Soy sauce nga awan ti markana, annadan

Imballaag ti Food and Drug Administration (FDA) kadagiti umili ti dida koma panagus-usar iti soy sauce a naipalaon iti awan markana a botelia wenno container ta posible nga adda ramen dagitoy a sauce sause a makadangran iti salun-at, kas koma iti panangparnuayda iti sakit a kanser.

Mainaig met laeng daytoy a ballaag ti FDA iti report ti Department of Health a ti 3-MCPD (3-Monochloropapane-1,2 diol) a mapapataud iti soy sauce a maar-aramid met manipud iti hydrolized vegetable protein ket natakuatan a makapataud iti kanser, kas maibatay iti panagadal nga inrugida pay idi 1990. Nupay kasta, adda met naituding a kaadu ti 3-MCPD a mabalin a laonen ti soy sauce tapno maibaga a natalged iti salun-at-- naikeddeng daytoy a 1 PPM (1 part per million).

Iti agdama, gagangay nga addaan dagiti rehistrado a soy sauce iti Filipinas iti ramen a 3-MCPD ngem 0.16 PPM laeng, amang a nababbaba ngem iti maipalpalubos a 1 PPM. Nupay kasta, natakuatan a dagiti saan a rehistrado a soy sauce, addaan iti 3 PPM a 3-MCPD.


Bannawag, Hulio 18, 2011 a bilang