“It’s More Fun in the Philippines”
Ania man ti makuna ti dadduma, pudno la unay nga “It’s More Fun in the Philippines” nangruna la ket ngaruden no maysaka a Filipino. Saan a mailibak nga uray no manon a tawen ni Filipino nga agnanaed iti sabali a pagilian, adu kadakuada ti agsubli iti nakayanakanda a daga. Di ketdin masansan a mangmangngegtayo kadagitoy a kadaraan nga apaman a makapagretiro wenno makapagurnongda iti pagnanaedan wenno pagtrabtrabahuanda ita a pagilian, umaydanto met laeng agnaed iti sidong dagiti kakabagianda iti Filipinas? Ta apay? “It’s more fun in the Philippines!”
Ket no pagaayat a mismo ti adu a kadaraantayo nga addan iti abroad ti agsubli ken agnaed iti Filipinas, adu met kadagiti ganggannaet nga agnanaed ita iti Filipinas ti makagusto la unay iti pagiliantayo. Pammaneknek ditoy ti pannakapili ti Filipinas nga “8th Friendliest Country in the World” ken No. 1 iti Asia iti Expat Explorer Survey nga inwayat ti Hong Kong and Shanghai Banking Corporation ken rimmuar ti resultana idi Dis. 11, 2011. Itoy a surbey, napili ti “Top 15 Friendliest Countries.” Naammuan ti kapanunotan ditoy ti 3,385 nga expatriate iti 100 a pagilian manipud idi Mayo agingga iti Hulio, 2011. Nasaludsod kadakuada no kasano ti panagbiagda iti pagilian a pagnanaedanda ita, no dida met la marigatan iti gastuenda, no mannakigayyem met laeng dagiti tattao (lokal), no nalaka a maisingedda ti bagida iti komunidad, no nasayaat met la ti panagdakkel dagiti annakda, kdp.
Ita, maawatakon no apay a nagsubli da tatang ken nanangko ditoy Filipinas tapno ag-“for good”-dan kalpasan ti mano a tawenda a nagnaed idiay Hawaii. Wen, “It’s more fun in the Philippines!”
--LUDY ELY F. BRAVO
Pinili, Ilocos Norte
No comments:
Post a Comment