Naluktan ti kaunaan nga LGU-operated out-patient drug rehabilitation center iti entero a pagilian iti Agoo, La Union idi Septiembre 12, 2018. Naisayangkat daytoy a gannuat ti gobierno munisipal ti nasao nga ili babaen ti liderato ti mayor ti nasao nga ili, ni Dr. Stefanie Ann Y. Eriguel, ken iti pannarabay ti Diputado ti Segundo Distrito ti La Union nga inana, ni Dr. Sandra Y. Eriguel, ken iti pannakikammayet dagiti nadumaduma nga ahensia ti gobierno nasional.
Malaksid iti dayta, naluktan pay iti nasao nga ili ti Philippine Drug Enforcement Agency (PDEA)-Satellite Office ken “Balay Silangan,” “Balay Silangan” ti awag iti Reformation Program ti PDEA a para kadagiti simmuko a nagar-aramat iti maiparit nga agas. Daytoy ti agserbi a pagtaengan dagiti drug offenders “para iti panagbalbaliw ken panagdaliasatda iti nasayaat a dana ken ti panangrugida iti baro a biag bayat ti rehabilitasionda.” Ditoy a maikkan dagiti offenders iti livelihood skills training ken nadumaduma pay a pangabaruanan a programa. Ti met laeng Balay Silangan iti Agoo ti umuna a nabangon a kastoy a pasdek iti Rehion Uno.
Nagpaay ni USec. Jimmy L. Manabat iti Presidential Anti-Organized Crime Commission ti naisangsangayan a sangaili iti nasao nga okasion. Timmabuno met da Dir. Ismael G. Fajardo, Jr., Deputy Director for General Administration ti PDEA, Gobernador Francisco Emmanuel “Pacoy” R. Ortega III ken Dir. Bryan B. Babang iti PDEA-Regional Office I.
Dagitoy a gannuat ket paset ti pannakibulig ti LGU Agoo iti kampania ni Presidente Duterte kontra iti maikaniwas a droga. Malaksid ti dayta, ti nasao a drug rehab center ken opisina ti PDEA ti agserbi a kamang dagiti naiwawa nga umili iti akin-abagatan a paset ti La Union ken dagiti kabangibang nga ili ti Pangasinan. (Joseph R. Sermonia)
(Naipablaak iti Oktubre 8, 2018 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment