Panagkurkurang iti mangmangged, parikut dagiti industria

Agparparikut ita dagiti industria iti pagilian iti panagkurkurang dagiti mangmangged a kas kadagiti accountants, bookkeepers, dagiti agtrabaho kadagiti hotel ken uray pay iti konstruksion.

Maitudtudo a maigapu daytoy a panagkurkurang iti panangbangon ti adu kadagitoy iti bukodda a negosio imbes a simrekda nga empleado ken iti isyu iti skills mismatch wenno saan met a mainugot ti naturpos nga adal iti sapsapulen ti industria.

Impeksa daytoy ni Ambassador Alfredo Yao, president ti Philippine Chamber of Commerce and Industry (PCCI), kadagiti dimmar-ay iti pannakapirma ti memorandum of agreement (MOA) iti nagbaetan ti PCCI ken ti Departamento ti Edukasion (DepEd).

Tapno masungbatan ti parikut iti skills mismatch, manamnama a babaen ti PCCI-DepEd MOA, maala ti DepEd ti tulong dagiti 120 a lokal a sanga ti PCCI nga ayan dagiti eksperto tapno dagitoy nga eksperto a mismo ti mangisuro kadagiti bukodda a paglaingan kadagiti estudiante iti senior high school.

Kinuna ni Yao a babaen met itoy, manamnama a dagiti agturpos iti K to 12, nakasaganadan a sumrek nga agtrabaho, mangbangon iti bukodda a pagsapulan, ken sumrek iti nangatngato nga adal.

Iti sabali a bangir, kinuna ni Education Secretary Armin Luistro a mangnamnama a maipakat a mamimpinsan ti K to 12 education inton 2016 kalpasan ti lima a tawen a pannakaplano daytoy iti laksid dagiti nayuli a lima petision iti Korte Suprema para iti saan a pannakaituloy ti pannakaipakat daytoy.

(Naipablaak iti Bannawag, Mayo 4, 2015 a bilang.)