NO kas ken ni Shamcey Supsup ti makagapu, nakasaganakami a mangbaliw iti relihionmi tapno laeng makadennami iti agnanayon.
Daytoy ti angawmi kadagiti kakaarrubami kalpasan a nangngeganmi ti sungbatna iti saludsod kenkuana iti salip ti 60th Miss Universe a naangay idi Setiembre 13 (oras iti Filipinas) iti Credicard Hall iti Sau Paolo, Brazil.
Sinaludsod ni Vivica A. Fox a maysa kadagiti hurado: "Would you change your religious beliefs to marry the person that you love? Why or why not?"
Insungbat ni Shamcey, ti sikokorona a Bb. Pilipinas Universe, "If I had to change my religious beliefs, I would not marry the person that I love because the first person I love is God, who created me. I have my faith and my principles, and this is what makes me who I am. And if that person loves me, he should love my God, too."
Nupay nalabit, ninamnama ti lubong a makitada ti sungbat a mangipasimudaag iti panangabrasa kadagiti nagduduma a relihion ta iti kinapudnona, maymaysa met laeng ti Dios, ipakita daytoy sungbat ni Shamcey ti naidumduma a kinapudnona iti nariinganna a pammati, wenno panangipasimudaag nga asino man nga agayat iti maysa a tao, rebbengna a nakasagana a mangabrasa iti pakabuklan dayta a tao.
Nayalat ni Shamcey ti 3rd Runner-up wenno maikapat manipud kadagiti 89 a nagsasalip nga agkakapintas a dayag iti sangalubongan.
Naisangsangayan daytan a balligi. Ket kas maysa a Filipino, ipagtangsittayo ti maysa manen a dayag a malaksid iti kinalasbangna, naparaburan met iti naidumduma a kinasirib.
Kinalasbang ken Kinasirib
Naipasngay ni Shamcey idi Mayo 16, 1986. Idi agtawen iti tallo, immakar ti pamiliana iti General Santos City nga isu met laeng ti lugar a dimmakkelan dagiti nalalatak a boksingero a Manny "Pacman" Pacquiao ken Nonito Donaire, Jr.
Balasang ti away ni Shamcey. Gapu ta maysa nga inheniera ti inana a ni Marcey ket adda iti abrod ken bugbugtong pay nga inanak, indakdakkel ni Shamcey ti nangtultulong ken ni tatangna a Timoteo kadagiti obra iti talon karaman ditan ti panagpakan kadagiti manok ken panagpastor iti kalding.
Masirib nga ubing ni Shamcey. Pagaayatna ti agbasa kadagiti libro. Isuna ti balediktorian iti elementaria idinto a salutatorian iti panagturposna iti haiskul iti Makati High School.
Nagturpos a magna cum laude iti Unibersidad ti Filipinas iti Diliman ken isuna ti nakaala iti kangatuan a promedio iti 2010 Architect Licensure Examination.
Mamati ni Shamcey nga adda met dagiti nabiag kadagiti sabsabali a planeta (nalabit iti sabali nga uniberso). Kinunana pay a nakaiparsuaan nga adda bentahe dagiti babbai kadagit lallaki gapu iti kinasidap ti panagriknada (intuition).
Ket no met maysa isuna nga ayup, kayatna a maysa koma a tumatayab tapno makapagampayag ken makitana dagiti kabambantayan.
Nalapsat ti Nangisit
Iti sabali a bangir, inyalat ni Leila Lopes iti Angola ti korona a Miss Universe 2011. Iti pakasaritaan ti salip, ni Leila ti maikapat a nangisit a balasang a nangyalat iti titulo ti kapintasan a babai iti sangalubongan.
Kas paset ti sungbatna, kuna ni Leila nga awan a pulos ti kayatna a suktan iti kinataona. Ken mamati met nga iti agdama a panawen, awanen ti lugar para kadagiti racist wenno kadagiti tattao a mangilangi iti padada a tao gapu ta nangisit daytoy wenno no naggapu iti pagilian wenno puli a maibilang a nababbaba ngem kadagiti sabali a pagilian wenno puli.
Inyalat met ni Olesia Stefanko iti Ukraine ti 1st Runner-up idinto a ni Priscila Machado iti Brazil ti nangkaw-id iti 2nd Runner-up.
Ni met Miss China Zilin Luo ti 4th Runner-up.
Inyangaw manen dagiti kakaarruabami: “Uray ta inatiwtayo ti China. Mabalinen nga alaen dagiti Insik ti Spratlys.”
Siempre, angaw dayta. Ngem kaipapananna ti kinapateg ti salisal a nangatiwan ni Shamcey Supsup, maysa a Filipina, iti maysa a taga-China, ken kadagiti 85 pay a sabsabali a dayag iti sangalubongan.
(Naipablaak iti Bannawag, Oktubre 3, 2011, panid 24-25.)
No comments:
Post a Comment