Dap-ayan 2017, panangrambak dagiti mannurat nga Ilokano iti Bulan ti Literatura

Rambakan dagiti mannurat nga Ilokano ti Abril a kas Bulan ti Literatura Dagiti Ilokano iti daytoy Abril 21-23, 2017 iti Union Christian College (UCC), City of San Fernando, La Union.

Am-ammo a kas “Dap-ayan 2017: Komperensia iti Lengguahe ken Literatura Dagiti Ilokano ken Maika-49 a Nailian a Kombension ti GUMIL Filipinas,” iwayat ti nasao a gunglo dagiti mannurat nga Ilokano ti panagrambak, iti pannakitinnulong ti National Commission for Culture and the Arts ken sangailien ti GUMIL La Union nga idauluan ni Eddy Almodovar.

Addaan iti tema a “Ni Mannurat ken ti Nakaparsuaan,” mayannurot ti nasao a panagrambak iti Proklamasion Bilang 26 ni dati a Presidente Gloria Macapagal-Arroyo idi Abril 2001 a nangideklarar iti Abril a kas Bulan ti Literatura Dagiti Ilokano.

Aglektiur dagiti mabigbigbig a mannurat nga Ilokano a kas kada Bannawag Editor Cles B. Rambaud, sigud a Bannawag Editor Dionisio S. Bulong, Linda Lingbaoan-Bulong, Eliseo B. Contillo, Joel B. Manuel, Roy V. Aragon, Norberto D. Bumanglag, Jr., Neyo Mario E. Valdez, Aileen R. Rambaud, Anna Liza M. Gaspar, Dr. Freddie Pa. Masuli, Junley Lorenzana Lazaga, Eddy Almodovar, Villamor Visaya, Eugene Carmelo Cabanilla Pedro, ken Mario T. Tejada.

Ni met Dr. Myrna l. Carreon, presidente ti UCC, ti naisangsangayan nga agsarita (keynote speaker).

Iti umuna a rabii ti Dap-ayan, mayawat ti premio dagiti nangabak kadagiti nadumaduma a pasalip a kas iti Salip iti Sarita ti AMMA Foundation Literary Awards, Salip iti Sarita ti Mario Abinsay Albalos Foundation Literary Awards for Ilokano Literature, Salip iti Sarita ti Pasalip Alviya, ken Salip iti Daniw ti Saniata Prize.

Mayalnag met dagiti libro a Fighting Pogi ni Dionisio S. Bulong, Kalinawa ni Linda T. Lingbaoan-Bulong, ken Mission: Black Ops ni Norberto D. Bumanglag, Jr.

Iti Rabii ti Kultura iti maikadua a rabii, maipabuya dagiti nadumaduma nga oral a kannawidan dagiti Ilokano.

Iti maikatlo nga aldaw, maangay ti eleksion ti gunglo ken mayalnag ti agmakatawen a pannakarambak ti Maika-50 a Tawen ti GUMIL Filipinas.

Mainaig iti daytoy, mayannurot pay daytoy nga okasion dagiti mannurat nga Ilokano iti Proklamasion Bilang 968 idi Pebrero 2015 a pinirmaan ni pasado a Presidente Benigno Aquino a nangideklarar iti Abril a kas National Literature Month.

Para kadagiti interesado a dumar-ay iti nasao a komperensia ken kombension, makiuman ken ni Teofilo Damoco iti 0939 968 7836.


(Naipablaak iti Bannawag, Abril 24, 2017 a bilang.)