DISIEMBRE 10, 2018

SARITA
4 Dear Jim
   Norberto D. Bumanglag, Jr.
8 Napateg a Kas iti Biag
   Felipe R. Bacricio

NOBELA
10 Kudeta (39)
    Norberto D. Bumanglag, Jr.
12 Pan de Amor (8)
     Cris J. Dacuycoy

DANIW
39 Kartaniw
     Ronnie E. Aguinaldo
47 Daniw a Para Ubbing
     Elvira M. Alvarez

SALAYSAY
16 Nakaadalda Gapu iti Suka
    Virgilio D. Domaloy
18 Napanak Met Idiay “City of Neon Lights”
    Tony Antonio
42 Agmulaka Met iti Kamangeg
     Reynaldo E. Andres

KOMIKS
24 Miks & Tiks
26 Sweet Jazmine (117)
29 Don Clavio de Ylocos (120)

KOLUM
 6 No Adda Sigsigloten, Adda Met Warwaren
14 Biag ni Ilokano
15 Kastoy, Kapid, Ditoy Hawaii
21 Saludsodem ken ni Apo Hues
23 Dear Doc
32 Okeyka, Apong
36 Ading Kosinera
37 Tips
40 Padasem Daytoy, Kailian

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Balikros
48 Sudoku

DADDUMA PAY
2 Tao, Lugar, Pasamak
11 Netizone
20 Siled ti Kararag
22 Ti Makunami
33 Idi Un-unana a Panawen
34 Ti Tarakenmo ken Sika
35 Panangimaton iti Pagtaengan
38 Ammuem Pay Dagitoy
46 Ti Gasatmo Ita a Lawas

(Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Bato nga Agbalin a Kuarta

BATO NGA AGBALIN A KUARTA. Adda pagsasao a, “Kuwarta na, naging bato pa” ngem ditoy Caroan, Pasuquin, Ilocos Norte, dagiti bato ti agbalin a kuarta. Iti ladawan, tumultulong nga agpili dagiti lokal a turista nga aggatang kadagiti nadumaduma ti maris, sukog ken kadadakkelna a bato nga inan-anusan a pinidut ken binatok iti baybay dagiti nagaget a residente ti Caroan, Pasuquin, Ilocos Norte, kas paset ti pagbiaganda.  Gagangay a maidaknir dagiti babassit (bisil) ken saan unay a dadakkel a bato iti kadaratan no kasta a nadawel ti baybay ket dagitoy ti anusan a pilien a piduten dagiti agindeg. Dagiti met dadakkel, batoken dagiti lallaki iti pangadalmen a paset ti baybay. Agbalor iti 50 a pisos ti aganay a sangasalup ket kagudua a bato. Kunada, “Adda kuarta kadagiti bato a maiwarawara.” (FREDDIE P. MASULI)


(Naipablaak iti Bannawag iti Disiembre 3, 2018 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Filipino Sign Language Law, inaprobaran ni Duterte

Dip. Sandra Eriguel

Manamnama a saan itan a maipapaigid dagiti Filipino nga adda an-annayen ti panagdengngegda iti panangpirma ni Presidente Duterte tapno agbalin a linteg ti Republic Act. No. 11106, wenno ti Filipino Sign Language Act.

Napirmaan idi Oktubre 30, 2018, indeklarar ti nasao a linteg ti Filipino Sign Language a kas nailian a lengguahe dagiti tuleng (saan a makangngeg) a Filipino ken kas opisial a sign language ti gobierno kadagiti amin a pannakitransaksionna kadagiti tuleng. Ibilin pay ti linteg ti pannakausar daytoy kadagiti eskuela, broadcast media, ken kadagiti pagtrabahuan.

Kinuna ni La Union Second District Rep. Sandra Eriguel,  chairperson ti Committee on Social Services, a nangirekomendar iti pannakaaprobar ti bersion daytoy iti Kamara, nga “itandudo ti R.A. 11106 dagiti karbengan dagiti tuleng babaen ti pannakaited kadakuada ti gundaway a makipartisipar kadagiti aktibidad babaen ti pannakausar ti Filipino Sign Language kadagiti eskuela, broadcast media, kadagiti korte ken opisina, ken kadagiti amin a pannakitransaksionda iti gobierno.

Innayonna a mayayon daytoy a linteg iti Early Years Act (R.A. 10410) ken iti Enhanced Basic Education Act (R.A. 10533) nga idi pay a nangbigbig iti Filipino Sign Language a kas lengguahe a mausar iti pannakaisuro dagiti tuleng nga agad-adal manipud iti kinaubingda agingga iti tukad sekundaria.”

Bilinen ti baro a linteg ti Department of Education (DepEd), Commission on Higher Education (CHED), Technical Education and Skills Development Authority (TESDA), ken amin a sabsabali pay nga ahensia nasional ken lokal ti gobierno a mainaig iti edukasion dagiti tuleng ti panagusarda iti FSL a kas medium of  instruction iti pannakaisuro dagiti tuleng.

Ibilin pay ti linteg ti pannakaisaknap ti kinalaing iti sign language uray pay kadagiti an-annayen ti panagdengngegda babaen ti pannakaidiaya ti FSL a kas elective subject iti regular wenno mainstream curriculum iti kolehio, nangruna kadagiti unibersidad ken kolehio a kukua ti gobierno.


(Naipablaak iti Bannawag iti Disiembre 3, 2018 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Pakaisuruan ti Korean, mapili laeng – DepEd

Inlawlawag ti Department of Education (DepEd) a mapili laeng dagiti estudiante kadagiti para publiko nga eskuela a palubosanda nga agadal iti lengguahe a Korean.

Kinuna ni DepEd Undersecretary Annalyn Sevilla a dagiti laeng estudiante iti Grade 7 agingga iti 12 nga addaan iti “mastery” kadagiti lengguahe nga Ingles ken Filipino ti palubosanda nga agadal iti Korean, saan ketdi nga uray asino la ditan nga adda interesna iti nasao a lengguahe.

Kinuna ni Sevilla a a maisuro ti nasao a ganggannaet a lengguahe iti 10 a para publiko nga eskuela iti Metro Manila.

Mayannurot ti panangisuro iti lengguahe a Korean kadagiti Filipino iti Memorandum of Understanding (MOU) a pinirmaan ti DepEd ken ti Korean Embassy iti Filipinas idi pay Hunio 2017.


(Naipablaak iti Bannawag iti Disiembre 3, 2018 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Palagip Kadagiti Mannurat: Maika-3 a Salip iti Sarita ti Albalos Awards

Maipalagip nga aggibus ti Maika-3 a Salip iti Sarita ti Mario Abinsay Albalos Foundation Literary Awards para kadagiti amin a mannurat iti Ilokano inton Enero 31, 2019.

Nabangon ti literary foundation a naipanagan iti daydi Dios-ti-aluadna a mannurat ti Bannawag Mario A. Albalos, tubo iti Cabaroan Daya, Siudad ti Vigan, napadayawan a Pedro Bukaneg awardee ken umuna a Thomas Jefferson awardee iti Estado ti Hawaii a nagnanaedanna agingga iti pimmusay idi Marso 3, 1991 iti edadna a 40.

Isponsoran ni Jenny Alcausin (agnanaed iti California) ti pasalip ti foundation ken agpaay met a mangimaton iti nasao a pasalip da Amado I. Yoro, Jun Abinsay, Priscilla Dela Cruz (agnanaed iti Hawaii) iti pannakitinnulong dagiti kameng ti Bannawag.

Ti kompleto a pagannurotan:

1. Narugian ti salip iti Abril 21, 2018 ken agpatingga iti Enero 31, 2019.

2. Silulukat ti salip kadagiti amin a mannurat iti Ilokano malaksid kadagiti mangimaton ken asideg a kakabagianda, ken kadagiti kameng ti Bannawag.

3. Maysa laeng a sarita ti mabalin nga isalip ti tunggal mannurat a makisalip.

4. Nasken nga orihinal, di pay naipablaak wenno naadaw iti ania man a sinurat ti isalip. Nasken met a saan a naipatarus ti pakisalip manipud iti sabali a lengguahe ken nasken a bukod a putar ti autor ti pakisalipna. Saan met a maawat ti sarita a naisalip idin iti Albalos Awards wenno iti sabsabali pay a salip iti panagsurat iti sarita ken ti sarita a naidatag pay a kas entry iti sabali pay a salip iti panawen a pannakaangay daytoy a pasalip ti Albalos Awards nga agpaut manipud iti pannakalukat daytoy a salip agingga iti pannakapadayaw dagiti mannurat a nangabak iti daytoy a salip.

5. Agatiddog ti pakisalip iti 12-20 a panid iti short bond paper, nai-computer (agusar iti Times New Roman, Font Size 12) iti doble espasio ken addaan iti maysa a pulgada a margin iti amin nga igid ti bondpaper. Masapul met nga agusar iti MS Word format.

6. Ti parbo a nagan ti autor ti agparang a naganna a kas autor ti sarita. Ipatulod ti pakisalip iti uppat a nadalus a kopia ken mapakuyogan iti narikpan a sobre a naglaon iti pudno ken parbo a nagan ti autor, paulo ti pakisalip, kaudian a ladawan ken ababa a pakasaritaan ti biag ti autor, adres ti agdama a pagnaedan, agraman email address ken numero ti selpon wenno telepono a mabalin a pakakontakan iti autor. Iti rabaw ti sobre, isurat ti paulo ti sarita ken parbo a nagan ti autor.

7. Ipatulod ti pakisalip babaen ti koreo wenno personal nga idatag iti daytoy nga adres: 3rd Short Story Writing Contest, Mario Abinsay Albalos Foundation Literary Awards c/o Bannawag, Manila Bulletin Publishing Corp., Muralla corner Recoletos Sts., Intramuros, 1002 Manila. Nasken a maawat ti Bannawag ti pakisalip iti di naladladaw ngem iti Enero 31, 2019. Saan a mairaman iti salip ti entry a maawat kalpasan dayta a petsa.

8. Dagiti gunggona: Umuna a Gunggona, P15,000.00; Maikadua, P12,00.00; ken Maikatlo, P10,000.00. Maipaayan pay dagiti mangabak iti sertipiko ti pammadayaw malaksid iti medalion a maited iti mangyalat iti Umuna a Gunggona. Adda met karbengan dagiti hurado a mangkissay iti bilang dagiti mangabak no awan ti makapatar iti bukodda a pagbatayan dagiti mangabak. Mabalinda met ti mangparnuay iti nayon wenno sabali a gunggona, no kasapulan.

9. Saan a mabalusingsing ti pangngeddeng dagiti hurado malaksid no maduktalan a nasalungasing ti Pagannurotan Bilang 4. No kasta, mapukawto metten ti karbengan ti autor a makisalip pay kadagiti sumarsaruno a pasalip ti Albalos Awards.

10. Makipagtagikua ti Mario Abinsay Albalos Foundation Literary Awards kadagiti mangabak a sarita nupay adda latta karbengan dagiti autor iti copyright dagitoy. Maaddaan pay ti agpasalip iti karbengan a mangipablaak kadagiti mangabak a sarita iti ania man a wagas a kayatna nga aramaten.

