Gapu iti kinalaka daytoy a malako, ginutigot ni Demetrio Tang, manedier iti Department of Agriculture-Cagayan Breeding Station (DA-CBS) iti Solana, Cagayan, dagiti mannalon iti nasao a probinsia nga agtarakenda koma iti kalding.
Kinuna ni Tang a mangididiaya ti nasao a breeding station iti programa iti panagutang tapno matulongan dagiti agtartaraken iti kalding a mangpasayaat iti puli dagiti kalding a tartaraknenda.
Kinuna nga iti agdama, addaan ti breeding station iti 107 a Boer ken 61 a Kalahari Red buck a breeder a naangkat manipud iti Australia. Addan nasurok a 400 a buck a breeder a naiwaras kadagiti kualipikado nga agtartaraken iti kalding.
Dinakamat ni Tang a ti napasayaat a puli ti kalding, mailako iti P6,000 agingga iti P8,000 kas maibatay iti agdama a presio iti merkado. Kayatna a sawen, dakkel a banag daytoy para kadagiti mannalon.
Segun met ken ni Dr. Bryan Sibayan, maysa a beterinario, ti aplikante iti nasao a programa iti panagutang, masapul nga addaan kadagiti kasapulan a rekisito a tapno masigurado ti panagtultuloy ti programa, karaman ditoy ti maysa agingga iti dua nga ektaria a pagpastoran, pannakapatakder ti balay dagiti kalding, ken 10 agingga iti 20 a nakasagana a gagangay a pangganakan wenno kabayan a kalding.
(Naipablaak iti Mayo 27, 2019 a bilang. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment