No Dumteng ti Kalamidad

NO DUMTENG TI KALAMIDAD... Kalpasan ti nakaro a layus iti Ilocos Norte a nangtinep iti adu a kabalbalayan, nangtuang kadagiti poste ti koriente, nangkurukor kadagiti karayan, nangdadael kadagiti kalsada, rangtay ken nangsawang kadagiti dike, irigasion ken dadduma pay, dagdagus met a naipaayan iti tulong dagiti nadidigra babaen ti liderato ni Gobernador Imee Marcos ken iti pannakitinnulong dagiti ahensia ti gobierno, NGOs ken dagiti negosiante ken pribado a tattao. Malaksid kadagiti family food packs, adda pay generator sets a naibunong kadagiti nasulinek a barangay a dinuprak ti bagyo, libre a tawag, medisina ken check-up kadagiti agsakit maigapu iti bagyo, ken adda pay libre a pagluganan kadagiti sumagmamano a rota iti nadumaduma nga ili, libre a charging stations iti kapitolio ken iti dadduma pay a munisipio ken barangay nga adda generator-na. Itay Agosto 25 a pannakasursurat daytoy, umaboten iti nasurok a maysa bilion a pisos ti balor dagiti nadadael a sanikua, mula, dingo ken iti impraestruktura gapu iti panangsaplit ni Bagyo Ineng iti Amianan a Luzon. (Leilanie G. Adriano)

(Naipablaak iti Bannawag, Septiembre 7, 2015 a bilang.)

Saan a balikbayan box: Panagipuslit iti asukar, bagas, pasipsiputan ti Senado

No ni Senador Miriam Defensor-Santiago ti matungpal, saan a dagiti balikbayan box nga ipatpatulod dagiti overseas Filipino workers ti rumbeng a siputan ken kasuan ti Bureau of Customs no di ket dagiti illegal nga agiserserrek iti asukar ken bagas iti pagilian.

Segun ken ni Santiago, rinibu a sako ti bagas ken asukar manipud iti Thailand ti nakompiskar dagiti autoridad iti nadumaduma a pantalan iti pagilian itay nabiit.

Naammuan a nagdalan nga immuna iti Hong Kong dagiti “high grade” nga asukar ken nasuktan iti deklarasion daytoy a kas “plastic utensils” ngem natiliwan.

Immuna nga imbatad ni Senador Cynthia Villar, chairman ti Senate committee on food and agriculture, ti pannakadismayana iti agtultuloy nga iseserrek dagiti kontrabando nga asukar ken bagas.


(Naipablaak iti Bannawag, Septiembre 7, 2015 a bilang.)

SEPTIEMBRE 7, 2015

SARITA
4 Ligaya
    Arnold C. Baxa
   
NOBELA
12 Operation: Drop Venus (29)
     Norberto D. Bumanglag, Jr.
16 Siak ni Precious (26)
     Juan Al. Asuncion

DANIW
9 Agsapa iti Piat
    Louie Jon A. Sanchez
47 Dandaniw a Para Ubbing
     Ronelyn B. Ramones/ Roselyn C. Campano

SALAYSAY
10 Ania Ngata No Awan Selponmo?
      Virginia A. Duldulao, Ph.D.
20 No Lakayen, Saanen a Maibalud?
      Neyo Mario E. Valdez
24 Apay nga Agmulatayo iti Kawayan?
     Leilanie G. Adriano
40 Naandur Daytoy a Barayti ti Bawang
    Reynaldo E. Andres

KOMIKS
27 Gayang ni Lam-ang (100)
30 Aritosan (151)
32 Miks & Tiks

KOLUM
14 Saludsodem ken ni Apo Hues
15 Dear Doc
22 TIPS
23 Okeyka, Apong
26 Haytek!
35 Kastoy, Kapid, Ditoy Hawaii
36 Ading Kosinera
42 Padasem Daytoy, Kailian

PAGLINGLINGAYAN
44 Showbiz
48 Sinniriban
48 Sapukas
48 Sudoku
48 Agkatawa ti Mayat