11. Mapakaammuanto dagiti mangabak no kaano ken no sadino a maangay ti seremonia ti pammadayaw.


(Naipablaak iti Bannawag iti bilang a Disiembre 3, 2018. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

DISIEMBRE 3, 2018

SARITA
4  Gulnad
    Rodolfo D. Agatep, Jr.
8 Ti Agmarmaro
    David D. Campanano

NOBELA
10 Pan de Amor (7)
     Cris J. Dacuycoy
12 Kudeta (38)
    Norberto D. Bumanglag, Jr.

DANIW
5 Dua a Tweetniw ti Panangannugot
    Roy V. Aragon
22 Dagiti Kronika iti Lasag Dagiti Bagwes
    Derick A. Tong-alan
47 Daniw a Para Ubbing
     Adoracion B. Madarang

SALAYSAY
16 Intayon Ulien ti Mt. Ulap ti Itogon
    Estela A. Bisquera-Guerrero
18 Amangan No Matulongannaka Daytoy Lupluppiit
    Virgilio D. Domaloy
42 Abonuam Met ti Piskeriam
     Reynaldo E. Andres

KOMIKS
24 Miks & Tiks
26 Sweet Jazmine (116)
29 Don Clavio de Ylocos (119)

KOLUM
 6 No Adda Sigsigloten, Adda Met Warwaren
14 Biag ni Ilokano
15 Kastoy, Kapid, Ditoy Hawaii
21 Saludsodem ken ni Apo Hues
23 Dear Doc
32 Okeyka, Apong
36 Ading Kosinera
37 Tips
40 Padasem Daytoy, Kailian

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Balikros
48 Sudoku

DADDUMA PAY
2 Tao, Lugar, Pasamak
9 Ti Makunami
11 Netizone
20 Siled ti Kararag
33 Idi Un-unana a Panawen
34 Ti Tarakenmo ken Sika
35 Panangimaton iti Pagtaengan
38 Ammuem Pay Dagitoy
39 Dagiti Pagannurotan ti Maika-3 a Salip iti Sarita ti Albalos Awards
46 Ti Gasatmo Ita a Lawas


(Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Kuna ti DepEd: Edukasion, ad-adda nga agballigi iti K to 12

Maragsakan ti Department of Education (DepEd) iti panangikeddeng ti Korte Suprema a mayayon iti Konstitusion ti K to 12 a programa ti DepEd.

Kinuna ni Education Secretary Leonor Briones a mamatida a ti nasao a pangngeddeng ti Korte Suprema ti agbalin a dalan iti panangtun-oy daytoy kadagiti panggep a para iti panagrang-ay ti pagilian.

Sakbay daytoy, imbasura ti Korte Suprema dagiti nagtitipon a petision nga indatag dagiti sumagmamano a pagadalan, mannursuro, propesor, ken agpampanday-linteg a mangkukuestionar iti legalidad ti Republic Act 10533, wenno Enhanced Basic Education Act of 2013.

Iti pakaammo ni Briones, kuna daytoy a ti pangngeddeng ti Korte Suprema, isu ti agbalin a dalan tapno nasaysayaat a maidanon ti kalidad, nalaka, maibagay iti panawwen, ken mangwayawaya nga edukasion kadagiti agad-adal a Filipino nga isu met ti naikari a mapagserbian.

Innayon ti Sekretario a maitultuloy ti pannakaipinget dagiti gannuat a mangparnuay kadagiti graduado iti maika-21 a siglo a nagimet kadagiti nasken a tagipatgen ken tungpal-biag a kabaelan a kasapulanda tapno makaibinglayda iti panagdur-as ti gimong ken pannakabukel ti pagilian— nga isu ti kangrunaan a panggep ti programa a K to 12.

Iti babaen ti programa, nayatiddog ti 10-tawen a basic education cycle iti Filipinas ket nagbalin a 13 tawen, kalpasan a nanayonan iti kindergarten ken dua a tawen iti senior high school.

Panggep daytoy a mangpataud kadagiti graduado iti hayskul a nakasagana iti kolehio wenno pannakayempleo, gapu ta malpasda ti basic education iti edad a 18.


(Naipablaak iti Bannawag iti Nobiembre 26, 2018 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Manglabsing iti SRP, maibabawi ti lisensiana

Binallaagan ti National Food Authority (NFA) itay nabiit dagiti negosiante nga aglaklako iti bagas a posible a maibabawi ti lisensiada no aglabsingda iti suggested retail price (SRP) nga ipakpakat ti Department of Agriculture (DA).

Itay katengngaan ti bulan, pormal a narugian ti pannakaipakat ti SRP ti bagas kadagiti probinsia.

Imballaag ni NFA Spokesperson Jerry Imperial a tiliwenda ti asino man a negosiante a manglabsing iti SRP ket ikkatenda ti lisensia daytoy.

Malaksid iti pannakaikkat ti lisensia, maidarum pay dagitoy ket posible a maibalud ken agmultada.

Innayon ni Imperial a mangisaad ti NFA kadagiti polis ken inspektor, kasta met kadagiti opisial ti Department of Trade and Industry (DTI) kadagiti dapon wenno tiendaan tapno maipanamnama ti panangsurot dagiti retailer iti SRP.

Maibatay iti SRP, mailako iti P39 ti kada kilo a local regular milled ken imported well milled rice.

Mailako met ti local well milled rice iti P44 ti kada kilo idinto nga P40-P43 ti kada kilo nga imported premium grade rice, ken P47 ti premium grade.


