Most wanted iti Rehion Uno, natiliw ti CIDG

Natiliw dagiti kameng ti Criminal Investigation and Detection Group (CIDG) iti Ilocos Sur ti dua a top most wanted iti Rehion Uno itay Hulio 16, 2011.

Innaganan ni P/Chief Insp. Arbel Mercullo, hepe ti Ilocos Sur Criminal Investigation and Detection Team, ti natiliw a ni Manuel Rivera y Murao, 43, ken tubo iti Bangar, La Union.

Kinuna ni Mercullo a wanted ni Rivera gapu iti kaso a double murder ken dua pay a sabali a kaso ti murder.

Nagtitinnulongan ti CIDT Ilocos Sur, CIDT La Union nga indauluan ni P/Chief Inspector Helson Walin, ken ti Ilocos Sur PPSC ti team ti pannakatiliw ni Rivera iti Siudad ti Baguio a paglemlemmenganna. Natiliw met kalpasanna ti kaduana a ni kailianna a Francisco Maganis.

Kinuna ni P/Chief Inspector Mercullo nga agpada dagiti dua a kameng ti maysa a private armed group.

Mainaig itoy, kinuna ni Ilocos Sur Provincial Director P/Senior Supt. Reynante G. Partible nga ad-adda pay a mapabileg ti kampania ti polisia iti Ilocos Sur nangruna iti OPLAN PAGTUGIS (campaign against wanted persons), OPLAN SALIKOP (campaign against syndicates/organized crime group). Ken OPLAN PAGLALANSAG OMEGA (campaign against private armed groups & loose firearms) tapno ad-adda pay a mapaksiat iti kriminalidad iti probinsia. (EBC)

(Naipablaak iti Bannawag, Agosto 15, 2011 a bilang.)