OKTUBRE 9, 2017

SARITA

 4 Ni Manong Gunding
    Estela A. Bisquera-Guerrero
12 Ti Kuentas ni Dante
      Reynaldo A. Duque

NOBELA
8 Oplan Maharlika (39)
    Norberto D. Bumanglag, Jr.
10 Yuri (7)
    Virginia A. Duldulao

DANIW
6 Adda Buli a Mangsalbag
   Ariel S. Tabag
47 Daniw a Para Ubbing
    Marlyn Garcia-Del Rosario

SALAYSAY
16 Iti Narvacan, Ilocos Sur: No Umayka Ditoy, Pangipasiarak Kenka?
      Eliseo B. Contillo
26 Dagiti Balud iti ISPJ: Nagbalindan a Pagwadan a Mannalon
     Reynaldo E. Andres

KOMIKS
35 Sweet Jazmine (56)
38 Don Clavio de Ylocos (59)
41 Miks & Tiks

KOLUM
15 Kastoy, Kapid, Ditoy Hawaii
21 Saludsodem ken ni Apo Hues
24 Padasem Daytoy, Kailian
28 Okeyka, Apong
30 Tips
31 Ading Kosinera

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
11 Netizone
14 Biag ni Ilokano
19 Siled ti Kararag
20 Pagannurotan ti Salip iti Sarita ti 20th AMMAFLA
22 Iti Pagadalan: Allukoyen Dagiti Ubbing a Mangipateg iti Musika
23 Ti Tarakenmo ken Sika
29 Idi Un-unana a Panawen
32 Ammuem Pay Dagitoy
33 Haytek!
34 Panangimaton iti Pagtaengan
43 Ti Gasatmo Ita a Lawas
46 Dagiti Pabula ni Aesop

Rambutan ti Salcedo

RAMBUTAN TI SALCEDO. Isagsagana da Flor Cudiamat Peralta ken ti kaduana dagiti bunga ti rambutan a nakasagana a mailako. Agdagup iti 150 a kilo, naburas dagitoy iti farm da Nepo T. Benitez, Jr. iti Salcedo, Ilocos Sur. Mailako daytoy iti P55 ti maysa a kilo agbatay iti baraytina. Adu pay dagiti bunga ti rambutan a di naburas iti nasurok a dua nga ektaria a namulaan iti nadumaduma a kayo nga agbunga a kas iti durian, lansones, dragon fruit, mangosteen, kdp. Ni Renato Taqueban, Sr., uliteg ni Nepo ti mangtartaripato iti farm manipud idi pimmusay ni Felipe Taqueban a lelongna idi 2015. Daydi Lelong Felipe ti nangirugi iti nasao a farm. Para kadagiti interesado a mangbisita iti farm, ag-text wenno awagan ti selpon bilang 0918-582-9231.


(Naipablaak iti Bannawag, Oktubre 2, 2017 a bilang.)

Ad-adu koma a babbai ti papili iti eleksion ti barangay-- COMELEC

Iti pannakayeskediul ti panagipila iti Certificates of Candidacy (COCs) mangrugi iti Oktubre 5 agingga iti 11 para iti Eleksion ti Barangay ken Sangguniang Kabataan (SK), ginutigot ti Commission on Elections (COMELEC) dagiti babbai nga ad-adu koma kadakuada ti makipartisipar iti eleksion a maangay inton Oktubre 23, 2017.

Kas kuna ni James Jimenez a pannakangiwat ti COMELEC, karkarna a nupay ad-adu dagiti botante a babbai ngem dagiti lallaii, sumagmamano laeng a babbai ti agkankandidato.

Maibatay iti rekord ti COMELEC Education and Information Department iti Enero 2017, adda 29,155,415 a babbai a botante nga agtawen iti 18 anios agingga ti 60 anios ken natataeng, idinto a 27, 453,928 laeng dagiti botante a lallaki iti isu met laeng a ragup ti edad.

Ngarud, iti umadani nga Eleksion iti Barangay, ginutigot ni Jimenez nga agipila koma iti kandidatura ti ad-adu a babai a mangrugi iti daytoy Oktubre 5.

Innayon ni Jimenez a panawenen ti ad-adda a panangibayog dagiti babbai iti grupoda ket makipartisiparda iti eleksion nangruna iti agpang ti barangay— ti agpang a napateg ti paset dagiti babbai nangruna ta kadagiti barangay a marisrisut ti apa wenno riri dagiti agkakaarruba.

Iti Eleksion iti Barangay iti 2013, iti 94, 834 a kandidato iti takem a Punong Barangay (wenno Kapitan), 17, 776 laeng wenno 18.74 porsiento ti babbai.

Sakbayna, nayiskediul a mangrugi ti panagidatag iti COC mangrugi iti Septiembre 23 agingga iti 30 ngem nayalud-od daytoy manipud iti Oktubre 5 agingga iti 11 ken nayalud-od met ti panawen ti eleksion (election period) iti Oktubre 1 agingga iti 30 manipud iti orihinal a Septiembre 23 agingga iti 30.


(Naipablaak iti Bannawag, Oktubre 2, 2017 a bilang.)

4-aldaw a panagtrabaho iti kada lawas, okey iti Kamara

Inaprobaran ti Kamara (House of Representatives) itay lawasna iti maikatlo ken maudi a pannakaibasana ti gakat a mangipalubos kadagiti kompania ken empleado a mamagbalin iti regular a a panagtrabaho iti makalawas a di nakurkurang ngem 4 nga aldaw.

Palubosan ti House Bill 6152 dagiti empleado nga agtrabaho iti nasursurok ngem 8 oras ngem iti laeng 4 wenno 5 nga aldaw iti tunggal lawas. Apaman a nasursurok ngem 48 nga oras ti panagtrabaho ti empleado iti kada lawas, rumbeng a mabayadan iti overtime a panagtrabaho.

Saan ketdi nga inkapilitan kadagiti employer daytoy napakessen nga aldaw ti panagtrabaho.

Ti HB 5068 nga orihinal a gakat nga impila ni Diputado ti Baguio City Mark Go, amendaranna dagiti artikulo iti Labor Code maipapan iti normal nga oras ti panagtrabaho, overtime a panagtrabaho, ken aldaw ti panaginana. Iti agdama a Labor Code, innem ti kaaduan nga aldaw ti panagtrabaho iti kada lawas.

Inlawlawag pay ni Go a no kayat ti empleado ti agtrabaho iti 4 nga aldaw iti kada lawas, masapul nga agtrabaho daytoy iti 12 oras iti kada aldaw.

Ibilin pay ti gakat nga adda aldaw ti panaginana a di nababbaba ngem 48 oras agingga iti 72 oras, no bilang maaprobaran ti pannakaikabassit ti aldaw a panagtrabaho.

Segun pay ken ni Go, panggep ti gakat a mapalukay ti oras dagiti employer ken empleado tapno maibagay kadagiti kasapulan ti negosio ken iti balansiado a biag ti empleado a mabingbingay iti orasna iti trabaho ken iti pamilia wenno personal a biagna.

Iti innuman iti prensa, kinuna ni Go a maidatagen ti gakat iti Senado. Kasapulan ti nasao a gakat ti kapadana a gakat a maaprobaran iti Senado tapno agbalin daytoy a linteg.


(Naipablaak iti Bannawag, Oktubre 2, 2017 a bilang.)

Translator’s Prize ti NCCA, silulukat agingga iti Okt. 31

Ipakpakaammo ti National Commission for Culture and the Arts (NCCA) nga agawat pay laeng iti entry a para iti Translator’s Prize agingga iti Oktubre 31, 2017.