DADDUMA PAY
 2 Ti Makunami
 4 Tao, Lugar, Pasamak
17 Txtm8
18 Siled ti Kararag
19 Adda Met Pusa a Managbutbuteng
34 Ammuem Pay Dagitoy
37 Panangdalus iti Alpombra
38 Edukasion Dagiti Ubbing: Agtultuloy Koma ti Pannakapasayaatna
39 Ti Gasatmo Ita a Lawas
46 Idi Un-unana a Panawen

"Paspas Dur-as Dagiti Gunglo ti Babbai iti Laoag

“PASPAS-DUR-AS” DAGITI GUNGLO TI BABBAI ITI LAOAG. Babaen ti panagsanay ken mayannatup a teknolohia, ipakpakita dagitoy a babbai a kameng ti gunglo dagiti babbai iti Siudad ti Laoag nga adda met kuarta manipud iti sukaw (water lily). Kadawyan a makita dagitoy atap a mula iti igid ti karayan, dan-aw (danaw) wenno waig. Alisto nga umadu dagitoy ket ibusenda ti nakiddit a danum a pagtubuan. Imbes a perhuisio, nam-ay ti inted dagitoy a sukaw kadagitoy a gunglo ti babbai iti Kailokuan ta nasursuroda no kasano nga apiten ket malaga dagitoy iti nadumaduma a produkto a kas kadagiti makita iti ladawan. Adda bag, folder, kallugong, tsinelas, place mat ken dadduma pay nga ar-aramidenda a panguartaan. Tunggal adda maangay a trade fair wenno exhibit, dagitoy a produkto ti maysa kadagiti kaunaan a maibus. Babaen ti online marketing, adu payen dagiti adda iti ballasiw-taaw a mayat nga agorder gapu ta nalagda ken naidumduma dagitoy ken madlaw a “nalaga gapu iti ayat.” (Leilanie G. Adriano)

(Naipablaak iti Bannawag, Agosto 31, 2015 a bilang.)

100-K a gunggona, naukkon para iti pannakatiliw ti nangpapatay iti estudiante ti MMSU

Ni LEILANIE G. ADRIANO

MANGABAT, JR.

Aganayen a P100,000.00 ti naukkon a gunggona para iti asino man a makaitudo iti paglemlemmengan ti maatap a pimmatay iti estudiante ti Mariano Marcos State University a ni Jemima Kezia M. Andres, 19, ken kakaisuna nga anak da Reynaldo E. Andres (mannurat ti Bannawag) ken Nonalyn Andres ti Poblacion, Currimao, Ilocos Norte.

Maitudtudo ti maysa a Victorino Mangabat, Jr., tubo iti Cauayan, Isabela, a pimmatay ken ni Maimai (birngas ni Jemima). Ni Mangabat ti naitudo a kaudian a kadua ti biktima sakbay a nasarakan ti bangkay ni daytoy a naiwalang iti national highway iti Barangay San Cristobal, Sarrat, Ilocos Norte idi parbangon ti Agosto 4.

Kagiddan ti pannakaitulod ti bangkay ni Maimai iti Municipal Cemetery ti Currimao idi Agosto 12, naipila met ti kaso a murder kontra ken ni Mangabat ken iti inana a ni Dalia a maipagarup a kaduana a naglibas manipud iti balay nga up-upaanda iti Barangay Aglipay, Batac, Ilocos Norte.

Maibatay iti kaudian a resulta ti imbestigasion ti polisia, naammuanen ti kinaasino ti orihinal nga akinkukua iti plaka ti Montero Mitsubishi nga us-usaren ti suspek. Awan met ti masnop nga adres ni Mangabat nga agus-usar iti nadumaduma nga alias a kas iti Francis “Jay-R” Ortega Jr. ken Faustino Madrid Dy IV ta agakar-akar iti pagyanan, kaduana ti inana ken ti maipagarup a putotna nga agtawen iti dua.

Malaksid ti kaudian a kasona, maatap pay ni Mangabat a kas responsable iti panagpukaw ti live-in partner daytoy a ni Angel Fhemie Rodriguez. Sabali pay ti kasona a carnapping ken ti dina panagbayad iti full-tank a krudo iti nagpakargaanna a gasoline station iti Ilocos Norte a maipagarup a napasamak kalpasan ti ipapanawda iti kaserada iti Batac.

Gapu iti naaramid ken ni Maimai, kuna ni Acting Provincial Director Albert Ocon a maibilangen ni Mangabat a kas “Most Wanted iti Ilocos Norte” a naiget a sipsiputan dagiti autoridad.

(Naipablaak iti Bannawag, Agosto 31, 2015 a bilang.)

Marihuana, mausar a kas agas?

CBCP, nangiruar iti pastoral letter mapanggep iti “marijuana bill”

Nangiruar itay nabiit ti Catholic Bishops Conference of the Philippines (CBCP) iti pastoral letter a kas tarabay maipanggep iti “marijuana bill” iti baet dagiti diskusion no rebbengna a maaramid a legal wenno saan a kas medical treatment ti marihuana.

Impaganetget ni CBCP President Lingayen Dagupan Archbishop Socrates Villegas a saan met a namimpinsan a konkontraen ti Simbaan ti panagbalin a legal ti pannakausar ti marijuana, nangruna no para iti aspekto a medikal.

Inlawlawag ni Villegas nga awan ti bibiang ti Simbaan iti isyu iti panangiwardas ken mekanismo ti ahensia a madutokan a mangiwanwan iti daytoy, no di ket kitaenda ti pannakaiwardas a saan nga agbunga iti panagkunniber ken panagriro.

Mainaig iti daytoy, nangiruar iti ethical principles ti CBCP a nangipaganetget iti immoralidad ti panangabuso iti panagusar iti marihuana ken ania man a sobra a para iti umno a medical treatment.

Kuna pay ni Villegas a masapul a nalawag kadagiti Katoliko a Filipino ti Katekismo a maibilang met a pannakailuod (addiction) ti sobra a panangabuso iti bagi, kas iti sobra a panaginum iti arak, panagaramat iti droga ken panagsigarilio.

(Naipablaak iti Bannawag, Agosto 31, 2015 a bilang.)

Lingbaoan, kdp., padayawan ti UMPIL iti Gawad Pambansang Alagad ni Balagtas

Padayawan ti Unyon ng mga Manunulat sa Pilipinas (UMPIL), ti gunglo dagiti mannurat iti Filipinas, ni Linda T. Lingbaoan-Bulong iti daytoy nga Agosto 29, 2015 bayat ti pannakaangay ti Pambansang Kongreso ng mga Manunulat iti Escaler Hall iti Ateneo de Manila University.

Maipaay ken ni Lingbaoan ti 2015 Gawad Pambansang Alagad ni Balagtas para kadagiti sinuratna a sarita ken nobela iti Ilokano (Kathang Ilokano).

Kakadua ni Lingbaoan a mapadayawan da Crisostomo B. Balairos (Kathang Hiligaynon), Nemesio S. Baldesco Sr. (Tulang Waray), Rafael A. Banzuela Jr. (Tulang Bikolnon), Marcelo A. Geocallo (Kathang Sebuwano), Susan S. Lara (Kathang Ingles, Yen Makabenta (Sanaysay sa Ingles), Victor Emmanuel Carmelo D. Nadera Jr. (Tulang Filipino), Danton R. Remoto (Tulang Ingles), ken Rody Vera (Dulang Filipino).

Maipaayan met iti Gawad Paz Marquez Benitez ni Dr. Erlinda Kintanar Alburo, kas pagtamdan a mannursuro iti literatura.

Maipaayan met iti Gawad Pedro Bucaneg ti Integrated Performing Arts Guild (IPAG) ti Marawi State University-Iligan Institute of Technology (MSU-IIT) ti Iligan City.

Ti nasao a seremonia ti pammadayaw ket maysa kadagiti tallo a programa iti nasao a Pambansang Kongreso ng mga Manunulat 2015. Karaman pay ti Adrian Cristobal Lecture Series ken Writers’ Forum.

Napili nga Adrian Cristobal Lecturer ni Propesor Solita Collas-Monsod, ekonomista ken nalatak a personalidad iti radio ken telebision manipud iti Departamento ti Ekonomia ti University of the Philippines iti Diliman, Quezon City. Napauluan ti pannakiinnuman ni Monsod iti “The Largest Crocodile in the World.”

Panagsasarita met maipapan iti pakaseknan dagiti mannurat ti Writers’ Forum a napauluan iti “E-Karapatan: The Writers’ Rights Online.”

Maawis iti nasao a kongreso ti asino man nga interesado iti literatura ken panagsurat, ken kadagiti kayatna nga agkameng iti UMPIL.

Para iti dadduma pay a detalye, makiuman ken ni Blsng. Eva Garcia Cadiz (0917 845 3721) wenno ken ni Dr. Michael M. Coroza, Sekretario-Heneral ti UMPIL (mcoroza@ateneo.edu).

(Naipablaak iti Bannawag, Agosto 31, 2015 a bilang.)

AGOSTO 31, 2015

SARITA
4 Ti Kotse ni Iliong
    Rolando A. Seguro, Jr.
   
NOBELA
12 Operation: Drop Venus (28)
     Norberto D. Bumanglag, Jr.
16 Siak ni Precious (25)
     Juan Al. Asuncion

DANIW
9 Isasangpet ti Ganggannaet
    Mighty C. Rasing
47 Dandaniw a Para Ubbing
    Rolando A. Seguro, Jr./ Cles B. Rambaud

SALAYSAY
10 Iti Yuyeng Dagiti Riniwriw nga Awis
      Paul Blanco Zafaralla, Ph.D.
20 Iti Eleksion 2016: Ditay Koma Liplipatan ti Parikuttayo iti Tsina
      Neyo Mario E. Valdez
24 Libro Ilokano 2015: 1st Ilokano Book Fair: “Lagip ni Don Belong, iti Libro Mataginayon”
     Roy V. Aragon
40 Nasken Met a Mataripato ti Kinawayanan
    Reynaldo E. Andres

KOMIKS
27 Gayang ni Lam-ang (100)
30 Aritosan (151)
32 Miks & Tiks

KOLUM
14 Saludsodem ken ni Apo Hues
15 Dear Doc
22 TIPS
23 Haytek!
35 Kastoy, Kapid, Ditoy Hawaii
36 Ading Kosinera
38 Okeyka, Apong
42 Padasem Daytoy, Kailian

PAGLINGLINGAYAN
44 Showbiz
48 Sinniriban
48 Sapukas
48 Sudoku
48 Agkatawa ti Mayat

DADDUMA PAY
 3 Ti Makunami
 4 Tao, Lugar, Pasamak
17 Txtm8
18 Siled ti Kararag
19 Panagririri Dagiti Pusa
26 Mangrugi ti Amin iti Balabala
34 Ammuem Pay Dagitoy
37 Panangurnos  iti Nagyan ti Repriheradura
39 Ti Gasatmo Ita a Lawas
46 Idi Un-unana a Panawen

Electronic Test

ELECTRONIC TEST. Dagiti agad-adal iti Claveria Rural and Vocational School bayat ti First Periodical Test-da iti Computer Hardware Servicing a major-da iti STVE (Strengthened Technical Vocational Education) a kompiuter ti us-usarendan iti panageksamenda ken saanen a masapul ti bolpen ken papel. Iti daytoy a wagas, malag-anan pay dagiti mannursuro ta dagus a mabilangen ti sungbat dagiti ubbing. (Raquelito B. Cenal)

(Naipablaak iti Bannawag, Agosto 24, 2015 a bilang.)

Jemima, 19

Ni Jemina iti ladawanna iti Instagram.

Aldaw ti Lunes, nagpakada a mapan kadagiti gagayyemna ta adda leppasenda a group project. Natalged ti amana a nangpalubos. Kalpasan ti agpatnag, nasarakan daytoy iti highway iti Barangay San Cristobal, Sarrat, Ilocos Norte. Nalamiisen a bangkay.

Agingga ita a masursurat daytoy a damag, an-anupen pay laeng dagiti autoridad ni Victorino Mangabat, Jr. aka Francisco “Kiko” Ortega, tubo iti Cauayan, Isabela, maitudtudo a suspect iti pannakapapatay ni Jemima Kezia Andres, 19, kakaisuna nga anak da Reynaldo ken Nonalyn Andres ti Poblacion, Currimao, Ilocos Norte. Agad-adal iti AB English (4th year) iti Mariano Marcos State University iti Siudad ti Batac ket planona iti mangala iti kinaabogasia kalpasan a makaturpos.

