Palagip Kadagiti Agdadamo a Mannurat: Salip iti Sarita ti 23rd AMMAFLA

Ipalagip ti Secretariat ti AMMA Foundation Literary Awards (AMMAFLA) nga aggibus ti panagawat kadagiti entry a para iti Salip iti Sarita ti Maika-23 nga AMMAFLA iti Mayo 31, 2021.

Nairanta ti pasalip ti AMMAFLA kadagiti agdadamo a mannurat iti Ilokano a “kas pangaron iti reggetda a mangpatadem pay iti plumada.”

Kas kadagiti sarita a nangabaken iti pasalip ti AMMAFLA, mairamanto met a mailibro dagiti sarita a mangabak iti daytoy nga edision ti AMMAFLA, kas kinuna dagiti mangimaton iti AMMAFLA a da Amado ken Gloria Yoro, Francisco ken Aurora Ponce, ken Mel ken Sylvia Gonzales (agpapada nga agindegen iti Hawaii).

Inruar ti AMMAFLA ti librona a Dagiti Premiado a Sarita (1997-2014) iti kombension ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw, idi 2015. Naipalaon iti nasao nga antolohia dagiti nangabak a sarita iti AMMAFLA sipud narugian ti salip idi 1997 agingga iti 2014.

Dagiti pagannurotan ti maika-23 nga edision ti salip.

1. Aggibus ti salip iti Mayo 31, 2021. 

2. Agpaay laeng ti salip kadagiti agdadamo a mannurat iti Ilokano. Iti daytoy a salip, maibilang nga agdadamo ti mannurat no awan pay ti naipablaak a saritana iti Bannawag. No adda man, di koma nasursurok ngem tallo ti naipablaakna agingga iti Disiembre 16-31, 2020 a bilang ti nasao a magasin.

3. Siwawayawaya ti autor a mangpili iti topiko ti isalipna a sarita.

4. Agatiddog ti isalip a sarita iti 10-15 a panid iti Letter size (8.5” x 11”), Times New Roman, Font Size 12, Medium, iti doble espasio (2.0), addaan iti Normal a margin, ken iti MS Word format.

5. Maysa laeng a sarita ti mabalin nga isalip ti tunggal autor. 

6. Nasken nga orihinal, di pay naipablaak wenno naadaw iti ania man a sinurat ti isalip. Nasken met a saan a naipatarus ti pakisalip manipud iti sabali a lengguahe ken nasken a bukod a putar ti autor ti pakisalipna. Saan met a maawat ti sarita a naisalip idin iti AMMAFLA wenno iti sabsabali pay a salip iti panagsurat iti sarita ken ti sarita a naidatag pay a kas entry iti sabali pay a salip iti panawen a pannakaangay daytoy a salip ti AMMAFLA nga agpaut manipud iti pannakalukat daytoy a salip agingga iti pannakapadayaw dagiti mannurat a nangabak iti daytoy a salip.

7. Paulo ti sarita laeng ti ilanad; saan nga agusar iti pudno wenno parbo a nagan a pakaam-ammuan a kas autor. Ipatulod ti pakisalip babaen ti email. Mangipatulod met iti pakasaritaan ti autor iti sabali a file. Ilanad iti nasao a file dagitoy: paulo ti pakisalip, nagan, kaudian a ladawan, ababa a pakasaritaan ti biag, adres ti agdama a pagnaedan, ken numero ti selpon.

8. Ipatulod ti pakisalip agraman ti pakasaritaan ti autor iti daytoy nga email address: ammafla2019@gmail.com.  Iti Subject ti email, ilanad daytoy: ENTRY ITI AMMAFLA 2021. Saan a mairaman iti salip ti entry a maawat kalpasan ti Mayo 31, 2021.

9. Dagiti gunggona: Umuna a Gunggona, P10,000.00; Maikadua, P8,500.00; ken Maikatlo, P7,000.00. Maipaayan pay dagiti mangabak iti sertipiko ti pammadayaw. Adda met karbengan dagiti hurado a mangkissay iti bilang dagiti mangabak no awan ti makapatar iti bukodda a pagbatayan dagiti mangabak. Mabalin met a mangparnuayda iti sabali wenno nayon a gunggona, no kasapulan.

10. Mapakaammuanto dagiti mangabak no kaano ken sadino ti pakapadayawanda. No met matakuatan a sinalungasing ti mangabak ti ania man kadagiti Pagannurotan Blng. 2 ken Blng. 6, maibabawi ti premiona ken mapawilanton a makisalip iti ania man a pasalip ti AMMAFLA.

(Kadagiti kayatna ti ag-subscribe iti e-Edition, mapan iti ania man kadagitoy a link:

Press Reader: https://bit.ly/2GjO1fK
Magzter: https://bit.ly/2HuG4EO

Para iti naimaldit a kopia, kauman ni Boy Balanag iti CP Number 0916 269 2390

Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Agatep, Jr., Umuna iti Salip iti Sarita ti 5th Albalos Awards

Inyalat ni Rodolfo D. Agatep, Jr. ti Elefante, Banayoyo, Ilocos Sur ti Umuna a Gunggona iti Salip iti Sarita ti 5th Mario Abinsay Albalos Foundation Literary Awards babaen ti saritana a “Marunggay,” kas impakaammo ti Secretariat ti Albalos Awards.

Dati a mannursuro iti North Luzon Philippines State College, Siudad ti Candon, agpapaay ita ni R.D. Agatep, Jr. a Chief Operating Officer ti eXon infotech solutions, inc. nga adda ti opisinana iti Banayoyo. Addaanda iti tallo nga annak ken ni dati a Marjoury Aquino ti Narvacan, I.S.

Dagiti kakadua ni R.D. Agatep, Jr. a nangabak:

Maikadua a Gunggona: Remedios S. Tabelisma-Aguillon, nagretiro a prinsipal ti San Miguel National High School, Norala, South Cotabato ken agdama nga agnaed iti Cagayan de Oro City, babaen ti saritana nga “Agsupadi a Lubong.” Daytoy ti maikatlo a gundaway a panangabak ni RST Aguillon, anak ti Umingan, Pangasinan ken Bambang, Nueva Vizcaya, iti Albalos Awards. Sakbayna, inyalatna ti Umuna a Gunggona iti 2nd Albalos Awards (“No Nairanta nga Agpaay Kaniak”)  ken Umuna a Gunggona met laeng  iti 4th Albalos Awards, “Naim-imbag Laengen Ngem ‘Diay Awan.” 

Maikatlo a Gunggona:  Arnold P. Jose ti Siudad ti Laoag ngem agnaeden iti Wahiawa, Hawaii, Isla ti Oahu, babaen ti saritana a “Mister Bin.” Sakbayna, inyalatna ti Maikatlo a Gunggona iti 1st Albalos Awards (“Hawaii Ditoyen, Mikiong!” ken Maikadua a Gunggona iti 3rd Albalos Awards (“Ni Lakay Gapit a Bayog”). Nabayag a nagpapaay iti Advertising Dept. ti dati a Liwayway Publishing, Inc.  Umuna a librona ti Sangarakem a Dawa (2019). 

Nagpaay a hurado da Ariel S. Tabag, Poetry & Entertainment Editor ti Bannawag, pangulo; Juan Al. Asuncion, Literary Editor ti Bannawag, kameng; ken Neyo Mario E. Valdez, coordinator for Northern Luzon iti Executive Committee for Culture and the Arts, kameng.

Mapadayawanto dagiti nangabak iti umay a Dap-ayan (kombension nasional) ti GUMIL Filipinas, ti gunglo dagiti mannurat nga Ilokano iti Filipinas ken iti ballasiw-taaw.

Narugian ti Salip iti Sarita ti 5th MAA Foundation Lit. Awards idi Oktubre 30, 2020 (anibersario ti pannakayanak ni Mario A. Albalos) ken nagpatingga iti Marso 3, 2021 (anibersario ti ipupusayna). 
Nabangon ti M.A. Albalos Foundation Literary Awards (Albalos Awards) a kas pangtaginayon iti lagip daydi Dios-ti-aluadna a mannurat ti Bannawag Mario A. Albalos, tubo ti Cabaroan Daya, Siudad ti Vigan, napadayawan a Pedro Bukaneg awardee ken umuna a Thomas Jefferson awardee ti Estado ti Hawaii a nagnaedanna agingga iti ipupusayna idi Marso 3, 1991 iti edadna a 40.

Ni met Jenny R. Alcausin (tubo ti Cabaroan Laud, Siudad ti Vigan ken agnaed iti California) ti sponsor ti pasalip ti foundation ken agpaay met a mangimaton ti nasao a pasalip da Jun Abinsay ken Priscilla Dela Cruz (agpada nga agnaed iti Hawaii), iti pannakitinnulong dagiti kameng ti Bannawag.

Dagiti gunggona: Umuna, P15,000.00; Maikadua, P12,000.00; ken Maikatlo, P10,000.00. Maipaayan pay dagiti nangabak iti sertipiko ti pammadayaw malaksid iti medalion a maited iti nangyalat iti Umuna a Gunggona.

Ti kompleto a listaan dagiti nangabak iti Salip iti Sarita ti Albalos Awards: 1ST Albalos Awards: 1. Ronelyn B. Ramones (“Fina”); 2. Rhea Berroy (“Ti Aktibista”); 3. Arnold P. Jose (“Hawaii Ditoyen, Mikiong!”); 2nd: 1. Remedios S. Tabelisma-Aguillon (“No Nairanta nga Agpaay Kaniak”); 2. Roselyn C. Campano (“Sanguek Manen ti Sumaruno a Pannakidangadang”); 3. Florencio B. Bayuga (“Uray Nababa ti Adalmo, Fren”); 3rd:  1. Isaac R. Pedrera (“Ti Naembargo a Daga iti Cagat”); 2. Arnold P. Jose (“Ni Lakay Gapit a Bayog”); 3. Virgilio S. Naungayan (“The Walking Dead”); 4th: 1. Remedios S. Tabelisma-Aguillon (“Naim-imbag Laengen Ngem ‘Diay Awan”); 2. Manuel D. Benosa, Sr. (“Ti Naikamang”); 3. Quezon E. Javier (“Paniang”); 5th: 1. Rodolfo D. Agatep, Jr. (“Marunggay”); 2. Remedios S. Tabelisma-Aguillon (“Agsupadi a Lubong”); ken Arnold P. Jose (“Mister Bin”). (CLES B. RAMBAUD)

MAYO 1-15, 2021

SARITA 

2 Ni Fleur ken Dagiti Un-Unnoy ni Anton ni Clifton Pascua 
8 Makilasinta Man Laengen, Baket ni Melchor B. Gasmen
 
NOBELA 
10 Sangaaruy-oy a Batek (17) ni Teresita B. Tingonong-Ambalneg 
20 Ti Puga (29) ni Norberto D. Bumanglag, Jr. 
24 Young Dreamers Club (9) ni Estela A. Bisquera-Guerrero 
42 Gil-ayab (14) ni Arsenio T. Ramel, Jr.

DANIW 
12 Pangta: Lima a Daniw ni Rene Boy Abiva 
29 Panaguray ni Jobert M. Pacnis 
41 Alimbasag ken Alimuteng ni Rodel R. Estacio 
63 Dagiti Mulak nga Orkidia ni Remedios J. Llanes

SALAYSAY 
14 Ti Integridad a Kas Kuna ni Manong Johnny ni Abraham R. Estavillo 
32 Pimmudno a Tagtagainep ni Dionisio S. Bulong 
54 Agaramidka Met iti Bokashi  ni Reynaldo E. Andres

KOMIKS 
34 Miks & Tiks 
36 No Duaduaem Pay (10) ni Ariel S. Tabag

KOLUM 
4 Saludsodem ken ni Apo Hues 
6 No Adda Sigsigloten, Adda Met Warwaren 
18 Biag ni Ilokano 
19 Kastoy, Kapid, Ditoy Hawaii 
23 Okeyka, Apong 
27 Dear Doc 
53 Dear Ikit 
56 Ading Kosinera 
57 Tips

PAGLINGLINGAYAN 
60 Showbiz
63 Agkatawa ti Mayat 
64 Sinniriban 
64 Sapukas-2 
64 Sudoku

DADDUMA PAY 
16 Wen, Manang, Mangrugi iti Pagtaengan 
17 Siled ti Kararag 
22 Netizone 
30 Tao, Lugar, Pasamak 
48 Idi Un-unana a Panawen 
50 Ti Tarakenmo ken Sika 51 Panangimaton iti Pagtaengan 
58 Ammuem Pay Dagitoy 
59 Ti Gasatmo 
62 Manipud iti Social Media 

(Kadagiti kayatna ti ag-subscribe iti e-Edition, mapan iti ania man kadagitoy a link:

Press Reader: https://bit.ly/2GjO1fK
Magzter: https://bit.ly/2HuG4EO

Para iti naimaldit a kopia, kauman ni Boy Balanag iti CP Number 0916 269 2390

Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Kalpasan ti Panagdaklis iti Maysa a Bigat iti Caroan, Gonzaga, Cagayan

KALPASAN TI PANAGDAKLIS ITI MAYSA A BIGAT ITI CAROAN, GONZAGA, CAGAYAN. Kalpasan ti no mano oras a panagguyguyod dagiti mannaklis iti tali ti dakkel ken atiddog nga iket a naiwayat iti baybay, a binayabay dagiti lampitaw, naisangladda met laeng ti nadaklisanda ket iti pannakaitangkarangna iti kadaratan, naluktan ti agpispissuolan nga iket ket napili ken nadasigdasig dagiti ikan maibatay iti kadakkel ken klaseda. Kaaduanna a dagiti dadakkel a maala a kas iti angrat ken pargo ken dadduma pay, alaen dagiti dagiti komprador ti ikan tapno mailako iti ili wenno maisursor. Dagiti met babbabassit a kas iti bilis ken kaaduanna ket bulong-unas wenno espada, malaksid iti kompraen dagiti komersiante, mabingbingay a para kadagiti nakipagguyod. Sabali laeng met ti bingay ti agpadaklis wenno akinkuakua iti iket, lampitaw, ken dadduma pay. Naragsak ti panagdaklis, no naanuska a gumuyod a maisangol a sumekkad iti kadaratan iti agingga tallo wenno uppat nga oras, addanto met mabingaymo a sidam wenno kilawem nga ibulon iti hiniebra wenno layaw. (ROY V. ARAGON)

(Naipablaak iti Abril 16-30, 2021 a bilang.

Kadagiti kayatna ti ag-subscribe iti e-Edition, mapan iti ania man kadagitoy a link:

Press Reader: https://bit.ly/2GjO1fK
Magzter: https://bit.ly/2HuG4EO

Para iti naimaldit a kopia, kauman ni Boy Balanag iti CP Number 0916 269 2390

Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Saan a panagusar iti papel de banko, sensilio, OK iti turay

Pabor ti turay ti Filipinas iti singasing a saanen a panagusar iti kuarta a papel de banko ken sensilio wenno cash, kas sungbat ti pannakalapped ti panagwaras dagiti sakit a kas iti COVID-19, ken iti di maliklikan a panagbaliw ti taray ti panawen. 

Maibatay iti maysa a surbey, naammuan a 21 a pagilian ti pabor a didan agaramat iti cash, a pakairamanan ti Filipinas, a makainem iti ranggo. 

Kadagitoy a pagilian, umuna ti India iti 79% a suporta, sarunuan ti Malaysia (65%), United Arab Emirates (63%), Indonesia (63%), Vietnam (60%), Singapore (56%), Italia (52%), Filipinas (52%), Thailand (51%), ken Taiwan (48%). 

Kuna ni Presidential spokesperson Harry Roque a daytoy a ranggo, pammaneknek a nakasaganatayon a saan nga agusar iti cash gapu ta pagaammo a ti panagiggemti kuarta, maysa kadagiti kangruna a rason ti napartak a panagwaras ti coronavirus. 

Nupay awan ti tiempo a naikeddeng no kaano a saanen nga agusar iti cash, nakasaganan ti Filipinas a saan nga agusar iti sensilio ta itay nabiit, kuna ni Benjamin Diokno, gobernador ti Bangko Sentral ng Pilipinas (BSP), a masapul a matungpal daytoy iti 2025. 

Nangadaptaren ti BSP iti National Quick Response (QR) Code Standard a para kadagiti digital a transaksion, ket manamnama a sumurot metten dagiti sabsabali a banko ken kompania pinansial. Ti nasao nga standard, manamnama a paaduenna dagiti panagbayad a saanen a nasken nga agkikita dagiti tattao.

(Naipablaak iti Abril 16-30, 2021 a bilang.

Kadagiti kayatna ti ag-subscribe iti e-Edition, mapan iti ania man kadagitoy a link:

Press Reader: https://bit.ly/2GjO1fK
Magzter: https://bit.ly/2HuG4EO

Para iti naimaldit a kopia, kauman ni Boy Balanag iti CP Number 0916 269 2390

Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Nasamay Kadi ti Ivermectin Kontra iti COVID-19?

Awan kas iti baro nga impormasion a mabalinmo nga ibasura wenno awaten a kas baro nga ammo. Kas koma kadagiti natakuatan a maaramidan ti Ivermectin iti COVID-19. Sakbayna, naammuan a dagiti 19 a pagilian iti Africa nga adda iti babaen ti African Programme for Onchocerciasis Control (APOC) ti kabassitan iti nakapet iti SARS-COV2 iti sibubukel a lubong (https://ncov2019.live/data/africa). Dagitoy nadakamat a pagilian ti impaayan ti World Health Organization (WHO) iti Ivermectin a kas agas ken panglapped iti sakit a managan iti River Blindness a gapuanan ti ariet nga Onchocerca volvulus (https://www.who.int/blindness/partnerships/APOC/en/).  Gapu iti napaneknekan a kinasamay ti Ivermectin, naitultuloy ti pannakaited daytoy kadagiti nadakamat a pagilian. Maibatay kadagiti panagipadas tapno maammuan ti kinasamay, kinatalged ken no kasano ti kaadu ti dosis a maited iti pasiente, napaneknekan ti kinaepektibo ti Ivermectin kadagiti kinapet ti nasao a sakit (https://ivmmeta.com/). Ar-aramaten met ti East Virginia Medical School ti Ivermectin kadagiti amin nga addang iti pannakaagas ken pannakalapped ti COVID-19 (https://www.evms.edu/.../EVMS_Critical_Care_COVID-19...). 

Naammuan kadagiti panagadal nga adda 6 a maaramidan ti Ivermectin iti pannakalapped ken pannakaagas ti COVID-19: 

1. Lapdan ti Ivermectin ti panangserrek ti bayrus iti selula ti bagi a panggepna a rauten uray payen nakastreken daytoy iti ngiwat, agong, wenno dagiti mata. Kumpet ti agas iti rutong – corona— ti protina (spike protein), a manglapped iti daytoy a kumpet met iti ACE-2 receptors iti rabaw dagiti selula ket ngarud agtalinaed a nakalukat dagiti receptor (https://pubmed.ncbi.nlm.nih.gov/32871846/). Kas  iti maysa a tulbek a namalamalan iti timmangkenen nga epoxy, saanen a maiserrek iti seradura wenno iti tutulbekan. Mairaman a parmeken ti Ivermectin  dagiti tumtumpuar nga strain a nagbaliw dagiti rutong ti protinada a mabalin a mangpukaw iti bileg dagiti agdama a bakuna. Maigidiat kadagiti bakuna, palugodan ti Ivermectin ti bagi nga agparnuay kadagiti pannakasoldadona (antibodies) a manggubat iti ania man a tumpuar a baro nga spike protein  (https://www.who.int/.../featu.../detail/how-do-vaccines-work).  

2. Uray payen nakastrek ti bayrus iti selula, lapdan ti Ivermectin ti yuuneg pay ti bayrus ket serkenna ti nukleus (pannakalaem ti selula) tapno kontrolenna daytoy ken pasardengenna ti pananggubat ti bagi kadagiti bayrus. Daytoy ti gapuna nga iti rugrugina, awan ti marikna dagiti pasiente a karkarna iti bagida. Tumipon ti Ivermectin iti Importin α/β1 heterodimer protein nga aramaten ti bayrus a kas luganna a sumrek iti control center ti selula—ti nukleus daytoy (https://pubmed.ncbi.nlm.nih.gov/22417684/). 

3. Lapdan ti Ivermectin ti panagpaadu ti bayrus. Daytoy met laeng ti gapuna nga anti-cancer daytoy (https://www.ncbi.nlm.nih.gov/pmc/articles/PMC5835698/).  

4. Lapdan ti Ivermectin ti pannakapaadda ti makunkuna a Cytokine Storm a kas resulta ti COVID-19 a makaigapu iti panagdanum ti bara (ARDS) ken mangatakar kadagiti selula a pannakasoldado ti bagi nga adda kadagiti napateg a lalaem a mangibunga iti pannakadangran no di man pannakapasardeng ti panagtrabaho dagitoy, agingga nga ibungana ti ipapatay. Ngem ania kadi ti cytokine storm? Isu daytoy ti pannakairuar dagiti adu molekula a managan iti cytokines a mangpakapsut iti naturalesa ti bagi, a mangibunga iti kunatayo a multisystem organ failure (saanen a panagtrabaho dagiti lalaem ti bagi) ken ipapatay. Iti SARS-COV-2, ti Cytokine Storm ti mangigapu iti panagubo dagiti pluido a mapan kadagiti bara a makaigapu iti di pannakastrek ti oksiheno kadagiti bara. Maibilang ti Ivermectin a kas immuno-modulator a manglapped iti pannakapasamak daytoy makunkuna a cytokine storm (https://pubmed.ncbi.nlm.nih.gov/19109745/).  

