Ti Makunami -- Pebrero 13, 2012

“Dibidi-dibidi!”

Kasano ngata nga agpayso a matungday ti panaglako kadagiti pirata a pelikula iti VCD wenno iti DVD? Iti biang ni Mayor Alfredo Lim ti Manila, mabalin a makunana nga awanen dagiti aglaklako iti pirata a DVD iti sakupna kalpasan ti nainget a kampaniana kontra iti panaglako iti DVD. Binagbagon, no ar-arigen, dagiti pirata a DVD a pinarimrim-itna iti Liwasang Bonifacio nga ayan ti rebulto ni Bonifacio a tinakawda ti pistolana.

Ala, wen, mabalin nga agpayso nga awandan iti Manila (no ammona la koma nga adda manen dagiti aglaklako iti Recto) ngem napandan sa met kadagiti sabsabali pay a paset ti Kamanilaan ta agkaiwara met dagiti aglako kadagiti pirata a DVD iti Novaliches.

Patienmi ketdi a dinto mapugipog ti panagpartuat ken panaglako iti pirata a DVD agingga a di kabaelan dagiti umili ti gumatang iti orihinal a DVD. Kaniak laengen a biang, pagan-anok koma ti gumatang iti pirata a DVD no kabaelak met ti presio ti orihinal?

Iti sabali a pannao, no kayat ti gobierno nga aggibusen ti aldaw ti pirata a DVD, agaramid koma iti pamuspusan tapno maipalaka ti presio ti orihinal a DVD, wenno padur-asenna ti biag dagiti umili ket iti kasta kabaelandanton ti gumatang iti orihinal a DVD.

Ta pudno a nangina ti orihinal a DVD. No dinto pay kabaelan ni Secretary Ronaldo Llamas, ti political adviser ni Presidente Noynoy Aquino, ti gumatang iti orihinal a DVD, isu a gimmatang met kadagiti pirata a DVD nga agpateg iti P2,000, siakto la ketdin a ti laengen sangkabassit a pensionko a kas retirado a polis ti mabalinko nga ipangpangas? Kas man la mangmangngegko a kunkuna ni Secretary Llamas kadagiti babaknang a makabael a gumatang iti orihinal a DVD: “Apay, dakayo la kadin ti adda karbenganna nga agbuya iti DVD?”

--LEONARDO S. FAGARAGAN
Caloocan City

(Naipablaak iti Bannawag, Pebrero 13, 2012 a bilang.)