Salip iti Ababa a Sarita ti NPR Ilokano Literary Awards, naluktan

Naluktan itay nabiit ti maysa pay a salip iti panagsurat iti ababa a sarita nga Ilokano nga agpaay kadagiti amin a mannurat nga agsursurat iti Ilokano. Umuna a pasalip daytoy ti kabbuangay a literary award a nairanta tapno mapadayawan ken maitandudo dagiti mannurat nga Ilokano ken ti Literatura nga Ilokano, ti NPR Ilokano Literary Awards wenno NPRobinion Awards. Maisayangkat ti salip ken ti award babaen ti panangisponsor ni Mayor Nelson Pagaoa Robinion ti Sta. Ana, Cagayan ken ti pamiliana, ken iti pannakitinnulong ti GUMIL Cagayan ken ti Mangngaggo Club. 

Pagalagadan ti Salip: 

1. Ababa a sarita ti pagsasalipan iti pannakalukat ti umuna a Nelson Pagaoa Robinion Ilokano Literary Awards. Narugian ti salip idi Nobiemre 15, 2020; maigibus inton Pebrero 15, 2021 a maudi nga aldaw ti panagidatag iti pakisalip. 

2. Silulukat ti salip kadagiti amin nga agsursurat iti ababa a sarita nga Ilokano, malaksid kadagiti mangtarawidwid iti salip ken kadagiti kakabagianda. Nasken a bukod a putar ti autor ti maisalip, saan pay a naipablaak iti ania man a magasin, pagiwarnak, wenno libro, naimaldit man wenno online, ken saan a patarus manipud iti ania man a lengguahe. 

3. Maysa laeng a sarita ti isalip. Nawaya ti mannurat iti kayatna a tema ti saritana. Agatiddog ti pakisalip iti 12-25 a panid iti short bond paper (letter size), nai-computer iti Microsoft Word iti Times New Roman font size 12, double spaced, ken addaan 1 a pulgada a margin iti amin nga igid (left, right, top, ken bottom) ti dokumento. 

4. Parbo a nagan (pen name) ti ipan a nagan (byline) ti autor iti pakisalipna. Ipatulod ti pakisalip a kas file attachment (.doc wenno .docx) iti email iti npr.ilokano.literary.awards@gmail.com iti subject a “Pakisalip iti 1st NPR Ilokano Literary Awards.” Mangipakuyog iti naisina a document file (may-attach met laeng) a nakailanadan ti paulo ti pakisalip a sarita, parbo a nagan, pudno a nagan, numero ti selpon wenno telepono, email address, link ti Facebook account (no adda), adres ti pagtaengan ken/wenno pagobraan, ababa a pakasaritaan ti biag, ken mangy-insert iti kaudian a ladawan (.jpg file). Agingga laeng iti 11:59 PM ti Pebrero 15, 2021 ti pannakaipatulod dagiti pakisalip. 

5. Dagiti gunggona: Umuna a Premio: P10,000; Maikadua: P7,000; ken Maikatlo: P5,000; ken dua a pammigbig a gunggona (Maika-4 ken Maika-5 a Premio) a sag-P1,500. Adda maited a sertipiko ti pammadayaw dagiti mangabak. Adda met karbengan dagiti hurado a mangkissay iti bilang dagiti mangabak no awan ti makapatar iti pagbatayanda iti rebbeng a  mangabak. Mabalin pay a mangparnuayda iti nayon wenno sabali a gunggona maibatay iti merito dagiti naisalip a sarita. 

6. Pinal ti pangngeddeng dagiti hurado, malaksid no maduktalan a sinalungasing ti nangabak nga autor ti Pagannurotan Bilang 2. Ti matakuatan a nagsakar, maibabawi ti premiona ken dinton mapalubosan pay a makipaset kadagiti pasalip ti NPR Ilokano Literary Awards. 

7. Makipagtagikua ti NPR Ilokano Literary Awards kadagiti mangabak a sarita ken maaddaan iti karbengan a mangipablaak kadagitoy iti ania man a wagas a kayatna a pangaramatan. Agtalinaed ketdi ti karbengan dagiti autor iti copyright dagiti saritada. 

8. Mapakaammuanto dagiti mangabak no kaano, kasano, ken no sadino a maangay ti pannakaited dagiti premio ken pannakapadayawda.

(Naipablaak iti Enero 1-15, 2021 a bilang. Kadagiti kayatna ti ag-subscribe iti e-Edition, mapan iti ania man kadagitoy a link:

Press Reader: https://bit.ly/2GjO1fK
Magzter: https://bit.ly/2HuG4EO

Para iti naimaldit a kopia, kauman ni Boy Balanag iti CP Number 0916 269 2390

Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)