Gawad Pambansang Alagad ni Balagtas

NAIPAAY ken ni Fernando B. Sanchez (maikadua iti kanigid), mannurat iti Bannawag, ti Gawad Pambansang Alagad ni Balagtas para iti Piksion iti Ilokano a kas pammadayaw iti naisangsangayan a gapuananna iti literatura dagiti Ilokano, kasta metten iti pagilian. Impaay ti Unyon ng mga Manunulat sa Pilipinas (UMPIL) itay Agosto 25, 2012 iti Silangan Hall iti Cultural Center of the Philippines, daytoy ti kangatuan a pammadayaw nga ipapaay ti nasao a gunglo dagiti mabigbig a mannurat iti Filipinas kadagiti mannurat a Filipino. Kakadua ni Sanchez iti ladawan dagiti padana a naipaayan iti pammadayaw, da (agpakanawan): Benito Tan (Daniw iti Chinese), Chris Millado (Drama iti Filipino), Rosario Cruz Lucero (Piksion iti Ingles), ken Rofel Brion (Daniw iti Filipino). Di nairaman iti ladawan ni Juan Rafael Belgica, Jr. (Daniw ken Piksion iti Bikol).

(Naipablaak iti Bannawag, Septiembre 10, 2012 a bilang.)

UMPIL Awardee

UMPIL AWARDEE. Ni Crisostomo “Cris” M. Ilustre, mannurat iti Bannawag, iti panangipaay kenkuana ti Unyon ng mga Manunulat sa Pilipinas (UMPIL) iti 2011 Gawad Pambansang Alagad ni Balagtas (Iluko fiction), kangatuan a pammadayaw a maipaay ti UMPIL iti asino man a mannurat a dakkel ti naitulongna iti pannakasaluad ken panagrangpaya ti literatura iti Filipinas. Iti ladawan, karaman ni Apo Ilustre (adda iti batog a mismo ti screen) dagiti padana nga awardee ken dagiti opisial ti UMPIL. Iti ladawan iti baba, kaduana ti kaingungotna, ni Clarita; ken ni kaanakanna a Jane Flores ken ti anak daytoy a ni Jeiraldine Shayne. Naangay ti pammadayaw a seremonia idi Agosto 27 iti Unibersidad ti Filipinas, Diliman, Q.C.

Naipablaak iti Bannawag, Setiembre 12, 2011 a bilang

Dua a mabigbig nga Ilokano a mannurat, padayawan ti UMPIL inton Agosto 27

Dua a mararaem a mannurat nga Ilokano, da Crisostomo M. Ilustre ti La Union ken Herminio S. Beltran Jr. ti Pangasinan, ti karaman kadagiti innem a mannurat a maipaayan iti Gawad Pambansang Alagad ni Balagtas manipud iti Unyon ng mga Manunulat sa Pilipinas (UMPIL) gapu iti naisangsangayan a naaramidanda iti tay-ak ti literatura iti pagilian. Para iti Piksion iti Iluko ken ni Ilustre; Daniw iti Tagalog met ken ni Beltran.

Mannurat iti makapakatawa a sarita, mabigbig pay ni Ilustre a kas “Ama ti Drama iti Radio iti Iluko”. Isu met laeng ti akinputar iti nalatak agingga ita a radio drama a “Doming, Doming Mabalin Amin”.

Mabigbig met a mannaniw iti Tagalog ni Beltran, malaksid a maibilang met kadagiti mabigbig a mannaniw iti bukodna a pagsasao nga Iluko.

Maipaay ti nasao a pammadayaw bayat ti maikatlo nga aldaw ti UMPIL Pambansang Kumperensiya nga addaan iti tema a “Si Jose Rizal Bilang Manunulat” a maangay iti Agosto 25-27, 2011 iti Pulungang Recto, Bulwagang Rizal, Unibersidad ti Filipinas, Diliman, Quezon City.

Malaksid iti pannakapadayaw dagiti nasao a mannurat, tampok iti umuna a dua nga aldaw ti nasao a komperensia ti panagsarita dagiti mabigbigbig nga autoridad iti literatura, historia, ken lengguahe.

Malaksid iti nasao a pammadayaw, ipaay pay ti UMPIL ti Gawad Pedro Bucaneg kadagiti naisangsangayan a gunglo a mainaig iti literatura ken Gawad Paz Marquez Benitez para kadagiti naisangsangayan ti gapuananda a mannursuro iti literatura.

Yendorso ti Commission on Higher Education (CHED) ken Department of Education (DepEd) ti nasao a komperensia. Para kadagiti interesado a dumar-ay, umawag ken ni Eva Cadiz (02) 922-1830 wenno ken ni Eilene Narvaez (02) 924-4747; wenno ag-email iti umpil2011@yahoo.com.

(Naipablaak iti Bannawag, Agosto 15, 2011 a bilang.)