(Naipablaak iti Bannawag iti Nobiembre 26, 2018 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Sungrod Manipud ken ni "Rosita"

SUNGROD MANIPUD KEN NI “ROSITA.” Maysa  ni Salvador Malazzab ti  Caroan, Gonzaga, Cagayan kadagiti napan nagarnas kadagiti naidaknir a gabat iti igid ti baybay. Mabalin a pagtungo dagitoy. Didigra man ti inyeg ni Bagyo Rosita, adda met pagsayaatan nga intedna. Dakkel a tulong para kadagiti lumugar dagitoy a banag ta narigat ti pagalaan iti kayo a pagsungrod iti daytoy a lugar. (EMY INES)


(Naipablaak iti Bannawag iti Nobiembre 26, 2018 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Alvarez, Nesperos iti 1st Gabriela Prize

Da Johmar R. Alvarez ti Mabuttal East, Ballesteros, Cagayan (agnanaeden iti Ontario, Canada), ken Daniel L. Nesperos ti San Lorenzo, San Nicolas, Ilocos Norte dagiti nangabak iti Salip iti Daniw ti umuna a Gabriela Prize (Premio Gabriela).

Manipud iti 18 a dandaniw, inyalat ti daniw ni Alvarez nga “Agkapeta Latta, Alipaga” ti Umuna a Premio. Nagun-od met ti daniw ni Nesperos a “Ti Kayo” ti Maikadua a Premio. Awan ti napili a daniw a pakaipaayan ti Maikatlo a Premio.

Nairaman a kas finalist dagiti daniw a “Pirma” ni Jaime G. Raras ti Candon City; “Dua nga Anniniwan ti Sipnget: Ora Pro Nobis” ni Vincent Cab. Berroy ti Manabo, Abra; “Taymli a Dandaniw” ni Jaime M. Agpalo Jr. ti Baguio City; “Ila” ni Marichel E. Suguitan ti Solano, Nueva Vizcaya; ken “Ti Balud Politikal Ket Maysa a Mannaniw” ni Rene Boy E. Abiva ti Cabanatuan City.

Dagiti nagpaay a kameng ti hunta dagiti hurado: Junley L. Lazaga, chairman; Ariel S. Tabag, kameng; ken Ria B. Rebolledo, kameng.

Ti Imnas & Iway Publications, maysa nga independiente nga small press nga agiprodprodius iti zines, chapbooks, ken libro nga Ilokano, ti mangtartarawidwid iti Gabriela Prize.

Padaanan ti pannakalukat ti sumaruno a salip iti daniw ti 2nd Gabriela Prize (2019). Maipablaak dagiti pagannurotan iti mabiit.


(Naipablaak iti Bannawag iti Nobiembre 26, 2018 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Para Kadagiti Amin a Mannurat: Maika-8 a Pasalip ALVIYA iti Sarita

Para iti agtultuloy nga itutulong ti ALVIYA Literary Foundation iti panagrangpaya ti literatura ni Ilokano, ipakaammo ti Secretariat ti  ALVIYA  Literary Foundation nga agawaten kadagiti sarita a para iti Maika-8 a Pasalip ALVIYA (2018-2019).  Is-isponsoran ni Alex V. Yadao, maysa a patron ti Literatura Ilokana a tubo iti Libertad, Abulug, Cagayan ngem agdama nga agnanaed  iti Siudad ti New York iti Estados Unidos, ti nasao a salip. Imatonan met daytoy ni Dr. Freddie P. Masuli ti Cagayan State University; iti pannakitinnulong ti GUMIL Cagayan.

Dagiti pagannurotan:

1. Silulukat ti salip kadagiti amin a mannurat nga Ilokano ken uray pay kadagiti saan nga Ilokano ngem makasurat iti lengguahe nga Ilokano.

2. Nawaya ti makisalip a mangpili iti ania man a tema a kayatna a suraten.

3. Agatiddog ti pakisalip iti 15-20 a panid iti short bond paper, nai-computer (agusar iti Times New Roman, Font Size 12)  iti doble espasio  ken addaan iti maysa a pulgada a margin iti amin nga igid ti bond paper.

4. Maysa laeng a sarita ti maipalubos nga isalip ti tunggal mannurat a makisalip.   

5. Nasken a bukod a putar ti autor ti maisalip, saan pay a naipablaak iti ania man a magasin, ken saan a patarus manipud iti ania man a lengguahe.

6. Ti laeng parbo a nagan ti autor ti agparang iti manuskrito a maisalip. Mapakuyogan ketdi ti opisial nga entry iti maysa pay a dokumento a nakailanadan dagitoy: (1) paulo ti sarita, (2) parbo ken pudno a nagan, ken (3) kabibiag ti autor agraman numero a pakakontakan kenkuana.

7. Ipatulod dagiti dua a dokumento (sarita ken ti impormasion maipanggep iti autor) babaen ti elektroniko a wagas (email) iti daytoy nga email account: freddie.padua.masuli@gmail.com. 

8. Nasken a maipatulod iti Secretariat dagiti dua a dokumento iti saan a naladladaw ngem alas 11:59 iti rabii ti  Pebrero 28, 2019 (oras iti Filipinas).

9. Ania man a pangngeddeng dagiti hurado, agtalinaed a kasta malaksid no maduktalan a nasalungasing ti Pagannurotan Bilang 5. Awananto metten ti autor iti gundaway ken pribilehio a makisalip pay kadagiti masungad a pasalip ti ALVIYA.

10. Makipagtagikua ti ALVIYA Literary Foundation kadagiti mangabak a sarita nupay adda latta karbengan ti autor iti copyright daytoy. Maaddaan pay ti agpasalip iti karbengan a mangipablaak kadagitoy mangabak a sarita iti ania man a wagas a kayatna karamanen iti elektroniko ken tradisional a wagas ti panagipablaak. 

