Inikkat ti kompania iti social media a Facebook ti nasurok a 100 a ‘page’ ken ‘account’ a karaman iti “spam network” a naduktalan nga agkamkamal iti kuarta manipud iti pananggundaway dagitoy kadagiti Filipino nga agar-aramat iti Facebook.
Naikkat ti agdagup iti 95 a page ken 39 nga account nga addaan iti linaon a politika ken showbiz iti nasao a social media platform itay napalabas a bulan gapu iti “pananggutigot kadagiti tattao a mangbisita kadagiti nababa-ti-kalidadna a website a naglaon iti sangkabassit ken nalag-an nga impormasion a napno iti makakuriro nga anunsio.”
Saan a nairuar ti sibubukel a listaan dagiti naikkat nga account ngem karaman ditoy dagiti agkunkuna a mangsupsuportar kada Presidente Duterte ken Ilocos Norte Gov. Imee Marcos a pakairamanan ti Duterte Media, Duterte sa Pagbabago Bukas, DDS, Duterte Phenomenon, ken Manang Imee.
Naikkat pay dagiti account a nagusar kadagiti nagan ken ladawan dagiti nalatak a celebrity, kasta met dagiti generic a panid a para kadagiti “damdamag” a kas iti News Media Trends ken Pilipinas Daily News.
Kuna ti Facebok nga agiwarwaras laeng dagitoy iti link iti isu met laeng nga advertising click farms. Iti ababa a pannao, no iklikmo dagitoy a link, makaganar dagiti mangmanmantener kadagitoy.
Innayon ti Facebook a kalikagumanna laeng a yadayo dagiti tattao kadagiti website a saan a nasayaat ti linaon wenno it-itedna nga impormasion.
Daytoy nga addang ti Facebook iti Filipinas ket kapadana ti napasamak iti Estados Unidos iti daytoy nasapa a paset ti Oktubre a nagikkatanda iti 559 a panid ken 251 nga account gapu iti agtultuloy a pananglabsing dagitoy kadagiti pagalagadan maipapan iti spam ken saan a mainugot a tignay.
Naduktalan nga agus-usar dagiti spam network kadagiti nabara ken mapagsasaritaan nga isyu iti politika tapno makaganarda babaen ti panagpaadu iti ‘audience’ nga iturongda kadagiti bukodda a website.
(Naipablaak iti Bannawag iti Nobiembre 12, 2018 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment