TARAKEN A MALAGA. Pakpakanen ni Arnold Miranda iti bulong ti marunggay dagiti tarakenna nga annak ti rabbitfish, wenno am-ammo a malaga iti Amianan a Luzon ken kitong wenno kitang iti Mindanao, a naipupok iti fishcage iti Brgy. Nagtupacan, Pamplona, Cagayan. Mayakarto dagitoy iti dakdakkel a fishcage inton dumadakkeldan. Kas nakunana, mabalin pay kano nga ipakan ti balangeg ken dadduma a nalulukneng a nateng. Inton dumaddadakkel dagiti an-annak, puruakannanto idan iti commercial feeds. Malaksid iti tilapia, adun a residente ti Brgy. Nagtupacan ti agtartaraken iti malaga ta amang a nanginngina daytoy. Basbassit pay ti magastos iti pagpakan ta libre dagiti ipakanda a nateng. Uppat agingga iti lima a bulan sa mabalinen a kalapen dagitoy. Dua a klase ti malaga ti kangrunaan a matartaraken iti pagilian nangruna iti Pangasinan, Davao ken daya a Visayas, ti Siganus guttatus (turikturikan iti naranghado) ken Siganus vermiculatus (turikturikan iti puraw). Nabaybayag a dumakkel ti Siganus guttatus ngem naramraman ti lasag daytoy. (Dexter M. Fabito)
(Naipablaak iti Bannawag, Hulio 25, 2016 a bilang.)
No comments:
Post a Comment