Sibibiag Pay Laeng ti Manumtumbalay a Banda

SIBIBIAG PAY LAENG TI MANUMTUMBALAY A BANDA. Ti grupo dagiti musiko a managan iti “Balintawak '96 Band” a nagtoktokar iti tunggal balay bayat ti panagpiesta ti Siudad ti Laoag. Siraragsak met dagiti bumalay, nangruna dagiti ubbing, a mangsarabo kadakuada gapu iti ipaayda a linglingay a maigidiat iti tokar wenno musika a gagangay a mangmangngegda iti selpon wenno ania man a gadget-da. (Aileen R. Rambaud)

(Naipablaak iti Bannawag, Marso 7, 2016 a bilang.)

GF, agawat iti nominasion para iti Bucaneg, Florentino ken Valdez awards agingga iti Marso 15

Agingga laeng iti Marso 15, 2016 ti panagawat ti GUMIL Filipinas, babaen ti Awards Committee, kadagiti nominasion para iti 2016 Pedro Bucaneg Award, 2016 Leona Florentino Award, ken 2016 Cornelio Valdez Award.

Sakbayna, naipatulod dagiti pagannurotan kadagiti president dagiti chapter wenno pannakabagida.

Ti Pedro Bucaneg Award ti kangatuan a pammadayaw a maipaay ti GF, ti gunglo dagiti mannurat nga Ilokano iti Filipinas ken iti ballasiw-taaw, iti asino man a mannurat nga Ilokano a nakaipaay, babaen, kangrunaana, iti bagi ti sinuratna, iti di magatadan a tulong iti pannakaparangpaya ken pannakasaluad ti Literatura Ilokano.

Ti met Florentino Award ti bersion ti Bucaneg Award a para kadagiti mannurat nga Ilokana.

Maipaay met ti Cornelio Valdez Award iti asino man a kameng ti GF kadagiti kamengna “a nakaipaay iti naisangsangayan a gapuanan para iti isasantak ti gunglo.”

Dagiti laeng chapter ti GF wenno dagiti naipaayanen kadagiti naagapad a pammadayaw ti mabalin nga aginominar.

Mapadayawan dagiti mapili a mannurat bayat ti Dap-yan 2016: Ti Maika-48 a Nailian a Kombension ti GF inton Abril 22-24, 2016 iti Apayao Agri-Tourism & Sports Complex, San Gregorio, Luna, Apayao iti panangsangaili ti GUMIL Apayao nga idauluan ni BM Remy Albano, presidente ti nasao a chapter ti GUMIL.

Kabayatanna, maangay ti maikapat a board meeting ti GUMIL Filipinas iti Ayungin Street, Talipapa, Novaliches, Quezon City inton Marso 13, 2016, 9AM, iti panangsangaili da agkaingungot a Dionisio S. Bulong, adviser ti GF, ken Eden Cachola-Bulong, tesorera ti GF, kas impakaammo ni Arthur P. Urata, Sr., presidente ti GF.

(Naipablaak iti Bannawag, Marso 7, 2016 a bilang.)

Baybay, naparpardas ti ingangatona ngem iti napalabas a 2,800 a tawen

Naparpardas ti ingangato ti baybay no idilig iti napalabas a 2,800 a tawen gapu iti ibabara ti lubong, kas kuna ti maysa a kabaruan a panagadal.

Maysa nga internasional a grupo dagiti sientista a nangiwayat iti panagadal iti nadumaduma a paset ti lubong maipanggep iti ingangato-ibababa ti lebel ti baybay ti nagkuna nga agingga idi 1880s ken iti pannakairubuat ti industrialisasion ti lubong, ti kapardasan a ngimmatuan ti baybay ket mapan a 1 agingga iti 1.5 a pulgada iti uneg ti 100 a tawen. Ngem iti maika-20 a siglo, ngimmato dagiti baybay iti sangalubongan iti 5.5 a pulgada ket manipud met idi 1993, napattapattan a ngumato dagiti baybay iti12 a pulgada iti tunggal 100 a tawen.

Iti pay dua nga agsabali a panagadal a naipablaak iti journal a Proceedings of the National Academy of Sciences, kunana nga inton 2100, mabalin a ngimmatonton dagiti baybay iti 11 agingga iti 52 a pulgada.

Kuna ni Bob Kopp, earth and planetary sciences professor iti Rutgers ken kangrunaan nga autor ti panagadal, a maigapu daytoy nga ingangato ti baybay iti ibabara ti lubong gapu iti panagusar iti fossil fuel (coal, gasolina, kdp.). Iti ibabara ti lubong, in-inut a matunaw dagiti yelo a nangkalupkop iti nadumaduma a paset ti lubong a mangigubuay met iti ingangato ti lebel dagiti baybay.

Kuna dagiti sientista a dakkel a problema ti igubuay ti ingangato ti baybay kas iti pannakapasamak dagiti bumangkag a narungsot a dalluyon no kasta nga agbagyo.


(Naipablaak iti Bannawag, Marso 7, 2016 a bilang.)

Vote Counting Machine iti Ilocos Norte

VOTE COUNTING MACHINE ITI ILOCOS NORTE. Iti pannakaipadas ti maysa a VCM (Vote counting machine) nga addan iti Ilocos Norte a maaramat iti umay a nailian ken lokal nga eleksion inton Mayo 9. Maidilig iti sigud a PCOS machine a nausar iti automated election iti napalabas nga eleksion, kuna ti Comelec nga amang a napaspaspas daytoy a mangbasa ken mang-scan kadagiti botos gapu iti upgraded a memory-na ken addaan pay iti power bank a makapagpaut iti 17 agingga iti 20 nga oras no awan koriente. Adda iti ladawan da Ilocos Norte Provincial Election Supervisor Marino Salas, Comelec technician Juan Florencio Garcia, Edmar Ines iti DWFB Radyo ng Bayan Laoag, Grace Alba iti ABS-CBN Laoag ken ti camera man-na. (Leilanie G. Adriano)


(Naipablaak iti Bannawag, Marso 7, 2016 a bilang.)

MARSO 7, 2016

SARITA
4 Kawar
    Juan Al. Asuncion
14 Amihan
     Virginia G. Alejandro

NOBELA
8 Idi Agawid ni Uppong Idiay Rosales (3)
   Juan S.P. Hidalgo, Jr.
12 Siak ni Precious (52)
  Juan Al. Asuncion

DANIW
6 Binga
   Ria Rebolledo
28 Atab iti Banatabat
      Ronnie E. Aguinaldo
47 Daniw a Para Ubbing
      Marlyn G. Del Rosario

SALAYSAY
16 Asino Dagiti Ibotosmo a Senador?
     Neyo Mario E. Valdez
26 Naganar Met a Pamastrekan ti Kanutkanot
     Reynaldo E. Andres

KOMIKS
35 Kimar (15)
38 Gayang ni Lam-ang (125)
41 Miks & Tiks

KOLUM
10 Apo Hues
19 Dear Doc
20 Okeyka, Apong
23 Haytek!
24 Padasem Daytoy, Kailian
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
 2 Ti Makunami
3 Tao, Lugar, Pasamak
9 Netizone
18 Biag ni Ilokano
21 Siled ti Kararag
22 Naganas Met ti Agtaraken iti Kalapati
29 Ania, Aya, ti Senior High School?
32 Ammuem Pay Dagitoy
34 Ammom ti Umno a Panagsibug Kadagiti Mula?
43 Ti Gasatmo Ita a Lawas
46 Dagiti Pabula ni Aesop

No Agkaykaysa, Napigpigsa

NO AGKAYKAYSA, NAPIGPIGSA. Agarup dua gasut a lallaki ken babbai ti nagtitinnulong a nangaramid iti dike babaen ti “sand bagging” iti paset ti aplaya ti Caroan, Gonzaga, Cagayan a nakaro ti pannakarunot wenno panagrebbana gapu iti nadawel a baybay. Sakbay daytoy, adun a balay a kinnan ti danum. Ginandat idin dagiti residente a pengdan ti iraraut ti danum babaen ti panagisakoda met laeng iti darat ken panagikabil iti dadakkel a bato wenno dagiti rebba dagiti nadadaelen a balbalay, saanda a nagballigi ta bassitda ken bassit met ti nausar a sako. Gapu iti daytoy, iti panangilungalong ni Punong Barangay Angelito Salvador, naplano daytoy nga aktibidad tapno mapengdan ti naparpardas nga idadarup ti danum kadagiti kabalbalayan. Nangted ni Mayor Rene Salvanera iti 2,500 a sako nga isu ti nausar iti panagaramid iti sand barrier. Malaksid kadagiti bumario, simmaranay met ti MDRRMC ti ili a Gonzaga iti panangidaulo ni Mr. Edward Gaspar, sumagmamano a kameng ti Philippine Army nga indauluan ni S/Sgt. Wayne C. Aguinaldo ti Bravo Company, 17 IB, ken sumagmamano nga estudiante iti Kriminolohia iti CSU-Gonzaga. (Roselyn C. Campano)

(Naipablaak iti Bannawag, Pebrero 29, 2016 a bilang.)

Libro maipapan iti Isla Fuga, nairuar

Nairuaren ti libro maipapan iti Isla Fuga, ti isla a karaman iti grupo dagiti isla iti Babuyan ken maysa kadagiti barangay ti Aparri, Cagayan, iti panangipablaak ti St. Paul University-Quezon City.

Napauluan iti Isla Fuga: Sacred Scapes, sinurat daytoy ni Dr. Ronel Dela Cruz, tubo iti Maddalero, Buguey, Cagayan ken agdama a direktor ti Center for Social Innovation and Research ti nasao nga unibersidad.

Maysa a naidumduma a dokumentario ti libro maipapan kadagiti umili a mangikagkagumaan nga agbiag iti laksid dagiti agsasamusam a saplit ti nakaparsuaan ken panagbalbaliw.

Dagiti namaris a ladawan ken detaliado a panagiladawan, iparangda dagiti pampanunot ken dardarepdep dagiti tattao ken dagiti grupo dagiti komunidad a mangbigbig iti Fuga a kas maysa ken kakaisuna a “pagtaengan.”

Malaksid a napateg ti libro para kadagiti lokal ken ganggannaet a turista, umisu daytoy a libro a para kadagiti serioso a sosiologo ken antropologo, ken kadagiti estudiante kadagitoy a tay-ak. Napateg pay daytoy a kontribusion kadagiti obra dagiti historiador, ken nasken a basaen ti tunggal maysa nga addaan iti panangipateg kadagiti nasken a tagipatgen iti daytoy a lubong.

Saan laeng a libro ti Isla Fuga: Sacred Scapes no di ket maysa daytoy a panangamiris iti kananakem, komentario iti kagimongan ken iti historia, maysa a rangtay a namagsipul iti natural iti espiritual, ken maysa a nabaknang ken agduduma a buya a mangiparang iti panunot, nakem ken kararua ti autor ken kadagiti tattao ti Fuga.

Kadagiti interesado a maaddaan iti kopia ti nasao a libro, ag-text/tumawag iti 0918 965 3224 wenno iti (02) 726 7986 loc 174. (AST)

(Naipablaak iti Bannawag, Pebrero 29, 2016 a bilang.)

No awan ti mapili, iblangko ti balota, kuna ti maysa nga Obispo

Imbalakad ti maysa nga Obispo ti Simbaan Katoliko kadagiti botante a no awan ti mapilida a botosan kadagiti kandidato inton eleksion iti Mayo 9, nasaysayaat laengen a pagbalinenda a blangko ti balota.

Segun ken ni Manila Auxilliary Bishop Broderick Pabillo, chairman ti Episcopal Commission on the Laity ti Catholic Bishops’ Conference of the Philippines (CBCP), a saan nga umno ti mangpili kadagiti kandidato a maibilang a “lesser evil” ta daytoy ket nalawag a biddut latta a panagbotos.

Kuna ni Pabillo a ti mangibotos iti “lesser evil” ket mangbotos iti “evil” met laeng. Kuna daytoy a ti di panangisurat iti nagan iti balota ket maysa a political choice ken kalikagum a maisubli ti kultura ti kinaimbag iti sistema ti politika iti pagilian.

Kinuna pay ni Pabillo a paset pay daytoy ti panangikumit dagiti tattao iti pammatida iti Eukaristia (wenno ken ni Jesucristo) ken iti umno a panagbotos ken iti dida panangilaklako iti botosda.


(Naipablaak iti Bannawag, Pebrero 29, 2016 a bilang.)

Cebu, probinsia a kaaduan iti botante

Kadagiti amin a probinsia iti sibubukel a pagilian, ti Cebu ti kaaduan iti botante iti bilang daytoy a 2,722,288.

Sumaruno ditoy ti Cavite, 1,843,168; Pangasinan, 1,705,260; Laguna, 1,675,366, sa ti Negros Occidental, 1,663,492.

Kuna ti Commission on Elections nga iti eleksion iti Mayo 9, adda 54,363,844 a rehistrado a botante.

Iti daytoy a bilang, 26,311,706 ti lallaki idinto a 28,052, 138 ti babbai.

Iti daytoy met laeng a bilang, mapan nga 6,692,763 ti senior citizen; 318,013 ti PWDs; ken 1,376,067 ti overseas absentee voters.

Kadagiti met 18 a rehion iti sibubukel a pagilian, ti Region IV-A ( Cavite-Laguna-Batangas-Rizal-Quezon wenno Calabarzon) ti kaaduan iti botante (7.6-milion); sumaruno ti Nationa Capital Region wenno Metro Manila (6.2-milion); sa ti Region III wenno Central Luzon (6-milion).

Kabassitan iti botante ti Cordillera Administrative Region (906,162).


(Naipablaak iti Bannawag, Pebrero 29, 2016 a bilang.)

PEBRERO 29, 2016

SARITA
4 Amour
Ronelyn B. Ramones
14 Rangtay a Balitok
Consorcio Borje

NOBELA
8 Idi Agawid ni Uppong Idiay Rosales (2)
   Juan S.P. Hidalgo, Jr.
12 Siak ni Precious (51)
   Juan Al. Asuncion

DANIW
6 Iti Yaagibas ti Salemsem
    Arnold C. Baxa
47 Daniw a Para Ubbing
Merla Liza Santos-Camacho

SALAYSAY
16 Ayatem Met ‘Ta Utekmo
     Virginia A. Duldulao, Ph.D.
26 Agmulatayo iti Lengnga
     Reynaldo E. Andres

KOMIKS
35 Kimar (14)
38 Gayang ni Lam-ang (124)
41 Miks & Tiks

KOLUM
19 Dear Doc
20 Saludsodem ken ni Apo Hues
23 Haytek!
24 Padasem Daytoy, Kailian
28  Okeyka, Apong
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
 2 Ti Makunami
9 Netizone
10 Tao, Lugar, Pasamak
18 Biag ni Ilokano
21 Siled ti Kararag
22 Panangpili iti Taraknen a Kalapati
29 Ania Ngamin, Aya, ti Ortograpia?
32 Ammuem Pay Dagitoy
34 Panangtaripato Kadagiti Mula iti Uneg ti Balay
43 Ti Gasatmo Ita a Lawas
46 Dagiti Pabula ni Aesop

Kappuros nga Organiko a Nateng

KAPPUROS NGA ORGANIKO A NATENG. Mairaman kadagiti nakaawis iti imatang dagiti pimmasiar iti “Tiendaan ni Gob” bayat ti pannakarambak ti maika-198 nga anibesario ti pannakabangon ti probinsia ti Ilocos Norte dagiti kappuros nga organiko a nateng a produkto dagiti mannalon iti Dingras, Ilocos Norte. Itantandudo ita ti gobierno probinsial ti panagmula kadagiti kabaruanan a barayti ti nateng ken prutas a nalaka a maapit ken nakidser iti pudot wenno layus malaksid a tultulonganna dagiti mannalon iti pannakailako no di man pannakaiproseso dagiti produkto tapno nalaklaka a malako dagitoy. (Leilanie G. Adriano)


(Naipablaak iti Bannawag, Pebrero 22, 2016 a bilang.)

Libro iti panagsurat iti daniw a para ubbing, mairuar

Maysa a libro maipapan iti panagsurat iti daniw a para ubbing ti manamnama a mayalnag kabayatan ti Dap-ayan 2016, ti maika-48 a nailian a kombension ti GUMIL Filipinas inton Abril 22-24, 2016 iti Apayao Agri Eco-Tourism & Sports Complex, Payanan, San Gregorio, Luna, Apayao.

Napauluan iti Makasuratka Met iti Daniw a Para Ubbing Kas Maibatay iti Kurikulum, naibinsabinsa iti nasao a libro dagiti ramen ti daniw a para ubbing ken dagiti addang tapno masurat daytoy kas maibatay iti agdama a kasapulan ti programa a Mother Tongue-Based Multilingual Education (MTB-MLE). Sinurat ni Johmar R. Alvarez, premiado a mannaniw ken maysa kadagiti mangipangpangruna iti panagsurat iti daniw a para ubbing, naipangruna a naaramat iti daytoy a libro dagiti daniw dagiti mannaniw nga Ilokano a kas pagwadan.

Para iti kopia ti libro, ag-text/umawag iti 0929 280 2830 wenno 0927 267 5950.


(Naipablaak iti Bannawag, Pebrero 22, 2016 a bilang.)

Reyna ti GUMIL, mapili

Mapili ti Reyna ti GUMIL (Mrs. GUMIL Filipinas) iti daytoy Dap-ayan 2016, ti maika-48 a nailian a kombension ti GUMIL Filipinas inton Abril 22-24, 2016 a maangay iti Apayao Agri Eco-Tourism & Sports Complex, Payanan, San Gregorio, Luna, Apayao, kas impalagip ni GF Treasurer Eden Cachola-Bulong, mangidaulo iti komite ti Reyna ti GUMIL.

Nagbalinen a tradision kadagiti mannurat nga Ilokano ti panangpilida iti Mrs. ken Miss GUMIL Filipinas a malaksid a kas pangtaginayonda iti kultura dagiti Ilokano a mangbalangat iti maysa a reyna wenno mutia kadagiti piesta, agpaay daytoy a pagur-oranda iti pondo a para kadagiti proyekto ti gunglo.

Kuna ni Ms. Cachola a tunggal sanga wenno chapter ti GUMIL Filipinas, addaan iti kandidata para iti daytoy a gannuat.


(Naipablaak iti Bannawag, Pebrero 22, 2016 a bilang.)

Pannakapapanaw dagiti OFW iti ME, masipsiputan

Inako ti Department of Labor and Employment (DoLE) nga adda ita moderate retrenchment iti Saudi Arabia, ken posible a rinibu nga overseas Filipino worker (OFW) ti mapukawan iti trabaho iti Middle East.

Maysa kadagiti maitudo a makaigapu ti panagkapsut ti ekonomia ti sumagmamano a pagilian nga agpatpataud iti lana iti rehion, kas imbunga ti panagsuek ti presio ti produkto a petrolio.

Agtultuloy a bambantayan ti DoLE ti situasion, ket nadakamat a no agtultuloy ti pannakapapanaw dagiti mangmangged iti Middle East, mapagam-amkan nga umabot iti 1.5-milion nga OFW ti mapukawan iti trabaho.


(Naipablaak iti Bannawag, Pebrero 22, 2016 a bilang.)

Respetuenyo ti padayo a kandidato, kiddaw ti PPCRV kadagiti kandidato

Iti pannakairubuat ti kampania a para iti nailian nga eleksion inton Mayo 9, kiniddaw ti election watchdog ti Simbaan Katoliko a Parish Pastoral Council for Responsible Voting (PPCRV) a maiwayat koma a nainkappian ti kampania ket maliklikan ti panagpipinniltak dagiti kandidato.

Kinuna ni PPCRV National Chairperson Henrietta de Villa kadagiti kandidato nga agpakataoda koma ken ipaayda ti umno a respetoda iti padada a kandidato babaen ti inaldaw a panangarisit iti konsiensia tapno maamiris a ti tao, napartuat iti imahen ken kapada ti Dios.

Dinawat pay ni De Villa nga awan koma ti maidasay a biag iti kampania, ken masalakniban koma ti aglawlaw nangruna dagiti kayo babaen ti saan a panagipigket ket panagilansa ditoy kadagiti poster.

Innayonna pay a rebbenga a maipaayan iti dignidad dagiti botante babaen ti maysa a nadalus, nadayaw, addaan sungsungbatan, addaan kaipapanan, ken nainkappiaan a kampania.


(Naipablaak iti Bannawag, Pebrero 22, 2016 a bilang.)

PEBRERO 22, 2016

SARITA
4 Ti Biag ni Don Pobre, Taga-Nagcayangan
     Rolando A. Seguro, Jr.


NOBELA
8 Idi Agawid ni Uppong Idiay Rosales (1)
   Juan S.P. Hidalgo, Jr.
12 Siak ni Precious (50)
   Juan Al. Asuncion

DANIW
6 Maikadua a Sabado
    Daniel L. Nesperos
17 Iriak ni Fresenius
     Alegria Tan-Visaya
47 Daniw a Para Ubbing
     Leonora R. Melchor

SALAYSAY
16 Lima Laengen ti Pagpilian
     Neyo Mario E. Valdez
28 Naganar ti Petsay iti Rugrugi ti Kalgaw
     Reynaldo E. Andres

KOMIKS
35 Kimar (13)
38 Gayang ni Lam-ang (123)
41 Miks & Tiks

KOLUM
9 Saludsodem ken ni Apo Hues
10 Okeyka, Apong
22 Tips
23 Haytek!
26 Padasem Daytoy, Kailian
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
 2 Ti Makunami
 3 Tao, Lugar, Pasamak
16 Netizone
18 Biag ni Ilokano
19 Siled ti Kararag
20 Panagpili iti Gatangen a Pagpakan iti Aso
21 Komusta ti K-12 Basic Education?
22 TIPS
24 Awisendakayo iti “Panagbenga 2016”!
30 Makainutka iti Danum a Pagpasayak
32 Ammuem Pay Dagitoy
34 Ditay Ammom ti Agtagibalay?
43 Ti Gasatmo Ita a Lawas
46 Dagiti Pabula ni Aesop

Bennek, Apo!

BENNEK, APO! Makumikom dagitoy agina nga aglako iti bennek iti Sanchez Mira Public Market, Sanchez Mira, Cagayan. Naggapu kano pay idiay Brgy. Canayon iti ili ti Abulug, Cagayan dagitoy natataba a lakoda a bennek wenno tukmem, a kas awagda iti Ilokos. Naimas a palkangen (malaokan iti kamatis, laya ken matemplaan iti bugguong). (Raquelito B. Cenal)


(Naipablaak iti Bannawag, Pebrero 15, 2016 a bilang.)

Zika, di rumbeng a yaleng-aleng

Imballaag ti pangulo ti Catholic Bishops Conference of the Philippines Episcopal Commission on the Pastoral Care of Migrants and Itinerant People (CBCP-ECMI) kadagiti overseas Filipino workers (OFWs) itay lawasna ti panagan-annad dagitoy iti Zika virus.

Kangrunaan a nangiturongan ni Balanga Bishop Ruperto Santos iti ballaagna dagiti Filipino nga agnanaed iti Amerika, kangrunaanna iti Latin America (Abagatan nga Amerika), a naireport a nakapasamakan ti kaaduanna a nakapet ti nasao a bayrus.

Ti lamok nga Aedes (Aedes mosquito) ti mapabpabasol nga agiwarwaras iti nasao a bayrus. Daytoy met laeng ti maitudtudo nga agiwarwaras iti dengue, chikungunya ken yellow fever.

Mairaman kadagiti sintoma daytoy ti gurigor, skin rash ken conjunctivitis a gagangay nga agpaut iti dua agingga iti pito nga aldaw.

Iti agdama, addan 23 a pagilian a naireport nga addaan kadagiti kaso ti Zika.

Kangrunaan a naapektaran ti Brazil, a naireport nga addaanen iti 3,700 a kaso ti microcephaly, maysa a depekto iti kayanak a maladaga (bassit ti ulona ken saan a nasayaat ti pannakaporma ti utekna) a maitudtudo a gapu iti Zika virus.

