Dinutokan itay nabiit ni Presidente Aquino ni retirado a Supreme Court Associate Justice Conchita Carpio Morales a kas baro nga Ombudsman ti Filipinas.
Ni Morales, tubo iti Paoay, Ilocos Norte, a namagsapata ken ni Aquino a presidente idi Hunio 30, 2010, ti mangsukat ken ni Merceditas Gutierrez a naglusulos idi Abril.
“Babaen iti baro nga Ombudsman, maaddaantayo iti opisina nga awan at-attananna a manglaban iti korupsion iti gobierno. Mangnamnamaak nga itoy a tawen, makayulitayo iti darum kontra kadagiti managkunniber ken pasurotda,” kinuna ni Aquino iti pananginaganna ken ni Morales a kas baro nga Ombudsman bayat ti maikadua nga State-of-the-Nation Address daytoy itay Hulio 25.
Nabangon ti Ombudsman a mangsiput iti ar-aramiden dagiti opisial ken empleado ti gobierno tapno iti kasta, manamnama a maserbianda a nasayaat dagiti umili.
Mailadladawan pay ti Ombudsman a kas “salaknib dagiti umili”.
(Naipablaak iti Bannawag, Agosto 8, 2011 a bilang.)