Maawagan iti “Gawad Rolando Tinio sa Pagsasalin,” silulukat ti award kadagiti amin a Filipino citizen nga addan iti umno nga edad.

Panggep ti Translator’s Prize ti agummong kadagiti manuskrito dagiti sinurat iti nadumaduma a porma ti literatura a naipatarus iti Filipino, kas sungbat iti panggep ti NCCA a mangpadur-as ken mangisaknap iti programa iti panagipatarus; iti kasta, maikkan dagiti Filipino iti gundaway a makabasa iti gapuanan dagiti mannurat a Filipino ken uray pay dagiti napili a gapuanan dagiti ganggannaet a mannurat.

Para itoy a tawen, silulukat ti panagipatarus iti tallo a kategoria: epiko, ababa a sarita, ken daniw.

Adda nailatang a P250,000.00 a maited iti pakaipaayan ti Translator’s Prize a kas tulong iti panagtrabaho ti translator iti uneg ti makatawen.

Ti National Committee on Language and Translation ti NCCA iti babaen ti Subcommission on Cultural Dissemination ti mangimaton iti Translator’s Prize.

Para iti kompleto a pagannurotan, mabalin ti umawag iti Cultural Dissemination Section iti telepono bilang (02) 527-2192 ket sapulen ni Corinnah Anne Olazo.


(Naipablaak iti Oktubre 2, 2017 a bilang.)

Palagip iti Maika-2 a Salip iti Sarita ti Albalos Awards

Maipalagip nga aggibus ti Maika-2 a Salip iti Sarita ti Mario Abinsay Albalos Foundation Literary Awards iti Pebrero 15, 2018.

Naluktan daytoy maika-2 nga edision ti salip idi Hulio.

Nabangon ti literary foundation a naipanagan iti daydi Dios-ti-aluadna a mannurat ti Bannawag Mario A. Albalos, tubo iti Cabaroan Daya, Siudad ti Vigan, napadayawan a Pedro Bukaneg awardee ken umuna a Thomas Jefferson awardee iti Estado ti Hawaii a nagnanaedanna agingga iti pimmusay idi Marso 3, 1991 iti edadna a 40.

Isponsoran ni Jenny Alcausin (agnanaed iti California) ti pasalip ti foundation ken agpaay met a mangimaton iti nasao a pasalip da Amado I. Yoro, Jun Abinsay, Priscilla Dela Cruz (agnanaed iti Hawaii) iti pannakitinnulong dagiti kameng ti Bannawag.

Ti kompleto a pagannurotan:

1. Narugian ti salip idi Hulio 1, 2017 ken agpatingga iti Pebrero 15, 2018.

2. Silulukat ti salip kadagiti amin a mannurat iti Ilokano malaksid kadagiti mangimaton ken asideg a kakabagianda, ken kadagiti kameng ti Bannawag.

3. Maysa laeng a sarita ti mabalin nga isalip ti tunggal mannurat a makisalip.

4. Nasken nga orihinal, di pay naipablaak wenno naadaw iti ania man a sinurat ti isalip. Nasken met a saan a naipatarus ti pakisalip manipud iti sabali a lengguahe ken nasken a bukod a putar ti autor ti pakisalipna. Saan met a maawat ti sarita a naisalip idin iti Albalos Awards wenno iti sabsabali pay a salip iti panagsurat iti sarita ken ti sarita a naidatag pay a kas entry iti sabali pay a salip iti panawen a pannakaangay daytoy a pasalip ti Albalos Awards nga agpaut manipud iti pannakalukat daytoy a salip agingga iti pannakapadayaw dagiti mannurat a nangabak iti daytoy a salip.

5. Agatiddog ti pakisalip iti 12-20 a panid iti short bond paper, nai-computer (agusar iti Times New Roman, Font Size 12) iti doble espasio ken addaan iti maysa a pulgada a margin iti amin nga igid ti bondpaper. Masapul met nga agusar iti MS Word format.

