Sanchez, presidente ti GUMIL Pangasinan

Nagtalinaed a presidente ti GUMIL Pangasinan ni Fernando B. Sanchez ti San Nicolas, Pangasinan, premiado a mannurat ken trilingual writer, nagretiro a Public Schools District Supervisor (PSDS) ken agdama a bise-presidente ti Luna Colleges, Tayug, Pangasinan.

Iti naangay a reorganizational meeting ti gunglo idi Dis. 16, 2018 iti Brgy. Magallanes, Tayug, Pangasinan iti panangsangaili ni MTC Judge Plotinus T. Sanchez (inaunaan nga anak ni F.B. Sanchez), kadua ni F.B. Sanchez a napili nga agtakem da Virgilio D. Domaloy, bise-presidente; Marlyn Garcia-del Rosario, sekretaria; Eufemia L. Diaz, tesorera; Felix M. Eslava, Jr., auditor; Billy T. Antonio, PIO. Board of Directors da Prescillano N. Bermudez, Ernesto Bisquera, Alfredo Mabalot, Benny T. Sanchez, ken Simplicio Sansano.  Mammagbaga da Juan S.P. Hidalgo, Jr. ken Mariano Machacon.  Legal consultant met ni Judge Plotinus T. Sanchez.

Kabarbaro a kameng da Rev. Henry D. Roque, Amor Enrique P. Bermudez, ken Czarina Cristine A. Bermudez.

Agsapata dagiti opisial ken kameng ti gunglo ken ni Judge Plotinus T. Sanchez inton Enero 27, 2019 a sumaruno a miting ti GP iti met laeng Brgy. Magallanes, Tayug, Pangasinan a pangsangailianto met laeng ni Judge Sanchez kadakuada. Mangrugi iti alas dies ti bigat ti miting ti gunglo. Kadagiti taga-Pangasinan nga interesado nga agkameng iti GUMIL Pangasinan, maawisda a tumabuno. (VDD)


(Naipablaak iti Enero 28, 2019 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)