PhP40-B a badiet ti libre nga edukasion iti kolehio, nailatang

Inlatang ti Kamara ti 40-bilion a pisos a para iti libre nga edukasion iti kolehio iti umay a tawen iti nasurok a sangagasut nga state universities and colleges (SUCs) ken eskuela a pumpunduan ti lokal a gobierno.

Kas kuna ni Diputado ti Davao City Karlo Nograles, chairman ti appropriations committee, naawid ti 30-bilion a pisos ti nasao nga 40-bilion a pisos manipud iti school building a programa ti Departamento ti Edukasion (DepEd).

Segun ken ni Nograles, nayakar ti pondo dagiti proyekto iti pasdek ti eskuela nga addaan iti problema iti lugar a pakaipatakderan ket naipan iti pondo a para iti libre nga edukasion iti kolehio.

Innayon ni Nograles a nangawid pay ti komite iti 6-bilion a pisos manipud kadagiti programa iti scholarship ti Commission on Higher Education (CHED) ken  SUCs idinto a ti 3-bilion pisos, naawid met manipud iti Department of Transportation ken ti 1-bilion pisos, naawid manipud iti Department of Information and Communications Technology.

Daytoy  gakat a 40-bilion a pisos a badiet, sakupenna ti libre a tuision ken gastos iti miscellaneous dagiti amin nga SUC kasta met dagiti kolehio ken unibersidad kadagiti lokal a gobierno nga akreditado iti CHED. Sakupen pay daytoy ti libre a teknikal ken bokasional nga edukasion nga ididiaya dagiti tech-vocational school nga adda iti babaen tii Technical Education and Skills Development Authority (TESDA).

Inwayat ti komite ni Nograles ti panagyakar iti pondo sakbay a naipinal ti Kamara ti bersion daytoy ti gakat iti 3.8-trillion a pisos a nailian a badiet a para iti 2018.

Pinirmaan ni Presidente Duterte ti libre nga edukasion iti kolehio uray ammona nga awan ti madadaan a pondo a para iti daytoy. Impabaklayna ketdi ti parikut kadagiti agpampanday-linteg, a nagkunaanna nga ammo met dagitoy nga awan ti pondo idi inaprobaranda ti programa.

Mangnamnama ni Nograles a maaprobaran ti gakat iti maikatlo ken maudi a paannakaibasana sa maipatulod iti Senado.

Target dagiti agpampanday-linteg ti Nobiembre 15 a petsa a panangpirma ni Presidente Duterte iti nadakamat a gakat iti badiet tapno agbalin a linteg.


(Naipablaak iti Bannawag, Oktubre 9, 2017 a bilang.)