Tulong ti publiko vs. rinuker a polis, kiniddaw ti Napolcom

Kiniddaw ti National Police Commission (Napolcom) itay lawasna iti publiko a tumulong koma daytoy iti pannakapatapuak dagiti rinuker a kameng ti Philippine National Police (PNP) babaen ti pannakayuli iti umisu a reklamo iti komision.

Impanamnama ni Napolcom Vice-Chairman ken Executive Officer Eduardo Escueta nga ipangrunada ti pannakadusa dagiti rinuker a polis iti pagilian, nangruna kadagiti addaanen iti sangsanguen a reklamo.

Impakaammo ni Escueta daytoy bayat ti maika-46 nga anibersario ti komision idinto a sinangona ti baro a kontrobersia iti polisia gapu iti pannakaireklamo ti dua a polis iti Quezon City Police District (QCPD) a nagpanggep a nangdelihensia wenno nangkotong iti putot ni National Capital Region Poice Office (NCRPO) director, Chief Supt. Leonardo Espina.

Kinuna pay ni Escueta a rebbengna laeng a papigsaen ti Napolcom ti sistema ti panagrekrut kadagiti baro a polis, ken binalakadanna ti PNP nga adalenda dagiti baro a wagas iti panagsanay kadagiti baro a polis tapno saan a mayaw-awan iti dana dagitoy agingga a mairamanda kadagiti illegal nga aramid.

Iti laksid daytoy, impatalged ni Escueta a dakkel a porsiento latta dagiti polis ti nasingpet ken napudno a mangipatpatungpal iti sinapataanda nga akem a “to serve and to protect.”

Kinapudnona, tallo a polis ti naipaayan iti PNP Gallantry Award kalpasan nga insugalda ti biagda kontra kadagiti kriminal iti nagduduma nga insidente.

Napadayawan da PO2 Dario Paragas ti Pangasinan Police Provincial Office; PO1 Roel Ortega ti Police Regional Office 13; ken PO2 Ricky Lademora ti Sipalay Office iti Negros Occidental.

(Naipablaak iti Bannawag, Septiembre 24, 2012 a bilang.)

Armas Dagiti Politiko iti Abra, Naisuko

ARMAS DAGITI POLITIKO ITI ABRA, NAISUKO. In-inspeksionen ni Police Director-General Nicanor Bartolome ti maysa kadagiti 40 a lisensiado a nangangato ti kalibrena a paltog ti 16 a politiko iti Abra tapno maidulinda pay laeng kas sungbat iti kampania ti polisia a pannakaangay ti naurnos ken natalinaay nga eleksion iti 2013. Naangay ti pannakaipaima dagiti nasao a paltog itay lawasna iti Camp Juan Villamor, Bangued, Abra. (Rizaldy Comanda)

(Naipablaak iti Bannawag, Hulio 30, 2012 a bilang.)

Dusa a bitay, ginuduana ti Kamara

Ti panggep a pannakaisubli ti dusa a bitay, ginuduana dagiti kameng ti Kamara idinto a sipapardas met dagiti kameng ti Senado a nangkontra iti daytoy a panggep.

Nairiing ti gandat a pannakaisubli ti nasao a dusa, babaen ken ni Philippine National Police (PNP) Director General Nicanor Bartolome, kalpasan ti panangserrek ti sumagmamano nga armado a lallaki iti Robinson’s Galleria iti nagbebedngan ti Quezon City, Mandaluyong City ken Pasig City idi Marso 21 a nagtakawan ken nakapatayanda iti maysa a security guard ken nakasugatanda iti sumagmamano a tattao gapu iti imbatoda a granada bayat ti panaglibasda.

“Rumbeng laeng a maisubli ti dusa a bitay ta agparparang nga awanen ti panagraem dagiti kriminal kadagiti polis kas ipaneknek ti panagtakaw a naaramid pay iti aldaw ken iti sango a mismo ti adu a tattao,” kinuna ni Senior Deputy Majority Leader Rep. Janette Garin ti Iloilo.

