Nars a Filipino, masapul iti Bangladesh

Naimbag a damag kadagiti nars a Filipino a kayatna ti agtrabaho iti sabali a pagilian.

Agsapsapul ti kangrunaan nga ospital idiay Bangladesh kadagiti Filipino a nars para kadagiti pasilidadda iti kapitolio ti Dhaka, segun iti report ti Embahada ti Filipinas iti nasao a pagilian.

Naammuan nga impakaammo da retired Brig. Gen. Shahidul Islam ken Dr. Salahuddin Ahmed, director for operations and administration ken chief coordinator for development ti United Hospital iti Dhaka, ken ni Philippine Ambassador to Bangladesh Bahnarim A. Guinomla ti damag iti panagmimitingda itay nabiit iti Embahada mainaig iti recruitment dagiti Filipino a medical workers, a maur-urnosen ti dokumentasion para kadagiti kasapulan iti pannakayempleo dagiti nars a Filipino.

Immun-unan a bimmisita iti Filipinas ni Ahmed, ket rinugiannan ti nakiinnuman kadagiti aplikante iti Manila.

(Naipablaak iti Bannawag, Hulio 9, 2012 a bilang.)

Photo credit: http://definitelyfilipino.com

12,000 a nars, maipaayan iti trabaho

Impanamnama ni Senador Franklin Drilon a maipaayan iti trabaho ti aganay a 12,500 a nars iti pagilian kalpasan nga impakaammo ni Department of Budget and Management (DBM) Secretary Butch Abad nga adda badyet a nakalatang para itoy.

Sakbayna, imballaag ni Senador Drilon, chairman ti Senate Committee on Finance, a dina aprobaran ti badyet ti Department of Health (DoH) agingga a saan nga umanamong ti DBM a mangala kadagiti nayon a health worker.

Iti panangdengngeg ti Senado iti DoH budget, impakaammo ni DoH Secretary Enrique Ona a kasapulanda ti 40,000 nga empleado, a kaaduan kadagitoy ti health worker.

(Naipablaak iti Bannawag, Setiembre 5, 2011 a bilang.)