Kasar iti sibil, ad-adda a pilien dagiti praktikal

Tapno maawis ti ad-adu a Filipino nga agpakasar iti simbaan, masapul a kissayan ti Simbaan Katoliko dagiti singsingirenna iti panagpakasar, kas kuna ti maysa kadagiti kangrunaan nga autor ti Divorce Bill.

Kuna ni Gabriela Party-list Rep. Luzviminda Ilagan, parikut iti kuarta no apay nga ad-adda a pilien dagiti Filipino ti agpakasar iti sibil ngem iti simbaan.

Kuna ni Ilagan a praktikal itan ti tao ket pilienda laengen nga igatang iti masapsapul ti pagkasarda koma iti simbaan. Kasta met nga adun dagiti nakisina a saan a mapalubosan nga agkallaysa manen gapu ta awan met ti diborsio iti Filipinas.

Sungbat daytoy ni Ilagan iti surbey a nagkuna a maysa iti dua a naasawaan a Filipino ti saan a nakapagkallaysa iti simbaan gapu ta nagastos daytoy.

Segun iti Veritas Truth Survey (VTS) nga iti 2,500 a nagsungbat, 51 porsiento ti agsusueldo iti P25,000 tunggal bulan wenno nangatngato pay ti nagkasar iti simbaan, idinto ta 47 porsiento ti agsusueldo iti nababbaba pay ngem P5,000 tunggal bulan ti nagkasar iti simbaan.

(Naipablaak iti Bannawag, Oktubre 29, 2012 a bilang.)

Diborsio, saan a makalasat iti 15th Congress

Impasiguradon dagiti pangulo ti Kamara a di mapasamak iti maika-15 a Kongreso ti pannakaanamong ti gakat a “Filipino-style” a diborsio.

Kinuna da Speaker Feliciano “Sonny” Belmonte Jr. ken House Majority Leader ken Mandaluyong City Rep. Neptali “Boyet” Gonzales II nga idinto a kayatdan a maileppas ti debate iti kontrobersial a Reproductive Health (RH) bill, awan met iti listaanda ti pannakaanamong ti House Bill 1799 wenno ti “An Act Introducing Divorce in the Philippines.”

“Kayatmin a malpas ti RH bill. Ngem diak mamati a maanamongan iti Kamara ti gakat iti diborsio,” kinuna ni Belmonte.

Kinuna met ni Gonzales a no ilabanda ti pannakaanamong dagiti dua a gakat a konkontraen met ti Simbaan Katolika, amangan no maipagarup daytoy a “deklarasion ti gubat” kontra iti Simbaan Katolika.

Nupay kasta, kuna ni Gabriela party-list Rep. Luzviminda Ilagan, autor ti HB 1799, kaduana ni Gabriela Rep. Emerenciana de Jesus, nga ituloyda ti pannakaikampania ti gakat tapno maaprobaran daytoy.

Kinuna ni Rep. Ilagan a nasken a maaprobaran ti gakat iti diborsio tapno maikkan iti pagpilian dagiti naasawaan a Filipino a biktima ti saan a naragsak a kasamiento.

(Naipablaak iti Bannawag, Marso 26, 2012 a bilang.)