Jemima, 19

Ni Jemina iti ladawanna iti Instagram.

Aldaw ti Lunes, nagpakada a mapan kadagiti gagayyemna ta adda leppasenda a group project. Natalged ti amana a nangpalubos. Kalpasan ti agpatnag, nasarakan daytoy iti highway iti Barangay San Cristobal, Sarrat, Ilocos Norte. Nalamiisen a bangkay.

Agingga ita a masursurat daytoy a damag, an-anupen pay laeng dagiti autoridad ni Victorino Mangabat, Jr. aka Francisco “Kiko” Ortega, tubo iti Cauayan, Isabela, maitudtudo a suspect iti pannakapapatay ni Jemima Kezia Andres, 19, kakaisuna nga anak da Reynaldo ken Nonalyn Andres ti Poblacion, Currimao, Ilocos Norte. Agad-adal iti AB English (4th year) iti Mariano Marcos State University iti Siudad ti Batac ket planona iti mangala iti kinaabogasia kalpasan a makaturpos.

Segun iti imbestigasion ti polisia ken testimonia dagiti gagayyem ti biktima, nagsagaba ni Jemima iti maysa a tama ti paltog iti ulona. Ni Mangabat ti kaudian a nakita a kadua ni Jemima kalpasan a napan dinagas ni Mangabat daytoy iti Bacucang, Batac a nagaramiddan da Jemima iti group project. Nakaluganda iti puraw a Mitsubishi Montero Sport nga addaan iti plaka a NE0 733.

Iti panangsapul dagiti imbestigador iti suspect, naduktalanda nga awanen ni Mangabat iti kaserana iti Brgy. Aglipay, Batac, kaduana ti inana ken ti putotna nga agtawen iti dua.

Kadagiti asino man nga addaan iti impormasion maipanggep iti suspect, kidkiddawen ti ama (mannurat ti Bannawag) ti biktima nga ipakaammoda koma a dagus daytoy kadagiti pannakabagi ti linteg. Mauk-ukkon metten iti pondo a kas reward money tapno matiliw ti suspek ket maikkan iti hustisia ti nakaam-ames a pannakapapatay ti biktima.

Naiget met a kinondena ni Gobernador Imee Marcos ti Ilocos Norte ti napasamak ket imbilinna iti Philippine National Police iti probinsia iti daras a pannakasolbar ti kaso. (Leilanie G. Adriano)

(Naipablaak iti Bannawag, Agosto 24, 2015 a bilang.)