6. Ti parbo a nagan ti autor ti agparang a naganna a kas autor ti sarita. Ipatulod ti pakisalip iti uppat a nadalus a kopia ken mapakuyogan iti narikpan a sobre a naglaon iti pudno ken parbo a nagan ti autor, paulo ti pakisalip, kaudian a ladawan ken ababa a pakasaritaan ti biag ti autor, adres ti agdama a pagnaedan, agraman email address ken numero ti selpon wenno telepono a mabalin a pakakontakan iti autor. Iti rabaw ti sobre, isurat ti paulo ti sarita ken parbo a nagan ti autor.

7. Ipatulod ti pakisalip babaen ti koreo wenno personal nga idatag iti daytoy nga adres: 2nd Short Story Writing Contest, Mario Abinsay Albalos Foundation Literary Awards c/o Bannawag, Manila Bulletin Publishing Corp., Muralla corner Recoletos Sts., Intramuros, 1002 Manila. Nasken a maawat ti Bannawag ti pakisalip iti di naladladaw ngem iti Pebrero 15, 2018. Saan a mairaman iti salip ti entry a maawat kalpasan dayta a petsa. Ipatulod met ti soft copy ti sarita iti daytoy nga e-mail address: albalosawards@gmail.com.

8. Dagiti gunggona: Umuna a Gunggona, P15,000.00; Maikadua, P12,00.00; ken Maikatlo, P10,000.00. Maipaayan pay dagiti mangabak iti sertipiko ti pammadayaw malaksid iti medalion a maited iti mangyalat iti Umuna a Gunggona. Adda met karbengan dagiti hurado a mangkissay iti bilang dagiti mangabak no awan ti makapatar iti bukodda a pagbatayan dagiti mangabak. Mabalinda met ti mangparnuay iti nayon wenno sabali a gunggona, no kasapulan.

9. Saan a mabalusingsing ti pangngeddeng dagiti hurado malaksid no maduktalan a nasalungasing ti Pagannurotan Bilang 4. No kasta, mapukawto metten ti karbengan ti autor a makisalip pay kadagiti sumarsaruno a pasalip ti Albalos Awards.

10. Makipagtagikua ti Mario Abinsay Albalos Foundation Literary Awards kadagiti mangabak a sarita nupay adda latta karbengan dagiti autor iti copyright dagitoy. Maaddaan pay ti agpasalip iti karbengan a mangipablaak kadagiti mangabak a sarita iti ania man a wagas a kayatna nga aramaten.

11. Mapakaammuanto dagiti mangabak no kaano ken no sadino a maangay ti seremonia ti pammadayaw.


(Naipablaak iti Oktubre 2, 2017 a bilang ti Bannawag.)

Diak Met Mabasa, Apo!

Adda kadi reklamom iti ginatangmo a kopia ti Bannawag? Saan a napintas ti pannakagettengna? Adu ti milatna? Wenno ania pay a rason a pakaigapuan nga adda dimo mabasa a pasetna a kas koma ti paboritom pay met a kolum, nobela wenno komiks?

Isublim ti ginatangmo a kopia iti aglaklako iti Bannawag ket kiddawem kenkuana nga ag-text wenno awaganna ti Circulation Department tapno masuktan dayta kopiam. Maipatulodto ti kopiam iti nanggatangam ket maitedto kenka.

Wenno no kayatmo, mabalin payen a sika ti agtext/umawag iti Circulation Department bayat ti kaaddam iti puesto ti nanggatangam iti kopiam.

Para iti ania man a reklamo a mainaig iti pisikal a langa ti magasin, awagan wenno patulodan iti text ni Apo Boy Balanag ti Circulation Dept. (Ilokano a tubo iti Abra) iti selpon bilang 0925-678-7870 wenno asino man a kameng ti Circulation Dept., tel. 02-5278121 (kiddawen iti Operator nga ikonektarnakayo iti Circulation Dept.).