11. Dagiti Gungona: First Prize, P20,000.00; Second Prize, P10,000.00; ken Third Prize, P7,000.00 ken dua a consolation prizes a sag-P3,000.00. Addanto met maited a sertipiko kadagiti amin a mangabak.

12. Mayawat dagiti premio kadagiti autor bayat ti GUMIL Filipinas National Convention iti masungad a kalgaw.   


(Naipablaak iti Bannawag iti bilang a Nobiembre 26, 2018. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

NOBIEMBRE 26, 2018

SARITA
 4  Ti “Urtugrapya” ni Dr. Calangacang
     Joel B. Manuel
 8 Ti Igat
    B. Dian Interior


NOBELA
10 Pan de Amor (6)
     Cris J. Dacuycoy
12 Kudeta (37)
    Norberto D. Bumanglag, Jr.

DANIW
5 Adda Saem iti Panagmaymaysa
   Romel A. Pascua
9 Isasarungkar
   Marichel E. Suguitan
22 Sirib
     Rene Boy E. Abiva
23 Ubbog ti Lagip
      Jobert M. Pacnis
47 Daniw a Para Ubbing
     Marlyn Garcia-Del Rosario

SALAYSAY
16 Kawayan ti Usarenda nga Andamio iti Hong Kong
     Fernando B. Sanchez
42 Nasamay a Ganagan ti Usang
     Reynaldo E. Andres

KOMIKS
24 Miks & Tiks
26 Sweet Jazmine (115)
29 Don Clavio de Ylocos (118)

KOLUM
 6 No Adda Sigsigloten, Adda Met Warwaren
14 Biag ni Ilokano
15 Kastoy, Kapid, Ditoy Hawaii
19 Saludsodem ken ni Apo Hues
32 Okeyka, Apong
36 Ading Kosinera
37 Tips
40 Padasem Daytoy, Kailian

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Balikros
48 Sudoku

DADDUMA PAY
2 Tao, Lugar, Pasamak
11 Netizone
18 Siled ti Kararag
20 Dagiti Pagannurotan ti Maika-8 a Pasalip ALVIYA iti Sarita
21 Managsukisok Koma Met Dagiti Mannursuro
33 Idi Un-unana a Panawen
34 Ti Tarakenmo ken Sika
35 Pagtaengan
38 Ammuem Pay Dagitoy
39 Haytek
46 Ti Gasatmo Ita a Lawas


(Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Para Kadagiti Agdadamo a Mannurat: Salip iti Sarita ti 21st AMMAFLA

Agawaten ti Secretariat ti AMMA Foundation Literary Awards (AMMAFLA) kadagiti entry a para iti Salip iti Sarita ti Maika-21 nga AMMAFLA. Aggibus ti salip iti Enero 15, 2019.

Nairanta ti pasalip ti AMMAFLA kadagiti agdadamo a mannurat iti Ilokano a “kas pangaron iti reggetda a mangpatadem pay iti plumada.”

Kas kadagiti sarita a nangabaken iti pasalip ti AMMAFLA, mairamanto met a mailibro dagiti sarita a mangabak iti daytoy nga edision ti AMMAFLA, kas kinuna dagiti mangimaton iti AMMAFLA a da Amado ken Gloria Yoro, Francisco ken Aurora Ponce, ken Alfredo ken Cherry Quibol (agpapada nga agindegen iti Hawaii).

Inruar ti AMMAFLA ti librona a Dagiti Premiado a Sarita (1997-2014) iti kombension ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, idi 2015. Naipalaon iti nasao nga antolohia dagiti nangabak a sarita iti AMMAFLA sipud narugian ti salip idi 1997 agingga iti 2014.

Dagiti pagannurotan ti maika-21 nga edision ti salip.

1. Aggibus ti salip iti Enero 15, 2019.

2. Agpaay laeng ti salip kadagiti agdadamo a mannurat iti Ilokano. Iti daytoy a salip, maibilang nga agdadamo ti mannurat no awan pay ti naipablaak a saritana iti Bannawag. No adda man, di koma nasursurok ngem tallo ti naipablaakna agingga iti Abril 23, 2018 a bilang ti nasao a magasin.

3. Siwawayawaya ti autor a mangpili iti topiko ti isalipna a sarita.

4. Agatiddog ti sarita iti 10-15 a panid iti short bond paper, naimakinilia, wenno saan, naikompiuter iti doble espasio (Times Roman Medium 12 pts. iti computer), ken adda espasio wenno margin a maysa a pulgada iti amin nga igid ti papel.

5. Maysa laeng a sarita ti mabalin nga isalip ti tunggal autor.

6. Nasken nga orihinal, di pay naipablaak wenno naadaw iti ania man a sinurat ti isalip. Nasken met a saan a naipatarus ti pakisalip manipud iti sabali a lengguahe ken nasken a bukod a putar ti autor ti pakisalipna. Saan met a maawat ti sarita a naisalip idin iti AMMAFLA wenno iti sabsabali pay a salip iti panagsurat iti sarita ken ti sarita a naidatag pay a kas entry iti sabali pay a salip iti panawen a pannakaangay daytoy a salip ti AMMAFLA nga agpaut manipud iti pannakalukat daytoy a salip agingga iti pannakapadayaw dagiti mannurat a nangabak iti daytoy a salip.

