Ad-adun dagiti babbai a mangal-ala iti bokasional

Ad-adun dagiti babbai ngem dagiti lallaki a mangal-ala iti technical vocational (tech-voc) education, kas makita iti listaan dagiti nagenrol iti 2012.

Kas makita iti kaudian a rekord ti Technical Education and Skills Development Authority (TESDA), dakkelen ti namalbaliwan ti panagkita dagiti Filipino iti technical vocational education and traning (TVET) ta saan laeng nga ad-adun dagiti babbai a mangal-ala iti tech-voc no di pay ket dumakdakkel ti enrolment iti tech-voc education.

Kas kuna ni TESDA Secretary Joel Villanueva, umad-adu dagiti nagturpos iti kolehio ken dagiti adda iti kolehio ti sumsumrek iti tech-voc education ta mamatida a dakdakkel ti gundawayda a makaala iti trabaho no agturposda iti tech-voc.

Innayon ni Villanueva nga nabayag a tiempo, ad-adda a dagiti lallaki ti mangal-ala iti tech-voc ta maibilang daytoy a lubong dagiti lallaki ken literal a narugit. Ngem kuna ni Villanueva a sabali itan.

Innayonna a pudno a dakdakkel ti gundaway a makaala ti nagturpos iti tech-voc education iti pagsapulan.


(Naipablaak iti Bannawag, Pebrero 18, 2013 a bilang.)