SIGURADUEN A MAKABOTOS ITI SUMARUNO A PANAGPIPILI. Kas ken ni Tata Meleton Umadac, 63, ti Barangay 20 iti Siudad ti Laoag, inkarkarigatanna ti napan iti Laoag City Hall idi Hulio 20, 2014 tapno gundawayanna ti naituyang nga special registration dagiti adda rangkapna iti bagi (persons with disabilities) tapno mapabaro ti dati a rekordna iti Comelec (Commission on Election). Malaksid iti agtultuloy a panangallukoy kadagiti amin a kualipikado a botante tapno mapan agparehistro wenno mangpabaro iti rekordda iti Comelec, naangay iti nasao a petsa ti National Registration Day para kadagiti addaan rangkap tapno masigurado a maikkanda met iti gundaway a mangannong iti kalinteganda nga agbotos. Iti ladawan, kadua ni Tata Meleton a na-stroke itay laeng kallabes ket naparalisa ti kagudua ti bagina, ni baketna a Josephine ken dagiti staff ti Comelec Laoag City a da acting Comelec officer Flordelina Gagarin ken Crisanta Alejandro a tumultulong a mangunnat iti imana para iti pannakaala ti biometrics-na. Babaen ti naaprobaran a linteg a Republic Act 10363 wenno Biometric Voter Registration Act of 2013, amin a botante nga awanan iti biometrics wenno ladawan, electronic a pirma wenno thumbmark iti Comelec, saanton a mapalubosan nga agbotos kadagiti sumaruno a panagpipili. Ngarud, maibalakad kadagiti amin a maseknan a bumisita iti opisina ti Comelec iti kabiitan a panawen tapno malapdan iti panagkarkarintar inton Oktubre 31, 2015, a maudi a gundaway iti panagrehistro ken panangpabaro iti listaan dagiti botante iti Comelec. (Leilanie G. Adriano)
(Naipablaak iti Bannawag, Agosto 4, 2014 a bilang.)
No comments:
Post a Comment