.4-trilion a kinabaknang ti sibubukel a lubong.
Sumaruno ken ni Sy iti listaan ni negosiante Lucio Tan, $5-bilion (P204-bilion), adda iti maika-248 a puesto iti lubong;
Maika-3 a kabaknangan iti Filipinas ni port ken casino giant Enrique Razon, Jr., $4.9-bilion (P200-bilion), maika-258 a kabaknangan iti lubong;
Maika-4, Andrew Tan, $3.95-bilion ($164-bilion), maika-345 iti lubong;
Dadduma pay a bilionario a Filipino:
Negosiante Roberto Ongpin, $1.5-bilion (P61.2-bilion), maika-1,175 iti lubong; kapadana nga adda iti maika-1,175 a puesto ni real estate magnate Andrew Gotianun ken pamiliana (baro iti listaan).
Kadua ni Gotianun nga “agdadamo iti listaan” dagiti bilionario a dakdakkel pay ti kinabaknangda, kas kada: construction giant David Consunji ken pamiliana, $2.8-bilion (P114.3-bilion), rank 503; banking tycoon George Ty ken pamiliana, $2.6-bilion (P106.1-bilion), rank 554;
Da akinkukua iti Puregold a da Lucio ken Susan Co, $2-bilion (P81.5-bilion), rank 736; negosiante Roberto Coyiuto, Jr., $1.6-bilion (P65.2-bilion), rank 931, akinkukua iti Jollibee a ni Tony Tan Caktiong ken pamiliana, $1.4-bilion (P57.1-bilion), rank 1031.
Naawan metten iti listaan ni negosiante Eduardo "Danding" Cojuangco, a maysa kadagiti innem a bilionario a Filipino nga inlista ti Forbes itay napan a tawen.
Iti sangalubongan, adda iti tuktok ti listaan ni Mexican telecommunications tycoon Carlos Slim ($73-bilion), sumaruno ni Microsoft founder Bill Gates ($67-bilion).
Maikatlo ti akinkukua iti Spanish fashion retailer a Zara, ni Amancio Ortega ($57-bilion), inagawna ti nasao a puesto ken ni Warren Buffet ($53.5-bilion).
Innayon ti Forbes a ni Brazilian Eike Batista ti kadakkelan iti pukaw iti daytoy a tawen. Agdagup iti $19.4-bilion ti pukawna, wenno nasurok a $50-milion iti inaldaw ti naikissay iti kinabaknangna.
Adda ni Batista iti maika-100 a puesto ita a tawen, maika-7 iti 2012.
(Naipablaak iti Bannawag, Marso 18, 2013 a bilang.)
No comments:
Post a Comment