Nangina a presio ti bagas, agbayag agingga iti Oktubre

Gapu ta maibilang a kagawatna ti Hunio agingga iti Setiembre gapu ta awan ti adu nga apit a pagay, agtalinaed a nangina ti bagas kadagiti tiendaan agingga iti Oktubre itoy a tawen.

Kinuna ni National Food Authority (NFA) Administrator Special Assistant Atty. Gilbert Lauenco a nupay nangina ti bagas kadagiti tiendaan, nagtalinaed met nga umdas ti suplay daytoy agingga iti agtapos ti Setiembre, malaksid laeng no adda napigsa a bagyo a mabalin a mangdadael kadagiti pinagayan.

Malaksid kadagiti nakapempen a bagas iti bodega ti NFA a manamnama nga agbayag iti 80 aldaw, kinuna ni Lauenco nga umdas met dagiti NFA rice nga ideldeliber ti NFA kadagiti autorisado a dealer.

(Naipablaak iti Bannawag, Hulio 16, 2012 a bilang.)

Umdas a bagas, sigurado a magun-od

Impasingked ni National Irrigation Administration (NIA) Administrator Antonio Nangel a matungpal amin a proyekto a binalabala ti Department of Agriculture (DA) ken NIA sakbay a bumaba iti puesto ni Presidente Benigno S. Aquino III inton 2016.

Segun ken ni Nangel, nasged ti panagtrabaho ni DA Secretary Proceso Alcala para iti naikari a “rice sufficiency” ti gobierno ket sigurado a matungpal daytoy.

Kuna ni Nangel a mabalinen a namnamaen ti publiko nga iti sumaruno a tawen, saanen nga agangkat ti pagilian iti bagas, ketdi, isu payen ti agyeksport.

Segun ken ni Alcala, saan nga agballigi ti programa ti gobierno para iti rice sufficiency no saan a gapu iti panangikagumaanan ni Nangel ken dagiti taona a direkta a makiin-innuman kadagiti mannalon manipud pay idi 2011.

Adda 500,000 nga ektaria a daga a napadanuman iti daytoy kalgaw, ken mapattapatta a maysa milion nga ektaria ti kabaelan a pasayakan dagiti irrigation canals a maipatpatakder pay a manamnama a mausar iti umay a tawen.

Rugrugian metten ti DA ken NIA ti panagpaaramid kadagiti mini hydro-electric power plants a mangipaay iti suplay ti koriente kadagiti naseksek a lugar iti pagilian, nangruna iti Mindanao.

Ikagkagumaanan pay ti DA ken NIA ti pannakaaywan ti nakaparsuaan. Itay nabiit, nagmula ti departamento ken ahensia iti 1.5-milion a kayo iti Pantabangan Dam iti Nueva Ecija ken iti sumaruno pay a tallo a tawen, 3.5-milion nga agbunga a kayo ti imulada iti nadumaduma a dam iti pagilian.

(Naipablaak iti Bannawag, Hulio 2, 2012 a bilang.)

Pannakaingato ti presio ti irik, maad-adal

Panggep ti Department of Agriculture (DA) nga ingato ti presio ti irik tapno matulongan dagiti mannalon.

Kuna ni DA Secretary Proceso Alcala a tratarenda ti nasao a banag iti angayenda a miting, kaduada ti National Food Authority (NFA).

Daytoy a tignay ti DA ti sungbatna iti dawat dagiti mannalon a mapagbalin koma a a P20 ti tunggal kilo nga irik.

Namnamaen met ni Alcala a mairuar ti resulta ti mitingda itoy arinunos ti Pebrero.

Iti agdama, ipatpatungpal ti NFA ti P17 iti tunggal kilo nga irik ket no mapatgan ti kiddaw ti Kilusang Mayo Uno (KMU), Amihan, ken Anakpawis, rumrummuar a P3 ti ngumatuan ti presio.

Immunan a nakaawat ni Alcala iti report nga adda sumagmamano a negosiante a manggunggundaway ken aggatgatang iti irik iti presio a P10 agingga iti P12 laeng tunggal kilo nga aw-awaten met dagiti mannalon gapu iti kinaawan ti sabali nga aggatang.

Mainaig itoy, dinawat ti Sekretario kadagiti mannalon nga ipakaammoda a dagus dagiti lugar nga awanan iti NFA station tapno mapapartak ti panangtulong ti turay kadakuada.

(Naipablaak iti Bannawag, Marso 5, 2012 a bilang.)