Mangididiaya ti Home Development Mutual Fund (HDMF), ad-adda nga am-ammo a kas Pag-IBIG (Pagtutulungan sa kinabukasan: Ikaw, Bangko, Industriya at Gobyerno) Fund, iti Calamity Loan Program iti asino man a miembro ti Pag-IBIG Fund a dinidigra ni Bagyo Ompong.
Mabalin a makautang ti kualipikado a miembro ti Pag-IBIG Fund iti agingga iti 80% ti Total Accumulated Value (TAV) wenno dagup ti naitinnagna maibatay kadagiti pagalagadan ken kondision ti programa. Ti porsiento ti Calamity Loan Interest ket 5.95% tunggal tawen. Mabayadan met ti mautang (loan) iti 24 a bulan, ken adda tallo (3) bulan a mabalin a pakawaywayanna. Mangrugi ti tiempo ti panagbayad iti maika-4 a bulan kalpasan ti petsa iti tseke. Mabalin nga ipila ti aplikasion iti utang (loan) iti uneg ti 90 nga aldaw kalpasan ti pannakaideklarar ti State of Calamity.
Tapno kualipikado ti maysa a kameng, masapul a daytoy ket: nakaitinnag iti di nababbaba ngem 24 a binulan a kontribusion; aktibo a miembro nga addaan iti di nababbaba ngem lima (5) a binulan a kontribusion iti napalabas nga innem (6) a bulan iti bulan sakbay ti petsa ti panagaplay iti loan; agnanaed iti lugar a karaman iti indeklarar ti Office of the President wenno ti maseknan a lokal a Sanggunian (Councils) iti babaen ti state of calamity.
Saan a limitado ti programa iti pautang kadagiti apektado iti nakaro a didigra gapu iti paniempo. Mabalin pay kadagiti nakaro a nadidigra gapu iti natural a kalamidad a kas iti nakaro a layus wenno ginggined.
Para iti ad-adu pay nga impormasio, kontaken ti Pag-IBIG 24/7 customer care hotline: (02) 724 4244, wenno bisitaen ti website: pagibigfund.gov.ph.
(Naipablaak iti Oktubre 1, 2018 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment