F.T. Ponce, 2013 UMPIL Awardee

Impaay ti Unyon ng mga Manunulat sa Pilipinas (UMPIL) itay nabiit ti kangatuan a pammadayaw a maipaay ti gunglo iti maysa a mannurat, ti Gawad Pambansang Alagad ni Balagtas, ken ni Francisco T. Ponce, mannurat iti Bannawag, iti kategoria ti Ilokano fiction.

Naipaay ken ni Ponce ken iti 6 a sabsabali pay a mannurat ti nasao a pammadayaw bayat ti pannakaigibus ti Maika-39 nga UMPIL Congress. Naangay ti seremonia ti pammadayaw idi Agosto 31, 2013 iti Leong Hall Auditorium ti Ateneo de Manila University iti Siudad ti Quezon.

Naipaay ken ni F.T. Ponce ti pammadayaw “gapu kadagiti nobela, sarita ken daniwna a pakariknaan iti napintas a pannakaabel ti imahinasion ken realidad; a gapu met itoy, nasin-aw ken makaay-ayo a basaen a pakapadasan dagiti agbasbasa kadagiti padas ken pannakipagrambakda metten kadagiti dardarepdep dagiti Ilokano nga agindegen iti maysa a ganggannaet a pagilian.”

Naipasngay iti Napo, Magsingal, Ilocos Sur ni F.T. Ponce; nagpa-Hawaii idi 1970s ket agindeg itan ken ti pamiliana iti Ewa Beach. Pinadayawan ti Kalayaan-Philippines International Hawaii a Most Outstanding Writer idi 2004 ken ti GUMIL Filipinas a kas Pedro Bucaneg Awardee idi 2008.

Impablaakna ti librona a Bin-i ti Biag (koleksion dagiti ababa a nobela, sarita ken daniwna) idi 2004 ken ti Sabong ti Biag (nobela) idi 2006.

Kadua ni F.T. Ponce a napadayawan da: Eduardo Jose E. Calasanz (Tula sa Filipino), Alice Tan Gonzales (Piksion iti Hiligaynon), Grace Hsieh-Hsing Lee (Daniw iti Intsik), Mario I. Miclat (Piksion iti Ingles ken Filipino), Floy Quintos (Drama iti Filipino) ken Rolando B. Tolentino (Piksion ken Salaysay iti Filipino).

Mairaman kadagiti naipaayanen iti UMPIL Award iti Ilokano da Dr. Godofredo S. Reyes, , Atty. Benjamin M. Pascual, Leandro B. Ablang, Jeremias A. Calixto, Marcelino A. Foronda Jr., Pacita C. Saludes, Arturo G. Buenavista, Juan S.P. Hidalgo Jr., Jose A. Bragado, Gregorio T. Amano, Dionisio S. Bulong, Juan Ben Quimba, Reynaldo A. Duque, Manuel S. Diaz, Onofrecia I. Ibarra, Crispina B. Bragado, Greg Laconsay, Arturo M. Padua, Prescillano N. Bermudez, Ruperta VR. Asuncion, Paul B. Zafaralla, Ricarte A. Agnes, Crisostomo M. Ilustre ken Fernando B. Sanchez.


(Naipablaak iti Bannawag, Septiembre 30, 2013 a bilang.)