Segun iti imbestigasion ti polisia ken testimonia dagiti gagayyem ti biktima, nagsagaba ni Jemima iti maysa a tama ti paltog iti ulona. Ni Mangabat ti kaudian a nakita a kadua ni Jemima kalpasan a napan dinagas ni Mangabat daytoy iti Bacucang, Batac a nagaramiddan da Jemima iti group project. Nakaluganda iti puraw a Mitsubishi Montero Sport nga addaan iti plaka a NE0 733.

Iti panangsapul dagiti imbestigador iti suspect, naduktalanda nga awanen ni Mangabat iti kaserana iti Brgy. Aglipay, Batac, kaduana ti inana ken ti putotna nga agtawen iti dua.

Kadagiti asino man nga addaan iti impormasion maipanggep iti suspect, kidkiddawen ti ama (mannurat ti Bannawag) ti biktima nga ipakaammoda koma a dagus daytoy kadagiti pannakabagi ti linteg. Mauk-ukkon metten iti pondo a kas reward money tapno matiliw ti suspek ket maikkan iti hustisia ti nakaam-ames a pannakapapatay ti biktima.

Naiget met a kinondena ni Gobernador Imee Marcos ti Ilocos Norte ti napasamak ket imbilinna iti Philippine National Police iti probinsia iti daras a pannakasolbar ti kaso. (Leilanie G. Adriano)

(Naipablaak iti Bannawag, Agosto 24, 2015 a bilang.)

Miting ti GUMIL Metro Manila: Agosto 23

Maangay ti general membership meeting ti GUMIL Metro Manila, gunglo dagiti mannurat nga Ilokano, inton Agosto 23, 2015, 9 AM, iti panagsangaili ni Pedro Bucaneg awardee Jose A. Bragado, mammagbaga ti gunglo, iti Child Jesus College, Bagong Silang, Caloocan City.

Para iti dadduma pay nga impormasion, makiuman ken ni GMM Secretary Aileen B. Serrano iti 0927 561 7827. (Anna Liza M. Gaspar)

(Naipablaak iti Bannawag, Agosto 23, 2015 a bilang.)

AGOSTO 24, 2015

SARITA
6 Villa
    Ariel S. Tabag

NOBELA
12 Operation: Drop Venus (27)
     Norberto D. Bumanglag, Jr.
16 Siak ni Precious (24)
     Juan Al. Asuncion

DANIW
9 Agukradka iti Lagip
    Roy V. Aragon
26 Idatengda Koma ti Bara iti Agpatnag
     Cles B. Rambaud
47 Dandaniw a Para Ubbing
     Marlyn G. Del Rosario/ Jobert M. Pacnis

SALAYSAY
10 Dagiti Mula a Makaagas: Serpentina ken Barunibod
      Virginia A. Duldulao, Ph.D.
24 Asino ti Bise ni Binay?
     Neyo Mario E. Valdez
40 Simple Ngem Nasamay ti Eco Compost Receptacle
    Jim P. Domingo

KOMIKS
27 Gayang ni Lam-ang (99)
30 Aritosan (150)
32 Miks & Tiks

KOLUM
14 Saludsodem ken ni Apo Hues
15 Dear Doc
22 TIPS
23 Okeyka, Apong
35 Kastoy, Kapid, Ditoy Hawaii
36 Ading Kosinera
42 Padasem Daytoy, Kailian

PAGLINGLINGAYAN
44 Showbiz
48 Sinniriban
48 Sapukas
48 Sudoku
48 Agkatawa ti Mayat

DADDUMA PAY
 2 Ti Makunami
 4 Tao, Lugar, Pasamak
17 Txtm8
18 Siled ti Kararag
19 Ad-adu ti Pagsayaatanna ti Panagtaraken iti Aso…
20 Ne, Ayuyangen Dagiti Turista ti Bia-o!
21 Wen, Pudno a Napateg ti Nakayanakan a Pagsasao
34 Ammuem Pay Dagitoy
37 Kasano ti Panangikarga Kadagiti Kawes iti Maleta Wenno Bag No Agbiaheka?
38 Relaks, Relaks, Sir ken Ma’am!
39 Ti Gasatmo Ita a Lawas
46 Idi Un-unana a Panawen

Siaanus Daytoy nga Agay

SIAANUS daytoy nga Agay a taga-Brgy. Zitanga, Ballesteros, Cagayan a mangilaklako kadagiti produktona a sua manipud kadagiti naruay a mulada iti kabambantayan. Mapan a singko agingga iti siete pisos ti sangabukel ti nasam-it ken natubbog a suana. (Jobert M. Pacnis)

(Naipablaak iti Bannawag, Agosto 17, 2015 a bilang.)

GUMIL Apayao, sangailienna ti Dap-ayan 2016

Napili ti GUMIL Apayao a mangsangaili ti Dap-ayan 2016, ti tinawen a kombension ken literary seminar ti GUMIL Filipinas (GF), gunglo dagiti mannurat nga Ilokano, inton Abril 22-24, 2016 iti Apayao Agri-Tourism & Sports Complex, San Gregorio, Luna, Apayao.

Daytoy ti napagnunumuan iti miting dagiti opisial ti GF nga idauluan ni Presidente Arthur P. Urata, Sr. a naangay itay Agosto 2 iti Tuding, Itogon Benguet.

Siinanama ni Remy N. Albano, kameng ti GF Board ken presidente ti GUMIL Apayao ken agdama a bokal ti probinsia, a maipakita dagiti taga-Apayao saan laeng a ti kinadekket ti panagkakaduada a kameng ti gunglo, no di pay ket dagiti agkakapintas a lugar a pagpasiaran iti probinsia.

Daytoy ti umuna a gundaway a maangay iti Apayao ti tinawen a kombension ti GF ken sangailien ti kaubingan a chapter ti GUMIL a nabangon laeng itay napan a tawen. (NMEV)

(Naipablaak iti Bannawag, Agosto 17, 2015 a bilang.)

‘Kampeon ti Lengguahe,’ silulukaten para iti 2016

Inwaragawag ti Gobierno Probinsial ti La Union nga idauluan ni Gob. Manuel C. Ortega a silulukaten ti proyektona a panagbirok iti ‘Kampeon ti Lengguahe’ para iti 2016.

Paset daytoy ti implementasion ti Iloko Code ti La Union a narugian idi 2012. Damo a nairusat daytoy a proyekto idi napan a tawen ket tallo kadagiti 10 a napadayawan ti mannurat ti Bannawag.

Kuna ni Adamor L. Dagang, provincial information and tourism officer (PITO), a naisangrat daytoy a pammadayaw kadagiti ahensia ti gobierno, CSO/NGO/PO, media, negosio, edukasion, relihion ken indibidual.

Innayon ni Dagang a kangrunaan a pagrukodan dagiti naisangayan a nagapuanan iti pannakaitandudo ti Iloko/Ilokano ken dadduma pay a nakayanakan a pagsasao, saan laeng nga iti La Union ngem uray pay kadagiti sabali a lugar.

Kinuna pay ni Dagang a maysa laeng ti mapadayawan iti tunggal kategoria.

Mabalinen nga ipatulod dagiti nominasion babaen ti koreo, fax, email, wenno personal a wagas iti Language Services Unit, PITO iti Kapitolio Probinsial iti Siudad ti San Fernando – email: languagelaunion@yahoo.com; telefax: (072) 888-2797.

Maudi nga aldaw ti panagipatulod iti nominasion: Disiembre 1, 2015.

Napusgan ti La Union Council for Language and Culture a mangarisit kadagiti nominasion ken mangirekomenda kadagiti mapilinanto iti Sangguniang Panlalawigan Committee on Awards. (Djuna R. Alcantara)

(Naipablaak iti Bannawag, Agosto 17, 2015 a bilang.)

AGOSTO 17, 2015

SARITA
6 Ti Puso a Balitok
    Juan S.P. Hidalgo, Jr.

NOBELA
12 Operation: Drop Venus (26)
     Norberto D. Bumanglag, Jr.
16 Siak ni Precious (23)
     Juan Al. Asuncion

DANIW
9 Kas iti Narsaak a Rangaw Dagiti Maisko
   Daniel L. Nesperos
26 Mainaig iti Baet
     Ariel S. Tabag
47 Dandaniw a Para Ubbing
     Roselyn C. Campano/ Jobert M. Pacnis

SALAYSAY
10 Dagiti Mula a Makaagas: Ashitaba ken Sabungai
      Virginia A. Duldulao, Ph.D.
20 Ayantayon iti Tay-ak ti Panagsukisok?
     Fernando B. Sanchez
24 Kastoy Gayam ti Adams!
     Aileen R. Rambaud
40 Padur-asentayo ti Industria ti Gatas ken Karne ti Nuang
    Reynaldo E. Andres

KOMIKS
27 Gayang ni Lam-ang (98)
30 Aritosan (149)
32 Miks & Tiks

KOLUM
14 Saludsodem ken ni Apo Hues
15 Dear Doc
22 TIPS
23 Okeyka, Apong
35 Kastoy, Kapid, Ditoy Hawaii
36 Ading Kosinera
38 Haytek!
42 Padasem Daytoy, Kailian

PAGLINGLINGAYAN
44 Showbiz
48 Sinniriban
48 Sapukas
48 Sudoku
48 Agkatawa ti Mayat

DADDUMA PAY
 2 Ti Makunami
 4 Tao, Lugar, Pasamak
17 Txtm8
18 Siled ti Kararag
19 Kasano nga Ikukuan ti Pusa?
34 Ammuem Pay Dagitoy
37 Tarabay iti Panangaywan Kadagiti Pagan-anay
39 Ti Gasatmo Ita a Lawas
46 Idi Un-unana a Panawen

Letsugas Manipud iti Adams

LETSUGAS MANIPUD ITI ADAMS. Malaksid kadagiti naidumduma a makan ken nariingan a prutas iti Adams, Ilocos Norte, ammoyo kadi nga adu metten dagiti patanor a ganggannaet a mula a kas iti lettuce, spinach, basil, okoyama ken dadduma pay a salad mix manipud iti Taiwan ken Japan? Presko ken natalged dagitoy a maipauneg gapu ta organiko ti ganagan ken pestisidio nga us-usarenda. Addan sumagmamano a restauran iti Pagudpud ken iti Laoag a regular a kustomerda. Kas kabassitan nga ili a buklen laeng ti maysa a barangay, in-inut a nayam-ammo kadagiti turista ti Adams a kas “Garden of Eden'” iti Ilocos Norte gapu iti makaay-ayo a buya ken naidumduma a pakabuklanna. Agarup 105 a kilometro manipud iti puseg ti Laoag, masarakan ti Adams iti amianan a paset ti Ilocos Norte. Manipud iti nakibeddenganna iti Pancian, Pagudpud, adda umuneg a sementado a kalsada manipud iti kalsada nasional ken kalpasan ti agarup 30 a minuto a biahe, madanonmon daytoy nga ili. (Leilanie G. Adriano)

(Naipablaak iti Bannawag, Agosto 10, 2015 a bilang.)

10 a mannurat nga Ilokano, napili a fellow iti Pasnaan 6

Sangapulo a mannurat nga Ilokano ti napili a writing fellow iti Pasnaan 6, ti workshop a para kadagiti mannurat nga Ilokano nga isaysayangkat ti GUMIL Filipinas, a maangay inton Septiembre 10-12 babaen ti panangsangaili ti North Luzon Philippines State College iti Candon City, Ilocos Sur nga idauluan ni Dr. Severino G. Alviento, OIC President.

Dagiti napili a fellow para iti Daniw a Para Ubbing: Jimmy R. Agustin ti Canayun, Abulug, Cagayan; Gynelle D. Follante ti 432 Bidduang, Pamplona, Cagayan; ken Kisses M. Ganapin ti Patac, Galimuyod, Ilocos Sur.

Dagiti fellow para iti Daniw: Edmundo A. Bisquera ti Block 5 Lot 5 Las Villas, Catablan, Urdaneta City, Pangasinan; Nestor Gonzales ti 16  San Marcos, San Nicolas, Ilocos Norte (Daniw); ken June Agsi Gaygayed ti 49 Gaerlan St., San Isidro Candon City.

Dagiti fellow iti Ababa a Sarita: Joseph C. Ganabo ti Sitio Lipit, Calaoa-an, Candon City, Ilocos Sur; Aldrine C. Molina ti 14, Darapidap, Candon City, Ilocos Sur; Marie Rose Quitoriano Rabang ti No. 22 Purok 3, Barangay Tamorong, Sta. Catalina, Ilocos Sur; ken Donna Joy Wagayen ti San Andres, Candon City, Ilocos Sur.

