Proyekto ti Cultural Center of the Philippines: Karaman dagiti mannurat nga Ilokano iti Performatura 2017

Agpabuya dagiti mannurat nga Ilokano iti bukanegan, dallot, pangorona a daniw ken dadduma pay iti Performatura 2017: Performance Literature Festival inton Marso 31 agingga iti Abril 2.

Karaman dagiti nasao a mannurat kadagiti nadumaduma nga adipen dagiti nagduduma a tay-ak ti arte nga agpabuya iti nasao a pasken a naisangrat met a pammadayaw ken ni Francisco “Balagtas” Baltazar.

Ti tema ti pasken a “Sa Loob at Labas ng Bayan Kong Sawi” ket binatog iti obra maestra daytoy a “Florante at Laura.”

Iti daytoy tallo aldaw a pasken, libre a maimatangan ti publiko dagiti panagbasa iti daniw, kultural a pabuya, pannakaipabuya dagiti pelikula, book fair, ken pannakiinnuman kadagiti mabigbigbig nga adipen ti arte ken mannurat.

Iti agsapa ti Abril 1, isuro ken ipabuya da Eliseo B. Contillo, Remy N. Albano ken Vilmer V. Viloria ti bukanegan (ti bersion dagiti Ilokano iti balagtasan a naipanagan ken ni Pedro Bucaneg) idinto nga iti karabiyanna, kakadua dagiti nasao a mannurat da Mario T. Tejada, Avelina Fe Camacho, Benn Cabacungan ken dadduma pay nga agbasa ken agipabuya kadagiti nadumaduma a kita ti daniw ni Ilokano.

Iti panglukat a programa, agsarita iti bukodda a tay-ak dagiti national artist a da F. Sionil Jose ken Virgilio Almario, ken da Nora Aunor, Ricky Lee, Leoncio Deriada, ken dadduma pay.

Karaman kadagiti nalatak nga agpabuya iti nasao a festival dagiti chanter manipud iti Cotabato, Batanes, ken Cebu ken dagiti naubbing a performer a kas kada Juan Miguel Severo ken Abra ken dadduma pay.

Segun ken ni Herminio Beltran, Jr. a maysa kadagiti nangirusat iti daytoy a festival, maangay daytoy iti maminsan iti dua a tawen tapno maitampok ti Literatura ti Filipinas ken dagiti kanaigna a dadduma pay a kita ti arte, kasta met ti pannakinaig ti adipen ti arte iti audience-na, nga isu met ti pudpudno a bituen iti daytoy a festival.

Para kadagiti detalye ti Performatura 2017, bisitaen ti CCP Intertextual Division Facebook page wenno kontaken ni Markus Aserit iti ccpintertextualdivision@gmail.com, (02) 551-5959 wenno 0919-3175708.


(Naipablaak iti Bannawag, Marso 27, 2017 a bilang.)