Ti kinapositibo iti panagkita dagiti Filipino iti biag iti laksid dagiti adu a pannubok ti maysa kadagiti rason no apay nga adayo a mapasamak iti Filipinas ti pammapatay a napasamak iti maysa nga eskuela iti Connecticut, USA idi Dis. 14, kas kinuna ti maysa nga opisial ti Philippine National Police.
Iti nasao a pammapatay, natay a napaltogan ti 20 nga ubbing nga agad-adal ken 6 a nataengan a pakairaman ti prinsipal ti Sandy Hook Elementary School. Kadagiti ubbing, 8 ti lallaki ken 12 ti babbai nga agtawen iti 6 ti kaubingan.
Naitudo a maysa nga Adam Lanza, agtawen iti 20, ti nangpaltog kadagiti biktima babaen ti high-powered rifle. Sa kalpasanna, pinatayna ti bagina. Sakbay ti iseserrek ni Lanza iti eskuela elementaria, pinaltogan ni Lanza ti inana a nakatayan met daytoy.
Kinuna ni Chief Supt. Raul Petrasanta, direktor ti PNP Firearms and Explosives Office (FEO) a nupay patienna a dinto mapasamak iti Filipinas ti kas iti napagteng iti Connecticut, itandudo ti PNP ti ad-adda pay a naig-iget a gun control, kas iti pannakaipataw ti nadagdagsen a pannusa kadagiti matiliwan nga addaan kadagiti saan a lisensiado nga armas.
Iti agdama, kuna ti PNP-FEO nga iti 1.1 a milion a nailista a lisensiado a paltog, kagudua ditoy ti saan a naipabaro ti lisensiada. Adda met di nakurkurang ngem 25,000 a naireport a saan a lisensiado a paltog iti pagilian.
(Naipablaak iti Bannawag, Disiembre 31, 2012 a bilang.)
