Ilokano Migrants Monument iti Laoag

ILOKANO MIGRANTS MONUMENT ITI LAOAG. Kas pammigbig iti dakkel a tulong dagiti kadaraan nga adda iti ballasiw-taaw iti pannakaitag-ay ti ekonomia iti bukodda a lugar ken iti entero a Filipinas babaen dagiti ipatpatulodda a doliar, naangay itay nabiit ti inaugorasion ti kaunaan nga Ilokano Migrants Monument iti baro a sirkulo a masarakan iti Airport Road iti Siudad ti Laoag. Naipatakder daytoy babaen ti panagtitinnulonhg dagiti nadumaduma nga ahensia ti gobierno iti panangidaulo ni Gob. Imee Marcos ti Ilocos Note. Agtayag ti kadakkelan nga eskultura iti walo a kadapan ken naaramid iti resin ken fiber glass. Maysa nga artist manipud iti Dingras, Ilocos Norte a ni Renato Ong iti nangaramid kadagiti eskultura. Segun iti rekord, ti Ilocos Norte pay laeng ti kaaduan kadagiti permanent ken temporary migrant workers iti pagilian ta agarup 61 porsiento a pamilia ditoy ti agaw-awat iti makunkuna a “foreign aid.” Sango, agpakanawan: Bise-Gobernador Angelo Barba, Laoag City Mayor Chevylle Fariñas, Susan Ople (OFW rights advocate), Gob. Imee Marcos, Rev. Fr. Ambrose Monroy. Likud, agpakanawan: Board Member Vicentito Lazo, Board Member Charles Tadena, Board Member Portia Salenda, Board Member Conrado Respicio (nailinged) ken POEA Administrator Hans Leo Cacdac. (Leilanie G. Adriano)


(Naipablaak iti Bannawag, Enero 4, 2016 a bilang.)

P500-M, maisangrat iti pannakaisubli dagiti korales

Iwayat ti Department of Environment and Natural Resources (DENR) iti daytoy a tawen ti nailian a programa iti coral restoration wenno pannakaisubli dagiti korales tapno ad-adda pay a mapapigsa ti sektor ti panagpatan-ay iti ikan.

Kinuna ni Sen. Loren Legarda a nailatangan daytoy a programa iti P500 a milion a pisos.

Inlawlawag ni Legarda a kas pagilian nga archipelago wenno buklen dagiti isla nga addaan iti 240-milion nga ektaria a paset a para kadagiti nabiag iti danum, masapul a prioridad ti gobierno ti pannakasalaknib dagiti marine ecosystems.

Impaganetget ni Legarda a dagiti korales ti pagtaengan dagiti ikan isu a rebbengna a maaywanan tapno agtultuloy ti panagadu dagiti ikan iti pagilian.

(Naipablaak iti Bannawag, Enero 4, 2016 a bilang.)

Danum ken koriente, usaren a nasayaat, kiniddaw ti CBCP

Tapno makatulong iti pananglaban iti panagbaliw ti klima (climate change), kiniddaw dagiti dadaulo ti Catholic Bishops Conference of the Philippines (CBCP) kadagiti parokia nga isardengda ti irresponsable a panagusar iti koriente ken danum.

Kinuna ni Lingayen Dagupan Archbishop Socrates Villegas, presidente ti CBCP, a dawatenda kadagiti obispo ken padi kadagiti parokiada nga isardengda koma dagiti aramid a mangpakaro iti nakaro la ngaruden a situasion, kas iti kaadda dagiti di met kasapulan a lugan, ti irresponsable a panagusar iti koriente ken panagsayang iti danum, nga uray no mausar kadagiti programa a pagbiagan no makadangran met iti aglawlaw, kas iti panagusar kadagiti produkto manipud iti kabakiran.

Ginutigot pay ni Villegas dagiti sientista ken teknolohista kadagiti institusion nga imatonan dagiti Katoliko nga ipangrunada koma iti panagsukisok ken panagpatan-ay iti ad-adda a panagusar kadagiti alternatibo a paggapuan ti enerhia.

(Naipablaak iti Bannawag, Enero 4, 2016 a bilang.)

ENERO 4, 2016

SARITA
4 Ti Paskua ni Gladys
    Rolando A. Seguro, Jr.
18 Saning-i iti Kannag
    Melchor B. Gasmen

NOBELA
8 Operation: Drop Venus (47)
     Norberto D. Bumanglag, Jr.
12 Siak ni Precious (45)
     Juan Al. Asuncion

DANIW
6 Baro a Kapitulo
    Mighty C. Rasing
47 Daniw a Para Ubbing
     Delfin P. Dumayas

SALAYSAY
14 Magun-odtayo Met ti Naragsak ken Nabunga a Baro a Tawen
     Rev. Fr. Melchor B. Palomares
24 Agnes M., Asuncion: Pagwadan a Babai a Mannalon
     Virginia A. Duldulao, Ph.D.
28 Itiempom ti Agmula iti Sandia
     Reynaldo E. Andres

KOMIKS
35 Kimar (6)
38 Gayang ni Lam-ang (116)
41 Miks & Tiks

KOLUM
 9 Okeyka, Apong
10 Saludsodem ken ni Apo Hues
17 Dear Doc
23 Haytek!
26 Padasem Daytoy, Kailian
30 Tips
31 Ading Kosinera
33 Kastoy, Kapid, Ditoy Hawaii

PAGLINGLINGAYAN
44 Showbiz
47 Agkatawa ti Mayat
48 Sinniriban
48 Sapukas
48 Sudoku

DADDUMA PAY
 2 Ti Makunami
 3 Tao, Lugar, Pasamak
13 Netizone
16 Biag ni Ilokano: Saan a Maaw-awan ti Arak
20 Idi Un-unana a Panawen
21 Siled ti Kararag
22 Ammom ti Agtaraken iti Billit?
32 Ammuem Pay Dagitoy
34 Ammom ti Agsursir?
43Ti Gasatmo Ita a Lawas
46 Dagiti Pabula ni Aesop

Parada Dagiti Parol

PARADA DAGITI PAROL. Adu nga ubbing manipud kadagiti nadumaduma a pagadalan iti Siudad ti Laoag ken binayabay dagiti nagannak ken mangisursuro kadakuada ti nangpasangbay iti Paskua babaen ti naangay a Lantern Parade iti puseg ti siudad. Tapno ad-adda pay nga agbalin a naidumduma ti parada, nagaramat dagitoy nga ubbing iti indigenous ken recycled Christmas decor costume, lantern met ti dadduma ken sabsabali pay a creative materials a mangipakita iti kinangayed daytoy a selebrasion. Iti Aurora Park a nakaangayan ti programa, adda met naipaay a gunggona (sertipiko ken kuarta), babaen ti gobierno ti siudad, kadagiti kapipintasan a costume. (Rinetrato ni Leilanie G. Adriano)


(Naipablaak iti Bannawag, Disiembre 28, 2015 a bilang.)

Pondo para iti 4Ps, OK iti House panel

Inaprobaran ti House Committee on Appropriations itay lawasna ti probision iti pannakapondo ti gakat nga agpanggep a mamagbalin a permanente iti “Pantawid Pamilyang Pilipino Program” (4Ps) wenno iti conditional cash transfer (CCT) program.

Maam-ammonto a kas 4Ps Act (Linteg iti 4Ps), panggep ti gakat nga ipaayan ti tunggal kualipikado a benepisiario iti conditional cash transfer nga agdagup iti P500 iti binulan wenno P6,000 iti makatawen.

Maipaayan pay dagiti agad-adal nga annak ti benepisiario (di ad-adu ngem tallo nga annak) iti conditional cash grant para kadagiti magastosda iti panagadalna, kas sagudayen ti gakat.

Ipaayan ti gakat ti tunggal ubing nga agbasbasa iti elementaria wenno iti hayskul iti P300 iti binulan no la ketdi ta nairuarna amin nga asignaturana kalpasan ti maikadua a tawen a panagbalinna a benepisiario daytoy a programa.

Kinuna ni Marikina Rep. Marcelino Teodoro, maysa kadagiti autor ti gakat, a sipud narugian ti CCT program idi 2008, addan nakita a simmayaatan ti kasasaad dagiti benepisiario.

“Ti naited a cash grants, ninayonanna ti mapastrek dagiti nakurapay a pamilia, nga inggatangda met kadagiti kasapulanda, a nangpasayaat met iti negosio dagiti babassit a negosiante. Malaksid iti daytoy, pinasayaatna ti kasasaad ti salun-at ken panagbasa dagiti ubbing a pinaraburan ti 4Ps,” kinuna ni Teodoro.

(Naipablaak iti Bannawag, Disiembre 28, 2015 a bilang.)

Pasiente iti hypertension ken diabetes, libre ti agasda iti 2016, kuna ti DOH

Impakaammo ti Department of Health (DOH) a mangrugi iti daytoy Enero 2016, makaalan dagiti addaan iti hypertension ken diabetes iti libre nga agas a para maintenance manipud kadagiti regional rural health units (RHUs) ti DOH.

Kuna ni DOH Secretary Janette L. Garin a maala dagiti nasao nga agas apaman a makapagrehistro dagiti pasiente iti DOH Hypertension and Diabetes Club kadagiti RHUs dagiti Regional Offices a makasakup kadakuada.

Tapno agbalin a kameng ti DOH Hypertension and Diabetes Club, masapul nga agpakonsulta ti pasiente iti kaasitgan a health center wenno pasilidad a para iti primary health care tapno maiwayat ti assessment, screening ken pannakaiwardas.

Makaawat dagiti pasiente iti agas manipud iti DOH a kas iti Losartan, Amlodipine, Metroprolol para iti hypertension, ken Metformin para iti diabetes.

(Naipablaak iti Bannawag, Disiembre 28, 2015 a bilang.)