5. Maysa kadagiti nakabutbuteng nga aramid ti SARS-COV-2 infection ket ti panamagbalinna iti dara a napalet unay ken ti panangserrana kadagiti urat a pagtarayan ti dara ket gapu iti daytoy, saan met a maidanon ti oksiheno a kasapulan dagiti selula. Usaren ti SARS-COV-2 infection ti protein receptor CD147 nga adda kadagiti selula ti nalabaga a paset ti dara (red blood cells) tapno agbalin a napalet ti dara ken mangibunga iti pannakaserra dagiti urat a pagtarayan ti dara (blood vessels). Ikabassit ti Ivermectin ti posibilidad a pannakapasamak ti pannakaserra dagiti urat a pagtarayan ti dara ken panagtutukel ti dara a gapuanan ti CD147 (https://papers.ssrn.com/sol3/papers.cfm?abstract_id=3636557) 

6. Paaduen ti Ivermectin ti pannakapartuat ti Interferon ken pasayaatenna ti epekto dagitoy. Dagiti Interferons ket kasla bala nga ipugso ti immune system (wenno bukod a kabaelan ti bagi a mangparmek kadagiti sakit) ket dagitoy ti mangpatay kadagiti bayrus a kas iti SARS-COV-2 apaman a makastrekda iti bagi. Ngem no adu unay dagiti bayrus kontra kadagiti selula a pannakasoldado ti bagi, dagiti nakalasat a dimmarup a bayrus, kumpetda kadagiti panggepda a serken a selula ti bagi ket usarenda dagitoy iti panagpaaduda ken tapno mastrekda pay dagiti dadduma a selula ti bagi. Napaliiw nga immadu ti bilang dagiti Interferon ken simmayaat ti panagtrabaho dagitoy kadagiti pasiente nga agsagsagaba iti Onchocerciasis wenno River Blindness a naikkan iti agas nga Ivermectin (https://pubmed.ncbi.nlm.nih.gov/7930742/).

(Impatarus ni Cles B. Rambaud manipud iti teksto daytoy iti Ingles nga imbinglay ni Dr. Virginia A. Duldulao, mannurat ti Bannawag.)

ABRIL 16-30, 2021

SARITA 
2 Dear Diary ni Jefferson A. Apolonio 
8 Mangliwengliweng ni Gregorio C. Laconsay

NOBELA 
10 Ti Puga (28) ni Norberto D. Bumanglag, Jr. 
20 Sangaaruy-oy a Batek (16) ni Teresita B. Tingonong-Ambalneg 
24 Young Dreamers Club (8) ni Estela A. Bisquera-Guerrero 
42 Gil-ayab (13) ni Arsenio T. Ramel, Jr.

DANIW 
41 Dungon ni Marlon A. Rodrigo 
47 Kalgaw ni Sherwin T. De Peralta 
63 Daniw a Para Ubbing ni Adoracion B. Madarang

SALAYSAY 
14 Adda iti Cagayan ti Kaduogan a Tao iti Filipinas ni Jim P. Domingo 
32 Kastoykami Ditoy Laos ni Vicente Palcong 
54 Kasapulantayo ti Adu nga Anangka ni Reynaldo E. Andres

KOMIKS 
34 Miks & Tiks 
36 No Duaduaem Pay (9) ni A.S. Tabag

KOLUM 
4 Saludsodem ken ni Apo Hues 
6 No Adda Sigsigloten, Adda Met Warwaren 
18 Biag ni Ilokano 
19 Kastoy, Kapid, Ditoy Hawaii 
23 Okeyka, Apong 
27 Dear Doc 
53 Dear Ikit 
56 Ading Kosinera 
57 Tips

PAGLINGLINGAYAN 
60 Showbiz
63 Agkatawa ti Mayat 
64 Sinniriban 
64 Sapukas-2 
64 Sudoku

DADDUMA PAY 
12 Ti Makunami 
16 Nakabambannogka iti Panagriknam? 
17 Siled ti Kararag 
22 Netizone 
30 Tao, Lugar, Pasamak 
48 Idi Un-unana a Panawen 
50 Ti Tarakenmo ken Sika 
51 Panangimaton iti Pagtaengan 
58 Ammuem Pay Dagitoy 
59 Ti Gasatmo 
62 Manipud iti Social Media 

(Kadagiti kayatna ti ag-subscribe iti e-Edition, mapan iti ania man kadagitoy a link:

Press Reader: https://bit.ly/2GjO1fK

Magzter: https://bit.ly/2HuG4EO

Para iti naimaldit a kopia, kauman ni Boy Balanag iti CP Number 0916 269 2390

Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)