OFWs, kaaduan iti Middle East

Umun-una dagiti pagilian iti Middle East a pagturturongan dagiti overseas Filipino worker, kas inreport ti Philippine Overseas Employment Administration (POEA).

Segun iti report, kaaduan a Filipino ti makigasanggasat a mangged iti Saudi Arabia, United Arab Emirates, Qatar ken Kuwait.

Dinakamat ti POEA a 13,485 a job order ti inaprobaranda ken naproseso idi Enero ken dakkel a paset ti job order ti para iti Taiwan.

Kagiddan daytoy, impakaammo ti Bangko Sentral ng Pilipinas a ngimmato iti 6.3 a porsiento ti kuarta nga impaw-it dagiti overseas Filipino worker itay napan a tawen. Mapan a $21.4 a bilion ti remittance idi 2012 idinto a $20.1 a bilion idi 2011.

Nairaman iti report a nupay umuna a naggapuan ti kuarta ti Estados Unidos, dakkel a paset ti naggapu kadagiti pagilian iti Middle East.

Limmag-an ketdi ti bolsa ti pamilia dagiti OFW ta nakissayan ti gatad ti impaw-itda a doliar gapu iti ipipigsa ti pisos iti foreign exchange.


(Naipablaak iti Bannawag, Marso 4, 2013 a bilang.)

Vatican ken Monaco, nakalukat ti ridawna para kadagiti OFW

Silulukat ti ridaw para kadagiti Filipino a kayatna ti agtrabaho iti Vatican ken Monaco, kas impakaammo ti Philippine Overseas Employment Administration (POEA).

Naaammuan a maibatay iti POEA Board ti Resolution No. 9, mapalubosanen nga agturong dagiti overseas Filipino workers (OFW) kadagiti nasao a lugar kalpasan a narisut dagiti naisaad iti Republic Act 10022 wenno Migrant Workers Act.

Naammuan pay a maibatay iti Section 3 ti RA 10022, mapalubosan laeng ti pannakaideploy dagiti OFW iti maysa a host country no addaan daytoy iti agserserbi a labor and social laws a mangipaay iti proteksion kadagiti karbengan dagiti mangmangged.

Umaboten iti 186 pagilian ti addaan iti “go signal” ti POEA a pakaibaonan dagiti OFW ket ad-adalenda pay ti 17 a pagilian nga awanan pay iti sertipikasion manipud iti Department of Foreign Affairs (DFA).

(Naipablaak iti Bannawag, Oktubre 8, 2012 a bilang.)

13,000 a trabaho, ididiaya ti Libya

Di nakurkurang ngem 13,000 a trabaho ti ididiaya ti Libya kadagiti overseas contract workers bayat ti isasayaat ti kasasaad ti urnos ken talna iti nasao a pagilian, kas impakaammo ti Philippine Overseas Employment Administration (POEA).

Kinuna ni POEA Administrator Hans Cacdac a mairaman kadagiti kasapulan nga agtrabaho iti Libya dagiti eksperto iti tay-ak ti salun-at a kas kadagiti nurses ken midwives ken dagiti adda iti konstruksion a kas kadagiti karpentero, welder, ken inheniero.

(Naipablaak iti Bannawag, Mayo 28, 2012 a bilang.)