Mairaman ti Burgos, Ilocos Norte ken La Union a makipagrambak ita a tawen iti National Arts Months, maysa a nailian a parambak nga itantandudo ti National Commission for Culture and the Arts (NCCA) nga ipanguluan da chairman Felipe M. de Leon Jr. ken OIC-executive director Adelina M. Suemith.
Tinawen a maangay daytoy a parambak ngem naidumduma ita ta naiwaras iti nadumaduma a paset ti pagilian. Ket mairaman kadagiti 12 a lugar a pakaangayanna ti ili ti Burgos ken ti probinsia ti La Union.
Iti Burgos, maisayangkat ti parambak, babaen ti tema a “Panagkaykaysa: Ti Umili, Ti Kultura, ken Sining,” manipud iti Pebrero 16 agingga iti Pebrero 21. Ditoy a maitandudo dagiti tradision, kultura ken arte dagiti taga-Burgos.
Maangay met iti Saint Louis College iti San Fernando, La Union ti “Tawid Taoid: Bridging Cultures” inton Pebrero 9, 10 ken 20. Ditoy, maipakita kadagiti estudiante dagiti nadumaduma a kultura ken arte ti La Union. Addanto met exhibit a pakaipakitaan dagiti aramid dagiti estudiante iti arte kangrunaan iti visual arts. Mangrugi daytoy kadagiti eskuela sa maipasiar dagitoy nga aramid iti arte tapno ad-adu a tao ti makakita.
Malaksid kadagiti dua a nadakamat nga aramid, maisayangkat met ti “Kultouravan: The Lyceum of the Philippines Cultural Caravan” iti Lyceum of the Philippines (LPU) iti Manila a pakipartisiparan dagiti estudiante ken dagiti nadumaduma nga artist. Nadumaduma met nga aktibidad nga adda pakainaiganna iti arte ken kultura ti maangay iti Intramuros ken Rizal Park iti Pebrero 2, 4, 9 ken 14.
Angayen met ti Liliw, Laguna ti “Sining Tsinelasan sa Liliw”; ti Ligao National High School ti Ligao City, Albay ti “Hablon: Habi ng Sining sa Paaralan at Komunidad”; ti panangbigbig ti Kanlaon Theatre Guild kadagiti naaramidan dagiti artist ken cultural groups iti probinsia ti Negros Occidental babaen ti “Ani: A Harvest of Traditional and Contemporary Artistic Expressions”; ken ti Xavier Sabali laeng dagiti maangayto met iti nadumaduma a paset ti Bulacan ken Bikol. (LSF)
(Naipablaak iti Bannawag, Pebrero 16, 2015 a bilang.
