Salip iti Daniw ti 3rd Gabriela Prize (2020)

Naluktanen ti Maikatlo a Gabriela Prize (Premio Gabriela) babaen ti Salip iti Daniw iti panggep a mangtakuat iti naiduma a daniw nga Ilokano.

Pagalagadan ti Salip:

1. Daniw ti mapagsasalipan iti Maikatlo a Gabriela Prize wenno Premio Gabriela. Silulukat ti salip kadagiti amin nga agsursurat iti daniw nga Ilokano. Narugian ti salip iti Disiembre 12, 2019 ken maigibus inton Agosto 30, 2020 (aldaw ti pannakaipakaammo iti publiko kadagiti nangabak ken pannakaited dagiti premioda). Iwayat ken tarawidwidan daytoy ti Imnas & Iway Publications, agipabpablaak/agiruruar kadagiti libro nga Ilokano, zines, ken chapbooks.

2. Maysa a daniw laeng ti idatag a kas pakisalip. Nawaya ti mannaniw iti kayatna a tema, porma, ken kaatiddog wenno kaababa ti isalipna a daniw (saan a malimitaran ti bilang ti linia ken panid). Nupay kasta, maikkan iti importansia dagiti daniw a mailaksid iti nakairuaman a tradisional a daniw nga Ilokano. Maisingasing ti panagtakuat kadagiti sabali pay a porma ken linaon ti daniw. Mabalin ti agidatag kadagiti experimental wenno conceptual a daniw.

3. Orihinal, bukod a putar ti isalip a daniw. Ti matakuatan a nagsakar (no nangabak), maibabawi ti premiona ket dinton mapalubosan a makipartisipar iti Gabriela Prize ken iti ania man a salip nga iwayat ti Imnas & Iway Publications. Masapul met a di pay naipablaak, di pay naiposte iti web ken social media ti pakisalip.

4. Deadline ti panagidatag iti pakisalip: Hunio 15, 2020. Ipatulod a kas file attachment (MS Word wenno PDF) iti gabriela.prize@gmail.com iti subject a “3nd Gabriela Prize.” Saan nga ipan ti nagan wenno penname iti pakisalip. Mangipakuyog iti text file a nakailanadan ti pudno ken kompleto a nagan, numero iti selpon, email address, link ti FB account, adres ti pagtaengan/opisina, ken bionote.

5. Dagiti gunggona: Umuna a Premio: PhP2,000; Maikadua: PhP1,500; ken Maikatlo: PhP1,000; ken sertipiko. Mapadayawanto met iti Hall of Fame ti mannurat a mangabak iti lima nga Umuna a Premio. Mabalin a makissayan wenno manayonan ti magunggonaan no ikeddeng dagiti hurado. Saan met a mabaliwan ti pangngeddeng dagiti hurado malaksid no adda nangabak a naglabsing iti pagannurotan.

6. Maipakaammo ti kinaasino dagiti nangabak inton Agosto 30, 2020 nga isu met ti aldaw a pannakapadayaw ken pannakaited ti premioda. Virtual ti awarding ket mapasamak iti internet, kangrunaanna iti social media. Iti Facebook Event Page ti Gabriela Prize a maammuan ken mapadayawan dagiti nangabak. Maipatulodto met ti gunggona dagiti nangabak babaen ti courier.

7. Makipagtagikua ti Imnas & Iway Publications kadagiti mangabak a daniw ket addaan iti karbengan a mangaramat kadagitoy iti ania man a wagas (kas iti pannakaipablaak a chapbook a libre a mabasa wenno mai-download iti internet) nga awan sungsungbatanna kadagiti autor. Agtalinaed ketdi ti copyright iti autor.

8. Para iti dadduma pay nga impormasion, agsurat iti gabriela.prize@gmail.com wenno ag-PM iti FB page ti Gabriela Prize iti facebook.com/gabrielaprize.


(Naipablaak iti Enero 16-31, 2020 a bilang. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)