Agpaay a panelist dagiti batido ken agkabannuag a mannurat ken kritiko nga Ilokano a kas kada Cles B. Rambaud, Juan Al. Asuncion, Roy V. Aragon, Joel B. Manuel, Daniel L. Nesperos, John Buhay, Estela Bisquera-Guerrero, Sherma E. Benosa, Neyo Mario E. Valdez ken Junley L. Lazaga.

Buklen met ti komite ti Pasnaan da Ariel S. Tabag, Dr. Freddie Pa. Masuli, Anna Liza M. Gaspar ken Mercy Vergara-Yabes.

Nairanta ti Pasnaan a pakiinnadalan dagiti mannurat a mangibilang iti bagida nga agdadamo iti panagsurat iti Ilokano kadagiti nabayagen nga agsursurat wenno addan padasna iti panagsurat iti nasao a lengguahe.

Kas kuna ni GF President Arthur P. Urata, Sr., agtultuloy ti pannakaisayangkat ti Pasnaan kas tulong ti GUMIL iti pannakatarabay dagiti agdadamo a mannurat a mangtun-oy iti arapaapda nga agbalin met a naan-anay a mannurat para iti pannakaitandudo met ti literatura ken lengguahe nga Ilokano. (Pasnaan Secretariat)

(Naipablaak iti Bannawag, Agosto 10, 2015 a bilang.)

Kayatmo ti makabotos? Botante, inkayon agpa-biometrics, kuna ti Palasio

Masapul nga iparehistro dagiti botante ti biometrics data-da iti Commission on Elections (Comelec) tapno magun-odda ti karbenganda nga agbotos iti nailian nga eleksion inton 2016.

Daytoy ti dawat ni Presidential Communication Operations Office (PCOO) Secretary Herminio Coloma, Jr. itay nabiit.

Kas kuna ni Coloma, napateg nga akem ti tunggal umili ti panagbotos ta iti eleksion, maikkan dagiti umili iti gundaway a mangyebkas iti kaririknada ken mangpili iti tao a maikari a mangidaulo iti pagilian— iti nailian ken lokal a lebel.

Segun iti Comelec, adda 3,893,095 botante nga awanan pay iti biometrics, segun iti rekord daytoy iti Hunio 30, 2015.

Kuna ti Comelec a no saan a mapa-validate ti botante ti biometrics-na, mapukaw ti rekordna ket saan a makabotos inton umay a tawen.

(Naipablaak iti Bannawag, Agosto 10, 2015 a bilang.)

AGOSTO 10, 2015

SARITA
6 Ni Angkel Boy ken ti Musang Trans
    Aileen R. Rambaud

NOBELA
12 Operation: Drop Venus (25)
     Norberto D. Bumanglag, Jr.
16 Siak ni Precious (22)
     Juan Al. Asuncion

DANIW
9 Atang iti Sarukang: Mutia ti Kadkadua
   Prodie Gar. Padios
21 Ipapanaw
     Noli S. Dumlao
47 Dandaniw a Para Ubbing
     Jenalyn B. Edra/ Jessica J. Ang

SALAYSAY
10 Sibibiagka Pay Laeng, Balsamarendakan?
      Virginia A. Duldulao, Ph.D.
40 Adda Kuarta iti Muskobado nga Asukar
     Reynaldo E. Andres

KOMIKS
27 Gayang ni Lam-ang (97)
30 Aritosan (148)
32 Miks & Tiks

KOLUM
14 Saludsodem ken ni Apo Hues
15 Dear Doc
20 Okeyka, Apong
22 TIPS
23 Haytek!
35 Kastoy, Kapid, Ditoy Hawaii
36 Ading Kosinera
42 Padasem Daytoy, Kailian

PAGLINGLINGAYAN
44 Showbiz
48 Sinniriban
48 Sapukas
48 Sudoku
48 Agkatawa ti Mayat

DADDUMA PAY
 2 Ti Makunami
 4 Tao, Lugar, Pasamak
17 Txtm8
18 Siled ti Kararag
19 Wen, Mabilinmo Met ti Aso Tapno Agulimek
24 Pangrikep nga Aktibidad iti Pannakarambak ti Bannawag @ 80
34 Ammuem Pay Dagitoy
37 Nasken a Naurnos ti Kosina
38 Awan Kas iti Nalawag
39 Ti Gasatmo Ita a Lawas
46 Idi Un-unana a Panawen