Naibabawi ti dusa a bitay iti Filipinas idi Hunio 24, 2006—tignay a dinaydayaw ti internasional a komunidad kangrunaanna ti European Community ken ti Batikano.

Mairaman kadagiti nangpabor iti dusa a bitay da Maguindano Rep. Simeon Datumanong, dagit a Justice Secretary, ken Citizens’ Battle Against Corruption (CIBAC) party-list Rep. Cinchona Cruz-Gonzales.

Iti met biang ni Cavite Rep. Joseph Emilio Abaya, chairman ti Committee on Appropriations, kinunana a saan a ti dusa a bitay ti manglapped kadagiti krimen.

(Naipablaak iti Bannawag, Abril 16, 2012 a bilang.)

Top Most Wanted iti Rehion I, natiliw

Balligi ti kampania kontra iti kriminalidad nga isaysayangkat ti Ilocos Sur Philippine National Police Office (ISUPPO) nga idadauluan ni Senior Supt. Reynante G. Partible.

Natiliw itay Agosto 27, 2011 ni Benson Alviento Y Sudario, 38, tubo ti Candon City ken dadaulo ti maysa a grupo ti sindikato nga agdakdakiwas iti Ilocos Sur ken kabangibang a probinsia. Nangilatang ti Department of Interior and Local Government (DILG) iti P250,000 para iti pannakatiliw ti suspek.

Natiliw ni Alviento babaen ti panangidaulo ni Chief Insp. Arbel Mercullo, hepe ti Criminial Investigation Detection Team ti ISUPPO a nakabase iti Camp Pres. Elpidio Quirino, Bulag, Bantay, Ilocos Sur/ISPPSC, Candon City PS, Maria Aurora MPS, ken Aurora CIDT.

Nakemmeg ti suspek iti Barangay Punglo, Maria Aurora, Aurora a nabayag a naglemmengan daytoy.

Wanted iti nadumaduma a kaso ni Alviento pakairamanan ti Double Murder Aggravated by the Use of Illegally Possessed Firearm ket addaan iti mandamiento de aresto nga imapulog ni Judge Gabino Balbin ti RTC Candon City.

Nakabalud ita ti suspek iti CIDT Detention Center iti ISUPPO.

Ti pannakatiliw ni Alviento ket nairaman iti flagship Project ti CIDG nga Oplan PAGTUGIS (campaign against wanted persons) ken Oplan SALIKOP (Campaign against syndicated/organized crime group).

Naipablaak iti Bannawag, Setiembre 12, 2011 a bilang

2-star rank para ken ni Pagdilao ti Phil. Nat’l Police

Naital-o itay lawasna iti 2-star rank (Director) ni dati a Philippine National Police (PNP) spokesman ken agdama a hepe ti Criminal Investigation and Detection Group (CIDG) Samuel D. Pagdilao, Jr.

Kameng ti Philippine Military Academy (PMA) Class 1979, tubo iti Pinili, Ilocos Norte ni Pagdilao, ken anak ni retirado nga Army Col. Samuel Pagdilao, Sr., agdama a mayor ti Pinili, I.N.

Kadua ni Pagdilao ti dua pay a top official ti PNP a naital-o a Director, da Chief Superintendent Alan Purisima, hepe ti National Capital Region Police Office (NCRPO) ken kameng ti PMA Class 1981, ken Chief Superintendent Emil Sarmiento, commander ti Civil Security Group (CSG).

Malaksid kadagiti tallo, sabali pay a PNP official, ti maikadua a kangatuan nga opisial ti CARAGA regional police, ni Raul Basilio, ti timmipon metten iti listaan dagiti police general kalpasan ti pannakaital-ona iti one-star rank (Chief Superintendent).

Naangay ti seremonia iti pannakaital-o dagiti uppat nga opisial ti PNP iti Kampo Crame itay Hulio 11 a pormal a nangipakaammuan ni Director General Raul Bacalzo, PNP Chief, iti panangaprobar ni Presidente Aquino iti pannakaital-o dagitoy.

(Bannawag, Hulio 25, 2011.)