7. Ti parbo a nagan ti autor ti agparang a naganna a kas autor ti sarita. Ipatulod ti pakisalip iti tallo a nadalus a kopia ken pakuyogan iti narikpan a sobre a naglaon iti pudno ken parbo a nagan ti autor, paulo ti pakisalip, kaudian a ladawan ken ababa a pakasaritaan ti biag ti autor, adres ti agdama a pagnaedan, agraman email address ken numero ti selpon wenno telepono a mabalin a pakakontakan iti autor. Iti rabaw ti sobre, isurat ti paulo ti sarita ken parbo a nagan ti autor.

8. Ipatulod ti pakisalip babaen ti koreo wenno personal nga idatag iti daytoy nga adres: Short Story Writing Contest, 21st AMMAFLA, c/o Bannawag, Manila Bulletin Publishing Corp., Muralla corner Recoletos Sts., Intramuros, 1002 Manila. Nasken a maawat ti Bannawag ti pakisalip iti di naladladaw ngem iti Enero 15, 2019. Saan a mairaman iti salip ti entry a maawat kalpasan dayta a petsa.

9. Dagiti gunggona: Umuna a Gunggona, P10,000.00; Maikadua, P8,500.00; ken Maikatlo, P7,000.00. Maipaayan pay dagiti mangabak iti sertipiko ti pammadayaw. Adda met karbengan dagiti hurado a mangkissay iti bilang dagiti mangabak no awan ti makapatar iti bukodda a pagbatayan dagiti mangabak. Mabalin met a mangparnuayda iti sabali wenno nayon a gunggona, no kasapulan.

10. Mapakaammuanto dagiti mangabak no kaano ken sadino ti pakapadayawanda. No met matakuatan a sinalungasing ti mangabak ti Pagannurotan Blng. 2 wenno ti Blng. 6, maibabawi ti premiona ken mapawilanton a makisalip iti ania man a pasalip ti AMMAFLA.


(Naipablaak iti Bannawag iti Nobiembre 19, 2018 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

P47-M nga agas, nakasagana

Adda agpateg iti P47-milion a nadumaduma nga agas nga insagana ti Department of Health (DoH) tapno maiwaras kadagiti lugar a dinidigra ni Bagyo Rosita, nupay sangkabassit laeng ti epekto daytoy iti Cagayan ken Isabela.

Kinuna ni Health Secretary Francisco Duque III a nakaiwarasen ti DoH iti P12-milion ti pategna nga agas ken suplay, karaman ti paracetamol, antibiotiko, ken dadduma pay.

Adda pay nakasagana nga agas a kas pangantisipar ti DoH iti panagadu ti sakit a kas iti hypertension, gurigor, diarrhea, acute respiratory infection, ken dadduma pay.


(Naipablaak iti Bannawag iti bilang a Nobiembre 19, 2018. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Biahe nga Agpa-Aparri

BIAHE NGA AGPA-APARRI. Makarkargaan daytoy panakkelen a lampitaw kadagiti produkto ti puro ti Camiguin iti Calayan, Cagayan a kas iti irik, saba, ikan, diro ken dadduma pay a maibiahe ken mailako iti ili ti Aparri. Agpaut iti agarup 6 nga oras wenno nasursurok pay ti biahe agbatay iti kalinak wenno kapalong ti baybay. (ROY V. ARAGON)


(Naipablaak iti Bannawag iti bilang a Nobiembre 19, 2018. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

OFW, saan nga agbayad iti terminal fee

Napalagipan manen dagiti overseas Filipino workers (OFWs) a saanda a karaman iti panagbayad iti terminal fee; ketdi, ipakitada laeng ti dokumentoda.

Kinuna ni Manila International Airport Authority (MIAA) General Manager Ed Montreal a no ti tiket iti eroplano ket nagatang iti online, masapul nga ipakita ti OFW ti overseas employment certificate (OEC) iti airline counter tapno mai-refund ti terminal fee ken mabalinda met ti mapan iti MIAA administration building manipud iti Lunes agingga iti Biernes, iti alas otso iti bigat agingga iti alas singko iti malem.

Rinugianen ti MIAA ti public hearing mainaig iti pannakaingato ti terminal fee. Maibatay iti MIAA, manayonan ti singir iti terminal fee iti P200 agingga iti P300 para iti domestic ken P550 agingga iti P750 para kadagiti pasahero dagiti internasional a biahe mangrugi inton Abril 2019.

Kuna ti MIAA a masapul a maingato ti terminal fee gapu ta ngimmato met ti magasto iti pannakamantener ken pannakapataray dagiti terminal iti NAIA.


(Naipablaak iti Bannawag iti bilang a Nobiembre 19, 2018. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Panagusar iti e-cigarette, manamnama a makontrol

Manamnama a mayetnag iti mabiit ti pammilin iti pannakakontrol iti panagusar iti vape wenno e-cigarette iti pagilian.

Mainaig daytoy iti pannakadangran ti maysa a tin-edier a nagusar iti daytoy a gapu met ti nakiumanan ti Department of Health (DoH) iti Food and Drugs Administration (FDA).

Kinuna ni Health Secretary Francisco Duque III a ti FDA ti mangsipsiput kadagiti nasao a produkto a kas medical products ta nagimet daytoy iti nikotina. Ngem agingga ita, awan pay ti device wenno e-liquid a rehistrado wenno naadalen ti FDA tapno maipanamnama ti kinatalgedna, no ania maipaayna, ken ti kalidad daytoy.

Naireport a bimtak ti vape bayat ti panangus-usar ti agtutubo iti daytoy.


(Naipablaak iti Bannawag iti bilang a Nobiembre 19, 2018. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

NOBIEMBRE 19, 2018

SARITA
 4 Nakakidem a Simumulagat
    Jaime M. Agpalo, Jr.