Iti biang ti Department of Health ti Filipinas, kuna ni DOH Spokesperson Lyndon Lee Suy nga iti wagas ti pannakayakar ti bayrus manipud iti tao a mapan iti sabali a tao, adda latta posibilidadna a makadanon ti bayrus iti sadino man a pagilian, a pakairamanan ti Filipinas.


(Naipablaak iti Bannawag, Pebrero 15, 2016 a bilang.)

Gobierno probinsial ti Ilocos Norte, pinadayawanna dagiti pagwadan a polis ken civilian volunteer group

Gapu iti pagwadan a panagserbida kadagiti umili babaen ti panangaywanda iti urnos ken talna, 14 a polis 4 nga estasion ti polisia ken 4 a volunteer group ti pinadayawan ti Gobierno Probinsial ti Ilocos Norte (PGIN) idi Peb. 5, kas paset ti panangrambak ti probinsia iti Maika-198 nga Anibersario ti Pannakabangonna.

Mismo a ni Gob. Imee R. Marcos ti nangyawat iti sertipiko ti pammigbig ken kuarta a gunggona kadagiti napadayawan, kas sumaganad:

PCI Amador M. Quiocho, PCI Dennis M. Sumalileng, PSUPT Jose C. Calpito III, PSI Paul Benedict R. Parado, PSUPT Adolfo T. Rafanan, PCI Dexter Diovic T. Corpuz, PCI Jonathan B. Papay, PCI Randy C. Baoit, PSUPT Leland T. Benigno, PCI Rodrigo B. Galino, PSUPT Dexter Mariano T. Paredes, SPO4 Ramelito F. Piedad, PSUPT Albert E. Ocon and SPO2 Aurora Joy D. Manuela.

Malaksid kadagiti opisial ti polisia, uppat a local police station ken uppat a civilian crime prevention volunteer group iti probinsia ti napadayawan,

Napili ti Laoag City Police Station a kas Best Performing City Police Station. Idauluan daytoy ni PSUPT Edwin C. Balles.

Napili met a Best Performing Municipal Station ti Paoay Municipal Police Station nga idaukuan ni PSI Nelson Del Castillo.

Nairaman met kadagiti napadayawan a civilian volunteer group iti probinsia ti Motorist Anti-Street Crime Operatives (MASCO) and Barangay Peacekeeping Action Team (BPAT) Association for Direct Operations (MASCOBADO). (John Michael Mugas)


(Naipablaak iti Bannawag, Pebrero 15, 2016 a bilang.)

PEBRERO 15, 2016

SARITA
4 Leda
   Joel M. Manuel

NOBELA
8 Operation: Drop Venus (Maudi a Paset)
   Norberto D. Bumanglag, Jr.
12 Siak ni Precious (49)
   Juan Al. Asuncion

DANIW
6 Idiay Pasdong
   Rea Rebolledo
19 Adtoy ti Pusok
    Amado I. Yoro
47 Daniw a Para Ubbing
     Marlyn G. Del Rosario

SALAYSAY
14 Ania ti Sapsapulem iti Maysa a Kaayan-ayat?
     Fernando B. Sanchez
24 Makaited Met ti Angin iti Elektrisidad
     Virginia A. Duldulao, Ph.D.
28 Agmulatayo iti Singkamas
     Reynaldo E. Andres

KOMIKS
35 Kimar (12)
38 Gayang ni Lam-ang (122)
41 Miks & Tiks

KOLUM
 9 Okeyka, Apong
10 Saludsodem ken ni Apo Hues
17 Dear Doc
23 Haytek!
26 Padasem Daytoy, Kailian
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
 2 Ti Makunami
 3 Tao, Lugar, Pasamak
13 Netizone
16 Biag ni Ilokano
18 Dagiti Pagannurotan ti ALVIYA Salip iti Sarita
20 Idi Un-unana a Panawen
21 Siled ti Kararag
22 Kasano ti Agpili iti Taraknen nga Uken?
32 Ammuem Pay Dagitoy
34 Dadduma Pay nga Usar ti Sitrus
43 Ti Gasatmo Ita a Lawas
46 Dagiti Pabula ni Aesop