TALLO kadagiti National Artists for Literature ti Filipinas ti mangparungbo iti maangay itoy a tawen a Taboan, ti tinawen a komperensia dagiti mannurat nga idadauluan ti National Commission for Culture and the Arts (NCCA).
Kaduaen da Gameng ti Pagilian (National Artists) F. Sionil Jose (Ilokano a tubo iti Pangasinan ken Ilocos Sur), Virgilio Almario, ken Bienvenido Lumbera dagiti mannaniw, playwrights, piksionista ken nobelista manipud kadagiti nadumaduma a paset ti pagilian nga agtitipon iti Fontana Leisure Park, Clark, Pampanga manipud itoy a Pebrero 9 agingga iti 2012 para iti panagsisinnukat iti kapampanunotan maipanggep iti literatura malaksid a pakaangayan pay ti book bazaar, ken, iti umuna a gundaway iti pakasaritaan ti Taboan, ti pannakaangay ti maysa a food-and-culture tour.
Ni Almario ti mangwarwar iti tema ti komperensia a “Rizal and the Filipino Imagination”a pangamirisanna ken ni Rizal a kas mannurat ken cultural icon ken no kasano nga inimpluensiaanna dagiti mannurat ken artists a Filipino.
Tamingen met da Jose ken Lumbera ti patangan no kasano a ti literatura manipud iti Tengnga a Luzon, yanninawna ti koneksion ti heograpia ken produksion agrikultural ti rehion iti atiddog ken namaris a historia daytoy.
Iti tallo-nga-aldaw a komperensia, pagpapatanganto dagiti mannurat, ubbing ken nataengan, manipud kadagiti nadumaduma a paset ti pagilian, dagiti nadumaduma a topiko a pakairamanan ti no ania dagiti ar-aramiden ken pampanunoten dagiti mannurat nga agtawen iti nababbaba ngem 35 ken no kasano ti panangkitada iti bagida a maibiang ken ni Rizal ken iti pagilian; kritisismo iti literatura ken dagiti istandard iti literatura, piksion historikal (wenno literatura ken ti lagip ti sangkailian), dagiti literatura manipud kadagiti rehion, panangisuro iti literatura, ti panagsurat a kas propesion, ti literatura ken ti baro a media, tradisional a teksto iti kontemporario a panawen, ken dadduma pay.
Malaksid itoy a kangrunaan a pasken iti Pampanga, adda pay dagiti pasken a mainaig met laeng iti Taboan a maangay kadagiti nadumaduma a paset ti pagilian.
• Panagbenga: Baguio Poetry Reading for Arts Month 2012
• Ilocano Oral Reading Competition iti Ilocos Norte
• Edith/Kerima: A Tribute-Exhibit of the Lives & Works of Two Icons of Philippine Literature iti UP Diliman
• Maysa a pasken a pagtinnulongan nga isayangkat ti Taboan 2012 ken ti Ateneo de Manila University
• Pintakasi kan Literaturang Bikolnon: An Ikaduwang Kabtang (Peb. 16-17)
• Katig han Sinirangan Bisayas: Peb. 3
• Taboan 2012 Satellite Activity iti Tagbilaran, Bohol, Peb. 24
• Performance Poetry iti Bacolod City, Peb. 23-24
• A Performance Poetry of Traditional Poetry iti Central ken Northern Mindanao
• Consechas: A Harvest of Poems and Stories from Western Mindanao, Peb. 18-19
Ti Taboan ti maysa kadagiti pito a kangrunaan a proyekto ti NCCA para iti Philippine Arts Festival (PAF) a maang-angay iti kada Pebrero a kas pangrambak iti National Arts Month a kas mayayon iti Presidential Proclamation No. 683 a napirmaan idi 1991.
Maysa a daan a balikas a Cebuano ti “taboan” a kayatna a sawen, “dapon” wenno “tiendaan.” Iti pannakaaramatna iti literatura, maysa daytoy a “pagdadaponan” wenno “pagsisinnukatan iti kapampanunotan.”
Iti agdama, ipanguluan da Felipe de Leon Jr. ken Adelina Suemith ti NCCA kas chairman ken OIC-executive director, kas panagsaganadda. –O
Dagiti ladawan, agpababa: National Artists Virgilio Almario, Bienvenido Lumbera, ken Francisco Sionil Jose.
(Naipablaak iti Bannawag, Pebrero 13, 2012 a bilang.)
No comments:
Post a Comment