Naragsak a Panagkasangaymo, Apo Lakay!

NARAGSAK A PANAGKASANGAYMO, APO LAKAY! Indauluan ni Gobernador Ma. Imelda Josefa "Imee" Marcos ti Ilocos Norte ti pannakalagip ti maika-96 a panagkasangay ni dati a Presidente Ferdinand E. Marcos iti mismo a nakayanakanna iti Poblacion, Sarrat, Ilocos Norte. Kas paset ti selebrasion, ditoy a nailukat para iti publiko ti kadaanan a bato a balay a nakayanakanna a napagbalinen a kas maysa a museo kas paset pay laeng ti Marcos Heritage Trail nga itantandudo ita ti gobierno probinsial a pagpasiaran dagiti turista tapno ad-adda pay a maam-ammoda no kasano a nagubing daydi Apo Marcos. Malaksid iti daytoy, mabalin payen a pasiaren ti publiko ti naidumduma a kuarto iti Sarrat Central School ta ditoy a mismo ti nagbasaan daydi FM iti umuna a tukad ti elementaria. Ditoy a makita ti naipadakkel a ladawanna, karaman kadagiti kaeskuelaanna ken adda payen agur-uray nga audio-visual materials a mabalin a pagbuyaan ken pagbasaan dagiti bumisita nga ubbing wenno nataengan. Masarakan daytoy iti abay met laeng ti Santa Monica Church ken museo isu a mabalin a pagnaen laeng daytoy no bumisitaka iti balay a nakayanakanna wenno iti Sarrat Presidencia (municipal hall) a sigud nga aw-awaganda iti Irene's guest house a naipanagan iti inaudi nga anak daydi Apo Lakay. Baba: Dagiti kalaingan a tamborero iti Sarrat, Ilocos Norte iti panagtokarda bayat ti pannakalagip ti panagkasangay daydi dati a Presidente Marcos. (Leilanie G. Adriano)

(Naipablak iti Bannawag, Septiembre 23, 2013 a bilang.)

Marcos presidential center, naluktan iti publiko

Ni LEILANIE G. ADRIANO

Tapno agnanayon latta ti lagip ni Presidente Ferdinand E. Marcos, maysa manen a museo dagiti Marcos ti pormal a naluktan iti Siudad ti Batac idi Pebrero 3, maysa aldaw kalpasan iti maikasangagasut siam a pulo ket lima (195th) a panagkasangay ti probinsia ti Ilocos Norte.

Iti laksid dagiti adu a maipadpadamag maipanggep iti kinadangkok iti turay daydi FM agraman ti pannakaabuso ti kalintegan dagiti umili iti linteg kabayatan ti panagtakemna, saan met a mailibak dagiti adu a gapuananna tapno mapadur-as ti pagilian. Ngarud, tapno ad-adda pay a maam-ammo aglalo dagiti ubbing no asino a talaga ni Marcos a kas maysa a lider nga ipagpampannakkel dagiti Ilokano, silulukat ti ruangan ti Siudad ti Batac a mangpasangbay kadagiti amin a bumisita kenkuana, kas kinuna ni Eric Cerudo, curator ti nasao a museum.

Ti napabaro a Marcos Presidential Center ket isu met laeng ti dati a disso ti daan a Marcos Museum nga asideg ti Marcos mausoleum nga ayan ti saan pay a naipumpon a bangkay ni FM. Daytoy ti maikadua a napabaro a museum maipanggep iti kabibiag daydi Marcos kalpasan a naluktan idi laeng napan a tawen ti Malacañang of the North Museum iti Siudad ti Laoag a nakaipalaonan dagiti adu a pammaneknek ti gapuananna kabayatan ti kinapresidentena.

Iti met nasao a Presidential Center iti Siudad ti Batac, ditoy a makita no kasano a nagbalin ni Marcos a kas lider manipud iti panakipasetna iti World War II agingga a timmapog iti politika, ti panagaramidna iti dekalibre a linteg tapno maipatakder dagiti adu a pagadalan, ti panagbalinna a presidente ti Senado agingga nga inarem ken inkallaysana ti “Rosas ti Tacloban” a ni sigud a First Lady Imelda Romualdez Marcos.

Indauluan ni Gobernador Ma. Imelda “Imee” R. Marcos ti Ilocos Norte, kaduana ti kasinsinna a ni Bise-Gobernador Angelo Marcos Barba (kakananawan) ken Mayor Jeffrey Jubal Nalupta ti Siudad ti Batac ti pannakaputed ti ribbon a simbolo ti pormal a pannakalukat ti napabaro a Marcos Presidential Center. (Leilanie G. Adriano)

Da Father Ian Rabago, Eric Cerudo (museum curator), Gob. Imee R. Marcos, Bise-Gob. Angelo Marcos Barba, Bokal Elena Nalupta iti Segundo Distrito ti Ilocos Norte, Bokal Conrado Respicio iti Umuna a Distrito kdp. iti panangkitada kadagiti display iti Marcos museum. (Leilanie G. Adriano)




(Naipablaak iti Bannawag, Pebrero 18, 2012 a bilang.)