Bulan ti Literatura Ilokana, rambakan dagiti mannurat nga Ilokano

Ladawan iti Dap-ayan 2015.

Rambakan dagiti mannurat nga Ilokano ti Abril a kas Bulan ti Literatura Ilokana iti daytoy Abril 22-24, 2016 iti Apayao Agri-Tourism & Sports Complex, San Gregorio, Luna, Apayao.

Am-ammo a kas Dap-ayan 2016: ti Maika-48 a Nailian a Kombension ti GUMIL Filipinas, iwayat ti nasao a gunglo dagiti mannurat nga Ilokano ti panagrambak, iti pannakitinnulong ti National Commission for Culture and the Arts ken sangailien ti GUMIL Apayao nga idauluan ni Apayao Board Member Remy Albano.

Addaan iti tema a “Ni Gumiliano a kas Umili iti Lubong,” mayannurot ti nasao a panagrambak iti Proklamasion Bilang 26 ni dati a Presidente Gloria Macapagal-Arroyo idi Abril 2001 a nangideklarar iti Abril a kas Bulan ti Literatura Ilokana.

Aglektiur dagiti mabigbigbig a mannurat nga Ilokano a kas kada Bannawag Editor Cles B. Rambaud, Joel B. Manuel, Aileen R. Rambaud, Sherma E. Benosa, Anna Liza M. Gaspar, Cagayan Board Member Vilmer V. Viloria, BM Albano, Delfin P. Dumayas, Freddie G. Lazaro, Eliseo B. Contillo, Neyo Mario E. Valdez, Dr. Jaime G. Raras, Prof. Edna C. Nagtalon, Ariel S. Tabag, Virgilio D. Domaloy ken Leilanie G. Adriano.

Warwaren met ni GF President Arthur P. Urata, Sr. ti tema ti kombension idinto a trataren ni Dr. Rex Navarro ti Cagayan State University ti akem ti print media iti climate change.

Naawis met a mangipaay iti pammaregta a bitla da Apayao Governor Elias C. Bulut ken Apayao Cong. Eleanor C. Bulut-Begtang.

Mainaig iti daytoy, mayannurot pay daytoy nga okasion dagiti mannurat nga Ilokano iti Proklamasion Bilang 968 idi Pebrero 2015 a pinirmaan ni Presidente Noynoy Aquino a nangideklarar iti Abril a kas National Literature Month.

Para kadagiti interesado a dumar-ay iti nasao a kombension, makiuman iti 0928 607 3972. (AST)

(Naipablaak iti Bannawag, Marso 28, 2016 a bilang.)