Pannakaiparit dagiti OFW nga agtrabaho iti Hong Kong, nakadadanag

Idandanag dagiti overseas Filipino worker (OFW) dagiti ay-aywananda a masakit no bilang matuloy ti “OFW ban” wenno pannakaipawil ti panagtrabaho dagiti Filipino iti Hong Kong nga idurduron ti maysa a partido a politikal iti Hong Kong.

Segun kadagiti Filipina a domestic helper iti HK, saanda a madanagan a maawanan iti trabaho no bilang agbalin a linteg ti nasao a gakat gapu ta mangnamnamada iti kari ti gobierno ti Filipinas, iti babaen ti Department of Labor and Employment (DoLE), a nakasagana ti “alternative market” a para kadagiti maapektaran nga OFW.

Namunganay ti gakat nga OFW ban iti maatap a di panagkiddaw iti dispensar ni Presidente Benigno Aquino III iti gobierno ti Hong Kong mainaig iti insidente ti pannaka-hostage dagiti turista iti Manila idi 2010.

Segun ken ni Jane Alnas, maysa nga OFW, maasian iti ay-aywananna a nataengan nga addaan iti Parkinson’s disease ken hernia no inkapilitan a mapagawid dagiti domestic helper a kas kenkuana.

Nupay kasta, mangnamnama daytoy a maurnos met laeng ti situasion iti nagbaetan ti Filipinas ken Hong Kong.

Innayonna a napateg met ti kontribusion ti OFW iti napintas a taray ti ekonomia ti Hong Kong.


(Naipablaak iti Bannawag, Oktubre 28, 2013 a bilang.)

Mannalon iti Cagayan, nadur-as ti panagbiagda gapu iti bio-organic fertilizer

Pagganaran ken pagobraan. Daytoy ita ti sagsagrapen dagiti adu a mannalon iti Sta. Praxedes, Cagayan gapu iti produksionda iti Bio-Organic Fertilizer iti tulong ti Department of Labor and Employment (DOLE).

Kuna ni Amor Daluson, ti Portabaga Bio-Organic Fertilizer Producer Association, a nangrugi a pinunduan ti DOLE ti grupoda idi 2009 iti babaen ti programa a Rural Employment through  Self-Employment and Entrepreneurship Development, a mangmangted iti ayuda kadagiti babassit nga organisasion a kas kadakuada tapno maaddaan iti nayon a pamastrekan.

Pasado met ti produksionda iti naituding a pagibasaran ti Department of Agriculture gapu ta naaramid daytoy manipud iti garami, lugit ti manok ken dagiti alinta.

Kuna ni Daluson a kaaduan kadagiti kameng ti asosasion ti agmulmula iti pagay, mais, nateng, ken saba. Gapu iti ganagan a partuatda, naan-andur dagiti maisda iti tikag. Kasta met a nabaybayag ti biag dagiti nateng isu nga ad-adu ti maapitda.

Segun pay ken ni Daluson, bimmaba iti 50 porsiento ti agus-usar iti kemikal a ganagan para iti pagayda ken nakainutda iti P3000 tunggal ektaria tunggal panagtalon.

(Naipablaak iti Bannawag, Hunio 25, 2012 a bilang.)