SARRAT, ILOCOS NORTE. Dua nga agkomari iti daytoy nga ili ti simmalog iti Karayan Padsan tapno agalada iti tukmem (bennek) iti nasapa a bigat. Awan pay maysa nga oras, nakaalan dagitoy iti uppat a tabo (agarup lima a kilo) tapno adda met ilakoda kadagiti kakaarrubada. Agbalor iti limapulo a pisos (P50.00) ti kada tabo ngem no dumanonen iti tiendaan, agdoble wenno agtriple payen ti bayadna ta nangina met ti plete a mapan iti tiendaan aglalo kadagitoy a tiempo ti angol. Iti akimbaba a ladawan iti kanigid, isursuro met ni Agnes Bagcal no kasano ti agala iti tukmem iti balasangna a ni Angel. Iti akimbaba a ladawan iti kanawan, ni Aira Crizelle Oracion ken ti ‘haytek’ a karadikadna. Idi un-unana a panawen, agkaiwara dagiti karadikad a pagala iti tukmem. Ngem gapu iti panagbalbaliw ti tiempo ken gapu ta bumasbassit metten dagiti mula a kawayan a maaramid a karadikad, maipamuspusan latta met dagiti agtutubo ti agbiag a kas iti panangusar iti akkub ti nadadael a bentilador (electric fan) a pagala iti tukmem. (LEILANIE G. ADRIANO)
(Naipablaak iti Bannawag iti Mayo 1-15, 2021 a bilang. Kadagiti kayatna ti ag-subscribe iti e-Edition, mapan iti ania man kadagitoy a link:
Press Reader: https://bit.ly/2GjO1fK
Magzter: https://bit.ly/2HuG4EO
Magzter: https://bit.ly/2HuG4EO
Para iti naimaldit a kopia, kauman ni Boy Balanag iti CP Number 0916 269 2390
Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment