Miki ti Bangued

MIKI TI BANGUED. Maysa a kangrunaan a merienda ti miki iti Kailokuan ket uray iti Abra, paboritoda met daytoy. Iti Bangued, maysa kadagiti kalatakan a pagmikian ti Acosta Pancitan iti nagsulian ti Actividad St. ken provincial road nga agpa-La Paz. Pilpilaan dagiti kostumer ti naraman a miki ditoy,  mangalaka iti bukodmo a malukong ket ipilam a pakargaan iti pilim a ramen: P17 ti miki, a nayonam iti itlog (P7), sa rorog (P16), awag iti nair-irap a karne a naalas-as manipud iti nalambong a paragpag ken tultulang ti baboy. Adda pay tsitsaron (P20). Ken ti bestseller ken kaimasan a mailaok, no kayat, ti nairap a mata (P20). Templaem metten ti malukongmo iti naartem a sili wenno sili a nailuto iti manteka, sa ipila manen tapno makargaan iti miki ken digo. No mano nga oras a naIpabpaburek ti dungdong ti digo a pakalambongan ti kaaduanna ket ulo ken tultulang ti baboy a matemplaan iti adu a rekado ken atsuete a mangted iti marisna a naranghado. (Roy V. Aragon)


(Naipablaak iti Bannawag, Mayo 1, 2017 a bilang.)

‘Dutertenomics,’ para iti daras nga irarang-ay ti Filipinas

Pormal nga inyalnag ti gobierno ti plano daytoy para iti panagdur-as ti ekonomia tapno ad-adda pay a mapadaras ti irarang-ay ti pagilian.

Kinuna ni Executive Secretary Salvador Medialdea a karaman iti ‘Dutertenomics’ ti naparpartak a pannakairuar ti kuarta a para iti impraestruktura, reporma iti buis, ken napasayaat a programa iti serbisio publiko ken panagdur-as.

Kuna ni Medialdea a nangrugi ni Presidente Duterte iti simple ken praktikal nga estratehia iti ekonomia iti pananggubatna iti ilegal a droga ken krimen, panangipaayna iti kappia iti Mindanao, ken panangkontrolna kadagiti grupo dagiti terorista ken rebelde.

Kuna pay daytoy a nalaka laeng a maawatan ti konsepto ti ‘Dutertenomics’: maisubli ti linak ken kappia ken panagari ti linteg ket sumaruno metten ti amin karaman ti panagrang-ay ti ekonomia ken dagiti umili.

Innayon daytoy a kalpasan ti makatawen a panagtugaw ni Presidente Duterte, makitkitan ti panagbunga dagiti estratehia daytoy iti ekonomia. Makariknan dagiti umili iti kinatalged idinto a napigpigsa metten ti nakem dagiti negosiante nga agipuonan.

Innayon ti Sekretario a babaen ti Dutertenomics, itultuloy ti gobierno dagiti agdama a pagalagadan iti naballigian a panangkontrolna iti panagsuek ti pisos, pannakapatalged ti pannakinegosio iti sabali a pagilian, panangabbukay kadagiti ganggannaet nga agipuonan, ken pannakaipangruna ti pagimbagan dagiti minilion a Filipino a mangmangged iti ballasiw-taaw.


(Naipablaak iti Bannawag, Mayo 1, 2017 a bilang.)

Saribitniw Fest iti SF: Mayo 5

Angayen ti GUMIL San Fernando City (GSFC) ti Saribitniw Festival itoy a Mayo 5 iti Siudad ti San Fernando.

Kas pakauna ti festival, kinuna ni Djuna R. Alcantara, presidente ti GSFC, a maangay ti ‘GUMILtaray’ (3 km fun run) nga idauluan dagiti opisial ti GSFC iti Poro Point Baywalk.

Maisaruno ti ‘GUMILdayday,’ ‘GUMILiskrabol,’ ken ti ‘Salip iti Saribitniw’ iti Don Mariano Marcos Memorial State University-Mid La Union Campus (DMMMSU-MLUC) iti dayta met laeng nga aldaw.

Nairanta ti pasalip iti saribitniw ita a tawen a para kadagiti estudiante iti hayskul, kolehio ken unibersidad nga adda iti Siudad ti San Fernando. Maymaysa a piesa ti saribitniw ti pagsasalipan, ti “Wayayawa” a putar daydi premiado a mannurat ti Bannawag Pelagio A. Alcantara a nangparnuay met laeng iti saribitniw (napagtitipon a sarita, bitla ken daniw). Ipangngegto ti mangabak ti piesana inton Hunio 12 iti monumento ni Jose Rizal a masarakan iti plasa ti Siudad ti San Fernando City.

Nadisenio met ti umuna a ‘GUMILdayday’ a kas pagsasalipan dagiti adda koleksionna a sinurat dagiti Ilokano iti sadino man a lugar a naipablaak iti libro, pagiwarnak dagiti pagadalan, ken magasin a kas iti Bannawag. Pinnaatiddogan iti maidayday nga urnong (masapul nga orihinal dagiti maidayday) itoy nga ay-ayam a silulukat para laeng kadagiti amin nga agnaed iti La Union. (GUMIL SFC)


(Naipablaak iti Bannawag, Mayo 1, 2017 a bilang.)

Aguinaldo, umuna iti salip a para kadagiti agbasbasa iti kolehio

Inyalat ni Ronnie E. Aguinaldo ti Umuna a Gunggona iti Umuna a Salip iti Panagsurat iti Daniw a Para Ubbing a naluktan para kadagiti agad-adal kadagiti kolehio ken unibersidad ken inisponsoran ti Ilagan City (Isabela) Association of Hongkong nga idauluan ni Virginia C. Arquero.

Pinangabak ni Aguinaldo, agad-adal iti Cagayan State University, ti daniwna nga “Adda, Adda Bituenko.”

Dagiti dadduma a nangabak:

Maika-2 a Gunggona, Fernaline L. Domingo ti MMSU-CTE, Laoag City, “Dagiti Maestrak,”

Maika-3, Julie Ann R. Opelac, MMSU-CTE, “Ti Ubing a Makaay-ayo,”

Maika-4, Shynarelle T. Roncal, MMSU-CTE, “Aldaw ti Sabado,”

Maika-5, Maricel L. Marquez, North Luzon Philippines State College, “Bullalayaw,” ken

Maika-6, Grace A. Estavillo, MMSU-CTE, Laoag City, “Ubing a Nasingpet.”

Dagiti naghurado: Leonora R. Melchor, pangulo; Joel B. Manuel, kameng; ken Severino V. Pablo, kameng.

Mapadayawan dagiti nangabak inton Abril 28, 2017 bayat ti pannakaangay ti seminar-workhop iti panagsurat iti daniw a para ubbing a maangay iti Center for Teaching Excellence (CTEX) Hall manipud iti alas-8 iti bigat agingga iti alas-5 iti malem.

Timmulong iti pannakaangay ti salip ti MMSU-CTE nga idauluan ni Dean Eliza T. Samson, ti GUMIL MMSU-CTE a pagpaayan ni Dr. Edna C. Nagtalon a kas adviser, ni dati nga NCCA Coordinator for Northern Luzon Elizabeth M. Raquel kas Chair ti Secretariat, ken ti Bannawag.


(Naipablaak iti Bannawag, Mayo 1, 2017 a bilang.)

Visaya, nailayon a presidente ti GUMIL Isabela

Nailayon a presidente ti Gunglo Dagiti Mannurat nga Ilokano iti Isabela (GISA) ni Villamor C. Visaya Jr. iti miting ken eleksion ti gunglo iti Centro, Cauayan City  itay Abril 13, 2017.

Propesor iti journalism ken political science iti kolehio, periodista, mannurat ti Bannawag ken information officer ni Visaya.

Kakadua ni Visaya a nabotosan ken agtakem iti Abril 2017 agingga iti Abril 2019 dagiti sumaganad: Mindo Aquino (bise-presidente), John Mark Mariano (sekretario), Romeo Sagario (tesorero), Manuel Cabungcal (auditor), Dominador Rodulfo (public information officder), ken Rodelito Ramos (business manager).

Kameng ti Board da Rogie Baysa, Cecilio Castillo, Rizalino Viernes, Estanislao Albano Jr., Estela Pones, Rogelio Abuan Sr., David Pascua ken Princess Bernadette Manlapaz.

Mammagbaga da Gobernador Faustino Dy III, Peter La. Julian, Baldovino Valdez (pasado a presidente ti GUMIL Filipinas), ken Board Member Manuel Alejandro.

Mainaig iti daytoy, inyalnag ti grupo ti proyekto daytoy a libro a Dagiti Maregmeg ti Balitok iti nailian a kombension ti GUMIL Filipinas iti Union Christian College, San Fernando, La Union iti daytoy Abril 21-23, 2017. (John Mark Mariano)


(Naipablaak iti Bannawag, Mayo 1, 2017 a bilang.)

MAYO 1, 2017

SARITA
4 Sapata
   Roselyn C. Campano
12 Awag ti Bantay
    Hermogenes Belen

NOBELA
8 Oplan Maharlika (16)
    Norberto D. Bumanglag, Jr.
10 Kalinawa (18)
     Linda T. Lingbaoan

DANIW
6 Nasabatko ti Bambanti iti Maysa a Kalgaw
   Mikael R. Gallego
22 Dancing Fountain
    Ryan A. Dulig
47 Daniw a Para Ubbing
    Adoracion B. Madarang

SALAYSAY
14 Ammom Pay Met Laeng No Ania ti Panagdapil?
     Bonifacio V. Ramos
26 Saan nga Ordinario a Mula ti Marunggay
     Reynaldo E. Andres

KOMIKS
35 Sweet Jazmine (33)
38 Don Clavio de Ylocos (35)
41 Miks & Tiks

KOLUM
17 Kastoy, Kapid, Ditoy Hawaii
20 Dear Doc
21 Saludsodem ken ni Apo Hues
24 Padasem Daytoy, Kailian
28 Okeyka, Apong
30 Tips
31 Ading Kosinera

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
11 Netizone
16 Biag ni Ilokano
19 Siled ti Kararag
23 Kastoy ti Panangdalus Kadagiti Lapayag ti Aso
29 Idi Un-unana a Panawen
32 Ammuem Pay Dagitoy
33 Haytek!
34 Ti Agtagibalay a Kas Kosinera
43 Ti Gasatmo Ita a Lawas
46 Dagiti Pabula ni Aesop

Panagraraep iti Manabo, Abra

PANAGRARAEP ITI MANABO, ABRA. No kaaduanna a taltalon iti Ilokos ti makmakset ita gapu iti nakaro a pudotna, madama met ti talon iti Manabo, Abra, ti maibilang a “Rice Granary ti Abra.” Abunaw ti danum iti ili ti Manabo gapu iti napintas a sistema ti pasayakna ket di agsarday ti panagtalon iti unos ti makatawen. Iti ladawan, makita ti sumagmamano a mannalon nga agseksekka iti iraepda idinto a dagiti dadduma a pinagayan iti nasao nga ili, dandanin mabalin a gapasen.(Simeon C. Berroy)

(Naipablaak iti Bannawag, Abril 24, 2017 a bilang.)

ABRIL 24, 2017

SARITA
4 Beggang
   Joel B. Manuel
12 Kasta, A, ti Agbuyon!
    Gregorio C. Laconsay

NOBELA
8 Oplan Maharlika (15)
    Norberto D. Bumanglag, Jr.
10 Kalinawa (17)
     Linda T. Lingbaoan

DANIW
6 Darang
   Ronnie E. Aguinaldo
22 Abrille
    Felicidad I. Padua
47 Daniw a Para Ubbing
    Marlyn Garcia-Del Rosario

SALAYSAY
14 Pumasiarka Man Met Ditoy Cagayan De Oro City!
     Remedios S. Tabelisma-Aguillon
26 Tapno Maliklikan Dagiti Buot ti Mula a Bawang
     Reynaldo E. Andres

KOMIKS
35 Sweet Jazmine (32)
38 Don Clavio de Ylocos (34)
41 Miks & Tiks

KOLUM
17 Kastoy, Kapid, Ditoy Hawaii
20 Dear Doc
21 Saludsodem ken ni Apo Hues
24 Padasem Daytoy, Kailian
28 Okeyka, Apong
30 Tips
31 Ading Kosinera

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
11 Netizone
16 Biag ni Ilokano
18 Ket Indaniw Dagiti Agad-adal ti “Idi Nagluganak iti Eroplano”
20 Siled ti Kararag
23 Dimo Ipalubos a Nadugyot ti Asom
29 Idi Un-unana a Panawen
32 Ammuem Pay Dagitoy
33 Haytek!
34 Adda Latta Koma Iduldulin a Cotton Balls
43 Ti Gasatmo Ita a Lawas
46 Dagiti Pabula ni Aesop

Dap-ayan 2017, panangrambak dagiti mannurat nga Ilokano iti Bulan ti Literatura

Rambakan dagiti mannurat nga Ilokano ti Abril a kas Bulan ti Literatura Dagiti Ilokano iti daytoy Abril 21-23, 2017 iti Union Christian College (UCC), City of San Fernando, La Union.

Am-ammo a kas “Dap-ayan 2017: Komperensia iti Lengguahe ken Literatura Dagiti Ilokano ken Maika-49 a Nailian a Kombension ti GUMIL Filipinas,” iwayat ti nasao a gunglo dagiti mannurat nga Ilokano ti panagrambak, iti pannakitinnulong ti National Commission for Culture and the Arts ken sangailien ti GUMIL La Union nga idauluan ni Eddy Almodovar.

Addaan iti tema a “Ni Mannurat ken ti Nakaparsuaan,” mayannurot ti nasao a panagrambak iti Proklamasion Bilang 26 ni dati a Presidente Gloria Macapagal-Arroyo idi Abril 2001 a nangideklarar iti Abril a kas Bulan ti Literatura Dagiti Ilokano.

Aglektiur dagiti mabigbigbig a mannurat nga Ilokano a kas kada Bannawag Editor Cles B. Rambaud, sigud a Bannawag Editor Dionisio S. Bulong, Linda Lingbaoan-Bulong, Eliseo B. Contillo, Joel B. Manuel, Roy V. Aragon, Norberto D. Bumanglag, Jr., Neyo Mario E. Valdez, Aileen R. Rambaud, Anna Liza M. Gaspar, Dr. Freddie Pa. Masuli, Junley Lorenzana Lazaga, Eddy Almodovar, Villamor Visaya, Eugene Carmelo Cabanilla Pedro, ken Mario T. Tejada.

Ni met Dr. Myrna l. Carreon, presidente ti UCC, ti naisangsangayan nga agsarita (keynote speaker).

Iti umuna a rabii ti Dap-ayan, mayawat ti premio dagiti nangabak kadagiti nadumaduma a pasalip a kas iti Salip iti Sarita ti AMMA Foundation Literary Awards, Salip iti Sarita ti Mario Abinsay Albalos Foundation Literary Awards for Ilokano Literature, Salip iti Sarita ti Pasalip Alviya, ken Salip iti Daniw ti Saniata Prize.

Mayalnag met dagiti libro a Fighting Pogi ni Dionisio S. Bulong, Kalinawa ni Linda T. Lingbaoan-Bulong, ken Mission: Black Ops ni Norberto D. Bumanglag, Jr.

Iti Rabii ti Kultura iti maikadua a rabii, maipabuya dagiti nadumaduma nga oral a kannawidan dagiti Ilokano.

Iti maikatlo nga aldaw, maangay ti eleksion ti gunglo ken mayalnag ti agmakatawen a pannakarambak ti Maika-50 a Tawen ti GUMIL Filipinas.

Mainaig iti daytoy, mayannurot pay daytoy nga okasion dagiti mannurat nga Ilokano iti Proklamasion Bilang 968 idi Pebrero 2015 a pinirmaan ni pasado a Presidente Benigno Aquino a nangideklarar iti Abril a kas National Literature Month.

Para kadagiti interesado a dumar-ay iti nasao a komperensia ken kombension, makiuman ken ni Teofilo Damoco iti 0939 968 7836.


(Naipablaak iti Bannawag, Abril 24, 2017 a bilang.)

Padios, umuna iti 3rd Saniata Prize

Inyalat ni Prodie Gar. Padios, tubo iti Santa Teresita, Cagayan ngem agnaeden iti Alberta, Canada ken presidente ti GUMIL Canada, ti Umuna a Gunggona iti Salip iti Daniw ti 3rd Saniata Prize babaen ti daniwna a “Simpatuyo.” Maipaayan ni Padios iti PhP2,500 a premio a kuarta ken medalia ken sertipiko.

Ni met Ria Rebolledo ti Baguio City ti nakagun-od iti Maikadua a Gunggona babaen ti daniwna a “Babai ken Bagi: Lima a Timek.” Maipaayan ni Rebolledo iti PhP2,000 a premio a kuarta ken sertipiko.

Inyalat met ni Daniel L. Nesperos ti San Nicolas, Ilocos Norte, ti Maikatlo a Gunggona babaen ti daniwna nga “Agikurkur-itak iti Listaan.” Maipaayan ni Nesperos iti PhP1,500 a premio a kuarta, ken sertipiko.

Mayawat dagiti premio bayat ti Dap-ayan 2017, ti kombension dagiti mannurat nga Ilokano, itoy nga Abril 21-23, 2017 iti Union Christian College iti City of San Fernando, La Union.

Tinawen nga ang-angayen ti Saniata Prize ti nasao a Salip iti Daniw ken is-isponsoran ti Saniata Publications nga imatonan ni Norielyn Cullar-Tabag ken ti pamiliana.

Nagpaay a hurado da Cles B. Rambaud (pangulo), Roy Vadil Aragon (kameng), ken Linda T. Lingbaoan-Bulong (kameng).


(Naipablaak iti Bannawag, Abril 24, 2017 a bilang.)

Alvarez, nangabak iti Pasalip ALVIYA Grand Final

Ni Johmar Rosario Alvarez, tubo iti Mabuttal, Ballesteros, Cagayan ngem agnanaeden idiay Ontario, Canada ti nangabak iti kakaisuna a gunggona iti Pasalip ALVIYA iti Sarita Grand Final (Umuna a Siklo, 2011-2016) babaen ti saritana a “Katataan.”

Premiado a mannurat-mannaniw, editor ken dati a mannursuro iti Aparri West National High School, Bulala Norte, Aparri, Cagayan ni Alvarez sakbay a nagpa-Canada a kas imigrante. Writing Fellow iti 38th UP National Writers Workshop idi 2001. Kaingungotna ni Jhonna Belle A. Clemente, tubo iti Masaya Sur, San Agustin, Isabela.

Maited ken ni Alvarez ti “Naisangsangayan a Gunggona” a kas nagkaykaysaan dagiti hurado a da Cles B. Rambaud, Linda-Lingbaoan-Bulong, ken Joel B. Manuel. Awaten pay ni Alvarez ti sertipiko ken premio a kuarta a P25,000.00. Mayawat ken ni Alvarez ti premiona bayat ti Dap-ayan 2017, GUMIL Filipinas National Convention iti Union Christian College, San Fernando City, La Union itoy Abril 21-23, 2017.

Tinawen a maiwaywayat ti Pasalip ALVIYA ken is-isponsoran ni Alex Vicente Yadao ti New York City, ken imatmatonan met ni Freddie Padua Masuli ti Cagayan State University, Sanchez Mira Campus. (ALVIYA Secretariat)


(Naipablaak iti Bannawag, Abril 24, 2017 a bilang.)

Currimao Seaport

CURRIMAO SEAPORT. Naiget a bambantayan dagiti kameng ti armada ti Filipinas ti panagsanglad dagiti dadakkel a barko (cruise ship) iti Currimao seaport a mangitulod kadagiti kaaduanna a turista nga Intsik nga umay pumasiar ditoy Ilokos. Babaen ti panagbalin iti Manila a kas home port dagiti bapor a dumaldaliasat kadagiti taaw iti Asia ken Pasipiko, nairaman met ti Laoag City/Ilocos Norte a paset ti itinerary dagiti pasahero a mangibungbunga met iti panagdur-as ti panagbiag dagiti Ilokano babaen ti turismo. (Leilanie G. Adriano)

(Naipablaak iti Bannawag, Abril 17, 2017 a bilang.)

Ballaag kadagiti agtrabaho a seaman

Binallaagan ti Philippine Overseas Employment Administration (POEA) dagiti agpangpanggep nga agtrabaho a seaman iti kaadda ti bogus nga online job offer para iti internasional a cruise ship iti Canada.

Iti advisory ti POEA, kinunana a nakaawat iti report nga adda agpampammarang nga indibidual a kas recruiter para iti Princess Cruise Ship Company a maibagbaga met nga adda ti opisina daytoy iti Ontario, Canada.

Innayon ti POEA nga agus-usar ti nasao nga indibidual iti email address a princess_cruise17@yahoo.com iti panangipakaammona iti maysa nga aplikante a nailistan daytoy kadagiti agtrabaho iti nasao a cruise ship.

Nasken met nga agbayad ti aplikante iti US$350 iti account officer ti kompania babaen ti maysa a remittance company.

Kuna ti POEA a nalawag a maysa nga scam ti nasao a job offer.


(Naipablaak iti Abril 17, 2017 a bilang.)

Ramones, umuna iti 1st Albalos Awards

RAMONES

Inyalat ni Ronelyn B. Ramones ti Umuna a Gunggona iti Salip iti Sarita ti 1st Mario Abinsay Albalos Foundation Literary Awards a naluktan para kadagiti amin a mannurat iti Ilokano idi Oktubre 1 itay napan a tawen ken naggibus idi Marso 3.

Pinangabak ni Ramones, maysa a registered midwife ken tubo iti Brgy. Buyon, Bacarra, Ilocos Norte ti saritana a “Fina.”

Dagiti kakadua ni Ramones a nangabak:

Maikadua a Gunggona, Rhea Rose D. Berroy, tubo iti Manabo, Abra, ken maysa a medical technologist, babaen ti saritana a “Ti Aktibista;

Maikatlo, Arnold Pascual Jose, tubo iti Bacsil North, Siudad ti Laoag, ngem agnaeden iti Mill Camp, Waialua, Hawaii, babaen ti saritana a “Hawaii Ditoyen, Mikiong.”

Agpapada met laeng dagitoy a mannurat a nangabaken iti Palanca Awards.

Naangay ti pasalip iti babaen ti foundation a naipanagan iti daydi Dios-ti-aluadna a mannurat ti Bannawag Mario A. Albalos, tubo iti Cabaroan Daya, Siudad ti Vigan, napadayawan a Pedro Bukaneg awardee ken umuna a Thomas Jefferson awardee iti Estado ti Hawaii a nagnanaedanna agingga iti pimmusay idi Marso 3, 1991 iti edadna a 40.

Agpaay met a mangimaton iti pasalip dagiti gagayyem daydi MAA a da Jenny Alcausin (agnanaed iti California), Amado I. Yoro, Jun Abinsay, ken Priscilla Dela Cruz (agnanaed iti Hawaii) ken iti pannakitinnulong dagiti kameng ti Bannawag.

Dagiti gunggona: Umuna, P15,000.00; Maikadua, P12,00.00; ken Maikatlo, P10,000.00. Maipaayan pay dagiti mangabak iti sertipiko ti pammadayaw.

Mapadayawan dagiti mangabak bayat ti Dap-ayan 2017 ti GUMIL Filipinas a maangay itoy nga Abril 21-23 iti Union Christian College, San Fernando City.

Dagiti naghurado: Juan Al. Asuncion, pangulo; Neyo Mario E. Valdez, kameng; ken Ariel S. Tabag, kameng.


(Naipablaak iti Bannawag, Abril 17, 2017 a bilang.)

Masuli, nailayon a presidente ti GUMIL Cagayan

NAILAYON iti maikadua a gundaway ni Dr. Freddie Padua Masuli, agpapaay a dekano ti College of Information and Computing Sciences iti Cagayan State University-Sanchez Mira, a presidente ti GUMIL Cagayan, gunglo dagiti mannurat nga Ilokano iti Cagayan, iti naangay nga eleksion ken miting ti gunglo itay Abril 2 iti pagtaengan da Board Member Vilmer V. Viloria iti Golden Harvest Subdivision, Siudad ti Tuguegarao. Sango, agpakanawan: Dr. Freddie P. Masuli (presidente), Ferdinand N. Cortez (bise-presidente), Eva A. Mendoza (sekretaria), Jobert M. Pacnis (tesorero), Rolando A. Seguro Jr. (auditor), Mario S. Ascueta (business manager), Jan Justin C. Rodriguez (direktor), ken Joselyn S. Alipio (direktor). Likud, agpakanawan: Board Member Vilmer V. Viloria (direktor), Francisco V. De la Cruz (direktor), Narglon C. Utanes (PRO), GF President Arthur P. Urata (mamagbaga), Raquelito B. Cenal (direktor), Ena T. Macabunga, Vangielyn A. Agustines (direktor). Saan a nairaman iti ladawan dagiti dadduma pay a nabotosan nga opisial a kas kada Dexter M. Fabito (direktor), Johmar R. Alvarez (direktor), ken dagiti mamagbaga a da Dionisio S. Bulong, Antonio P.N. Urata, Jose P. Urata, Alex V. Yadao, Atty. Rodrigo P. De Gracia, Roberto “Bob” Luczon, ken Atty. Jessie B. Usita. (Narglon C. Utanes)


(Naipablaak iti Bannawag, Abril 17, 2017 a bilang.)

Valdez, baro a presidente ti GMM

Indauluan ni Neyo Mario E. Valdez dagiti nabotosan a baro nga opisial ti GUMIL Metro Manila iti eleksion a naangay iti pagtaengan ti Pamilia Bulong iti 14 Ayungin St., Cadaing Village, Talipapa, Quezon City idi Marso 26.

Agdama a Public Relations Officer ti National Tobacco Administration ni Valdez, tubo iti Nanguneg East, Narvacan, Ilocos Sur. Sinuktan ni Valdez a presidente ni Eden Cachola-Bulong.

Napili met a bise-presidente ni Rose A. Cabie, sekretaria ni Anna Liza M. Gaspar, tesorera ni Dr. Zita N. Fagaragan, auditor ni Rhea Rose D. Berroy, para irakurak ni Roy V. Aragon, ken manarawidwid ni Mark Anthony T. Ganotice.

Napili met a kameng ti hunta direktiba da Benn A. Cabacungan, Simeon C. Berroy, Leonardo S. Fagaragan, Jessie Villamor Viloria II, Juan Al. Asuncion, Sherma E. Benosa, Linda Lingbaoan-Bulong, ken Faye Q. Flores-Melegrito.

Da Cles B. Rambaud, Dionisio S. Bulong, Jose A. Bragado, Honor Blanco Cabie, Ariel S. Tabag ken Eden Cachola Bulong (ex-officio) ti mangbukel iti Board of Advisers.

Agsapatanto dagiti baro nga opisial inton Dap-ayan 2017 a maangay iti Union Christian College, iti Siudad ti San Fernando iti La Union itoy nga Abril 21-23, 2017. (Anna Liza M. Gaspar)


(Naipablaak iti Bannawag, Abril 17, 2017 a bilang.)

ABRIL 17, 2017

SARITA
4 Ket Nagpenitensia ni Pinong
   Rolando A. Seguro, Jr.
12 Alinuno
    Melchor B. Gasmen

NOBELA
8 Oplan Maharlika (14)
    Norberto D. Bumanglag, Jr.
10 Kalinawa (16)
     Linda T. Lingbaoan

DANIW
6 Tapno Agbiagak iti Ipupusaymo
    Arnold C. Baxa
9 Santiguar Para Kadagiti Longino
    Benjamin P. Pacris
23 Kayatko a Tulonganka
    Elizabeth M. Raquel
47 Daniw a Para Ubbing
    Ridel T. Cabulisan

SALAYSAY
14 Mawaw Kadi Pay Laeng Agingga Ita ni Apo Jesus?
     Rev. Fr. Melchor B. Palomares
16 Ti Pateg ti Krus
     Fernando B. Sanchez
26 Agmulatayo Koma iti Bugnay
     Reynaldo E. Andres

KOMIKS
35 Sweet Jazmine (31)
38 Don Clavio de Ylocos (34)
41 Miks & Tiks

KOLUM
17 Saludsodem ken ni Apo Hues
19 Kastoy, Kapid, Ditoy Hawaii
21 Dear Doc
24 Padasem Daytoy, Kailian
28 Okeyka, Apong
30 Tips
31 Ading Kosinera

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
2 Ti Makunami
3 Tao, Lugar, Pasamak
11 Netizone
18 Biag ni Ilokano
20 Siled ti Kararag
22 Mapasardengmo Met ti Panagdadawat ti Aso iti Kanenna
29 Idi Un-unana a Panawen
32 Ammuem Pay Dagitoy
33 Haytek!
34 Panangdalus iti LCD Flat Screen
43 Ti Gasatmo Ita a Lawas
46 Dagiti Pabula ni Aesop

Daddadakkel a Bawang

DADDADAKKEL A BAWANG. Siraragsak nga ipakpakita ni Crop Science Prof. Lilian Patena ti UPLB Laguna ti tissue cultured a bawang a mula ni Ronald Garalde (awan iti ladawan). Amang a daddadakkel dagiti ngipenna (cloves) ken narigat a kapten ti sakit. Babaen ti panagmula iti dekalidad a bin-i a bawang, manamnama nga ad-adu pay ti mapastrek dagiti agmulmula iti bawang. Kadua ni Prof. Patena iti ladawan ti research assistant-na ken ni Edwin Carino (kanawan), mangidadaulo iti Provincial Sustainable Development Center ti Ilocos Norte. (Leilanie G. Adriano)


(Naipablaak iti Bannawag, Abril 10, 2017 a bilang.)

Pacris, baro a presidente ti GUMIL Ilocos Sur

Nabotosan ni Benjamin P. Pacris a baro a presidente ti GUMIL Ilocos Sur, gunglo dagiti mannurat nga Ilokano iti Ilocos Sur, iti naangay a reorganizational meeting ti gunglo itay Marso 12, 2017 iti pagtaengan ni Reynaldo Afroilan iti San Julian Sur, Vigan City. Nagtakem met laeng a presidente ti gunglo iti 1994-1996, retirado ni Pacris a manedier ti Philippine Information Agency (PIA) Ilocos Sur.

Kakadua ni Pacris a nabotosan ken agtakem iti 2017-2019 dagiti sumaganad: Reynaldo Afroilan (bise-presidente), Alma Campos-Somera (sekretaria), Bernadette Canoy (tesorera), Mercedes Llanes (katulongan a tesorera), George Abe Anyog (auditor), Rogelio Valdez, Jr. ken Mancielito Tacadena (business manager); ken Eduard Antonio (para rakurak).

Dagiti kameng ti hunta direktiba: Eden Alviar, Eduardo Alicias, Robert Alicias, Omar Aquino, Joe Somera, Eliseo B. Contillo, Rudy Taan, Danny Bautista, ken Arsenio B. Cortez (ex-officio member). (Alma Campos-Somera)


(Naipablaak iti Bannawag, Abril 10, 2017 a bilang.)

Sopdrink, kendi, maiparit iti kantina dagiti pagadalan

Maipariten dagiti sopdrink, kendi, kada french fries kadagiti pagadalan. Dagiti laengen mabalin a mailako: nadalus a danum, awanan-asukar a mainum, ken nasustansia a makan.

Daytoy ti imbilin ti Departamento ti Edukasion itay lawasna tapno maitandudo dagiti makapasalun-at a taraon ken positibo a kababalin iti pannangan kadagiti agad-adal nga ubbing.

Maibatay iti pagalagadan ti DepEd, nabenneg dagiti makan ken mainum iti babaen ti Green, Yellow ken Red tapno matarabay dagiti eskuela kadagiti mabalin ken saan a mabalin a mailako kadagiti kantina dagiti eskuela.

Adda iti Red a kategoria dagiti sopdrink, kendi, ken French fries. Mailadawan dagiti makan iti daytoy a kategoria a kas “makan ken mainum a saan a mairekomendar iti menu dagiti kantina” gapu ta “nagimet dagitoy iti adu a manteka, asukar weno asin.”

Nailawlawag dagiti tallo a kategoria iti nabiit pay a naipaulog a “Policy and Guidelines on Healthy Food and Beverage Choices in Schools and in DepEd Offices” ti DepEd.

Pinirmaan ni Education Secretary Leonor Briones daytoy a pagalagadan a kas DepEd Order number 13 series of 2017, itay Marso 14.

Segun ken ni Briones, panggep daytoy a pagalagadan ti “mangipaay iti tarabay iti pannakaarisit ken pannakabenneg dagiti makan ken mainum kadagiti eskuela ken kadagiti opisina ti DepEd.


(Naipablaak iti Bannawag, Abril 10, 2017 a bilang.)

Tong-alan, Umuna iti Salip iti Sarita ti 19th AMMAFLA

Inyalat ni Pastor Derick Tong-alan ti Umuna a Gunggona iti Salip iti Sarita ti kalleppas a 19th AMMA Foundation Literary Awards.

Pinangabak ni Pastor Tong-alan, tubo iti Salcedo, Ilocos Sur ti saritana a “Ti Ayag, Lumboy, Kulalanti ken Kampilan.” Agpapaay isuna a Pastor iti Callaguip United Methodist Church, Callaguip, Paoay, Ilocos Norte ken iti Batac Mission, Siudad ti Batac.

Dagiti kakadua ni Pastor Tong-alan a nangabak:

Maikadua a Gunggona, Mark Anthony Ganotice, babaen ti saritana nga “Ayat ken Pammakawan.” Tubo iti Sanchez Mira, Cagayan ni Mackie, agpapaay ita a driver iti Emilio Aguinaldo College iti Manila.

Maikatlo a Gunggona, Roselyn C. Campano, babaen ti saritana a “Sapata.” Tubo iti Caroan, Gonzaga, Cagayan ken mangisursuro iti Caroan Elementary School.

Mapadayawan dagiti nangabak bayat ti Dap-ayan 2017 ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw a maangay inton Abril 21-23 iti Union Christian College, San Fernando City, kas impakaammo dagiti mangimaton iti AMMAFLA a da Amado ken Gloria Yoro, Francisco ken Aurora Ponce, ken Alfredo ken Cherry Quibol (agpapada nga agindegen iti Hawaii).

Naggibus ti salip iti sarita ti maika-19 nga edision ti AMMAFLA idi Enero 31, 2017. Tinawen nga ang-angayen ti AMMAFLA ti salip iti sarita iti pannakitinnulong ti Bannawag.

Dagiti naghurado: Ariel S. Tabag, pangulo; Aileen R. Rambaud, kameng; ken Juan Al. Asuncion, kameng.

Dagiti gunggona: Umuna, P10,000.00; Maikadua, P8,500.00; ken Maikatlo, P7,000.00. Maipaayan pay dagiti mangabak iti sertipiko ti pammadayaw.


(Naipablaak iti Bannawag, Abril 10, 2017 a bilang.)