NOBELA
10 Kudeta (36)
    Norberto D. Bumanglag, Jr.
12 Pan de Amor (5)
     Cris J. Dacuycoy

DANIW
5 Dinakto Malipatan
    Fernando B. Sanchez
18 Ingel
     Elmer L. Lopez
47 Daniw a Para Ubbing
     Adoracion B. Madarang

SALAYSAY
 8 Sursorentayo Man Met ti Tuba
    Estela A. Bisquera-Guerrero
16 Ania Ngamin, Aya, ti Dida Kayat iti KWF?
     Neyo Mario E. Valdez
42 Maliklikan Met Dagitoy Kangrunaan a Sakit ti Mais
     Reynaldo E. Andres

KOMIKS
24 Miks & Tiks
26 Sweet Jazmine (114)
29 Don Clavio de Ylocos (117)

KOLUM
 6 No Adda Sigsigloten, Adda Met Warwaren
14 Biag ni Ilokano
15 Kastoy, Kapid, Ditoy Hawaii
21 Saludsodem ken ni Apo Hues
23 Dear Doc
32 Okeyka, Apong
36 Ading Kosinera
37 Tips
40 Padasem Daytoy, Kailian

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Balikros
48 Sudoku

DADDUMA PAY
2 Tao, Lugar, Pasamak
11 Netizone
19 Siled ti Kararag
20 Dagiti Pagannurotan ti 21st AMMAFLA
22 No Adda Ammom, Adda Maisurom
33 Idi Un-unana a Panawen
34 Ti Tarakenmo ken Sika
35 Pagtaengan
38 Ammuem Pay Dagitoy
39 Haytek
46 Ti Gasatmo Ita a Lawas

(Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Facebook, inikkatna dagiti ‘spam network’ iti Filipinas

Inikkat ti kompania iti social media a Facebook ti nasurok a 100 a ‘page’ ken ‘account’ a karaman iti “spam network” a naduktalan nga agkamkamal iti kuarta manipud iti pananggundaway dagitoy kadagiti Filipino nga agar-aramat iti Facebook.

Naikkat ti agdagup iti 95 a page ken 39 nga account nga addaan iti linaon a politika ken showbiz iti nasao a social media platform itay napalabas a bulan gapu iti “pananggutigot kadagiti tattao a mangbisita kadagiti nababa-ti-kalidadna a website a naglaon iti sangkabassit ken nalag-an nga impormasion a napno iti makakuriro nga anunsio.”

Saan a nairuar ti sibubukel a listaan dagiti naikkat nga account ngem karaman ditoy dagiti agkunkuna a mangsupsuportar kada Presidente Duterte ken Ilocos Norte Gov. Imee Marcos a pakairamanan ti Duterte Media, Duterte sa Pagbabago Bukas, DDS, Duterte Phenomenon, ken Manang Imee.

Naikkat pay dagiti account a nagusar kadagiti nagan ken ladawan dagiti nalatak a celebrity, kasta met dagiti generic a panid a para kadagiti “damdamag” a kas iti News Media Trends ken Pilipinas Daily News.

Kuna ti Facebok nga agiwarwaras laeng dagitoy iti link iti isu met laeng nga advertising click farms. Iti ababa a pannao, no iklikmo dagitoy a link, makaganar dagiti mangmanmantener kadagitoy.

Innayon ti Facebook a kalikagumanna laeng a yadayo dagiti tattao kadagiti website a saan a nasayaat ti linaon wenno it-itedna nga impormasion.

Daytoy nga addang ti Facebook iti Filipinas ket kapadana ti napasamak iti Estados Unidos iti daytoy nasapa a paset ti Oktubre a nagikkatanda iti 559 a panid ken 251 nga account gapu iti agtultuloy a pananglabsing dagitoy kadagiti pagalagadan maipapan iti spam ken saan a mainugot a tignay.

Naduktalan nga agus-usar dagiti spam network kadagiti nabara ken mapagsasaritaan nga isyu iti politika tapno makaganarda babaen ti panagpaadu iti ‘audience’ nga iturongda kadagiti bukodda a website.


(Naipablaak iti Bannawag iti Nobiembre 12, 2018 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Pigisemon, Kayong!

PIGISEMON, KAYONG! Pinigis dagiti kameng ti GUMIL Filipinas ti tarpaulin ti akkub ti “Ortograpiya ti Pagsasao nga Ilokano” a kas simbolo ti nalaus a panangtubngarda iti pannakaiwaras daytoy kadagiti para publiko a pagadalan. Napasamak daytoy kalpasan ti Press Conference nga inangay GUMIL Filipinas iti Graduate School Bldg. iti kampus ti Mariano Marcos State University iti Siudad ti Laoag idi Oktubre 28 a pormal a nangipakaammuan ti gunglo iti pagtaktakderanna maipanggep iti ortograpia ti pagsasao nga Ilokano. (N.M.E. Valdez/ Rinetrato ni Freddie G. Lazaro)


(Naipablaak iti Bannawag iti bilang a Nobiembre 12, 2018. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

‘Adu ti rirona’ nga ortograpia ti KWF, kinontra dagiti mannurat nga Ilokano

Kinontra dagiti mannurat nga Ilokano ti ortograpia ti lengguahe nga Ilokano nga inruar ti Komisyon sa Wikang Filipino (KWF) ken kiniddawda ti panaglusulos ni Dr. Purificacion Delima (komisioner iti KWF para iti Ilokano) ken ti chairman daytoy a ni National Artist Virgilio S. Almario.

Iti press conference a naiwayat itay Oktubre 28 iti Mariano Marcos State University (MMSU) Graduate School iti Siudad ti Laoag, kinuna dagiti kameng ti Gunglo Dagiti Mannurat nga Ilokano iti Filipinas (GUMIL Filipinas) a kakaduada dagiti nadumaduma nga organisasion ken indibidual a maseknan iti lengguahe nga Ilokano a sipipinget a mangkontra iti naibasar-iti-Tagalog nga “Ortograpiya ti Pagsasao nga Ilokano” nga inyalnag ti KWF idi Oktubre 18 iti regional office ti Department of Education (DepEd) iti La Union.

Kinuna ni Cagayan Board Member Vilmer V. Viloria, agtaktakem a presidente ti GUMIL Filipinas, a nupay suportaran ti grupo ti inisiatibo ti KWF iti panangparang-ayna iti nailian a lengguahe nga isu ti Filipino, lagidawenda ti gannuat ni Almario a mangusar iti Ortograpiyang Pambansa a kas pagbatayan ti ortograpia para iti Ilokano, ta no maaramid daytoy, maiwalin ti agdama ken am-ammo a sistema ti panagsurat iti Ilokano.

Maipalagip nga idi 2012, pormal nga inruar ti KWF ti ortograpia ti lengguahe nga Ilokano, ti “Tarabay iti Ortograpia ti Pagsasao nga Ilokano” (Guide to the Orthography of the Ilocano Language) kalpasan dagiti naangay nga umno a konsultasion kadagiti eksperto iti lengguahe, mannurat, editor dagiti nadumaduma a pablaakan, ken mannursuro. Naibasar ti nasao nga ortograpia iti pannakasurat dagiti Ilokano a diksionario, nailian a magasin ken dadduma pay a pablaakan, patarus ti Biblia, ken dadduma pay a porma ti Ilokano a kas maisursuro kadagiti unibersidad ti gobierno iti Filipinas ken iti abroad a pakaididiayaan dagiti kurso iti lengguahe nga Ilokano.

Ngem iti panagtugaw ni Almario a chairman iti KWF, inwalinna ti “2012 Tarabay” ket babaen ken ni Delima, nangbukel ti KWF iti “malisioso” ken “bastardisado” a bersion dagiti pagalagadan iti panagsurat iti Ilokano babaen ti panangdutokda kadagiti tattao a saan nga eksperto iti panagsurat iti Ilokano tapno aramidenda ti nasao nga ortograpia.

Segun ken ni Viloria, awan kadagiti nainagan iti “grupo ti nagsurat” iti nasao nga ortograpia ti am-ammo a kas edukador wenno mannurat nga addaan iti umdas nga ammo iti sistema ti panagsurat iti Ilokano, wenno saanda a nakapagsurat iti ania man a nasayaat nga Ilokano nga artikulo a naipablaak iti magasin wenno diario nga addaan iti nasaknap a sirkulasion.

Innayon pay ni Viloria nga uray ni Delima a mismo, saan nga eksperto iti lengguahe nga Ilokano.

Kinuna ni Viloria a ti pannakaisuro kadagiti ubbing nga Ilokano ti “Tagalog” a bersion dagiti Ilokano a balikas iti pagadalan a maisupadi met iti ispeling dagiti mabigbig a magasin nga Ilokano ken uray pay iti Nasantuan a Biblia, makaipaay laeng iti pannakatikaw kadagiti ubbing agramanen dagiti mannursuroda.

Iti sabali a bangir, kinondenar met ni Dr. Aurelio S. Agcaoili, propesor iti University of Hawaii at Manoa a mangisursuro kadagiti kurso iti lengguahe nga Ilokano, ti nasao a narebisar nga ortograpia. Kinunana a “basura” daytoy ken aramid ti autokratiko a panagipapilit iti riro a pagannurotan iti panagsurat iti Ilokano. (Reynaldo E. Andres)


(Naipablaak iti Bannawag iti bilang a Nobiembre 12, 2018. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

NOBIEMBRE 12, 2018

SARITA
 4 Sarming
    Paul Blanco Zafaralla
 8 Atang
    Gregorio Bermudez

NOBELA
10 Kudeta (35)
    Norberto D. Bumanglag, Jr.
12 Pan de Amor (4)
     Cris J. Dacuycoy

DANIW
5 Uray Man No Mano a Malem
   Elizabeth M. Raquel
9 Dua a Tweetniw ti Lantip
   Roy V. Aragon
22 Bay-am nga Iggamak ti Imam
     Linda T. Lingbaoan
32 Ken ni Manong
      Fred A. Quibol
47 Daniw a Para Ubbing
      Leizel A. Quitola

SALAYSAY
16 Ni Nana Paul a Kas “Sibibiag a Gameng ti San Nicolas”
     Daniel L. Nesperos
42 Tapno Adu ti Maapittayo a Diket a Mais iti Kailokuan
     Reynaldo E. Andres

KOMIKS
24 Miks & Tiks
26 Sweet Jazmine (113)
29 Don Clavio de Ylocos (116)

KOLUM
 6 No Adda Sigsigloten, Adda Met Warwaren
14 Biag ni Ilokano
15 Kastoy, Kapid, Ditoy Hawaii
19 Saludsodem ken ni Apo Hues
21 Okeyka, Apong
23 Dear Doc
35 Ading Kosinera
37 Tips
40 Padasem Daytoy, Kailian

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Balikros
48 Sudoku

DADDUMA PAY
2 Tao, Lugar, Pasamak
11 Netizone
18 Siled ti Kararag
20 “Siak ni Carlos Bulosan”
33 Idi Un-unana a Panawen
34 Ti Tarakenmo ken Sika
36 Pagtaengan
38 Ammuem Pay Dagitoy
39 Haytek
46 Ti Gasatmo Ita a Lawas