Kondom iti pagadalan, saan a kayat ti DepEd

Imbasura ti Department of Education (DepEd) ti singasing ti Department of Health (DoH) a pannakaiwaras ti kondom kadagiti estudiante a kas addang tapno maliklikan ti panagsikog dagiti agtutubo a babbai ken marisut ti panagwaras ti impeksion iti HIV/AIDS.

Kinuna ni Education Secretary Leonor Briones a dida anamongan ti singasing ti DoH nga agiwarasda kadagiti kontraseptibo kadagiti menor de edad nga estudiante.

Impaganetget ni Briones a kangrunaan a papel ti DepEd ti mangrepaso ken mangpapigsa iti kurikulum iti basic education.

Kuna pay ni Briones a surotenda dagiti pagalagadan ti UNESCO (United Nations Educational, Scientific and Cultural Organzation) maipapan iti reproductive health, ken iti ibagbaga ti Konstitusion ken ti linteg.

Innayonna a saanda nga agiwaras kadagiti kontraseptibo ta adda metten dagiti health center nga akinbeddeng iti daytoy.

Kinuna pay ni Briones nga imbes nga agiwarasda kadagiti kontraseptibo, iturongda ketdi ti imatangda kadagiti dakes nga ibunga ti sex iti ruar ti kallaysa.

Naireport a nagsaritan da Briones ken Health Secretary Paulyn Jean Ubial maipanggep iti daytoy a banag.


(Naipablaak iti Bannawag, Pebrero 13, 2017 a bilang.)