Naimalditen ti Daga a Nakayanakan, patarus iti Iluko ti His Native Soil, nobela daydi Juan Cabreros Laya a nangyalat iti Umuna a Gunggona iti Umuna a Commonwealth Literary Contest. Impatarus iti Iluko ni Prescillano N. Bermudez, premiado a mannurat iti Bannawag.
Agrukod ti libro iti 6” x 9” ken agpuskol iti 230 a panid. Mayalnagto ti libro iti programa a maangay iti Juan C. Laya Memorial School, San Manuel, Pangasinan a nageskuelaan daydi JCL a naipanagan kenkuana. Maawisto ni Dr. Jaime C. Laya, dadaulo ti kaputotan daydi Juan C. Laya.
Mailako ti libro ket ti paglakuan maaramat a pagpaaramid iti busto ni JCL a maipasdek iti arubayan ti JCLMS.
Ti pamilia Regacho iti Pangasinan ti nangesponsor iti pannakaipablaak ti nasao a libro. Ti met Alpha Printing Press iti Siudad ti Dagupan ti nangimaldit itoy. (Ditas P. Bermudez)
(Naipablaak iti Bannawag, Agosto 8, 2011 a bilang.)
