Dagiti Kinaimbag nga Inyeg ti Martial Law

DAGITI KINAIMBAG NGA INYEG TI MARTIAL LAW. “Adu dagiti napipintas a napaspasamak bayat ti Martial Law ngem naigagara a saan a naipakpakaammo iti publiko tapno agtalinaed a nalaad ti langa daydi a panawen ken tapno agtalinaed dagiti simmupsupiat a tangtangaden ti sangalubongan ken dagiti sumarsaruno a kaputotan.” Daytoy a pakaammo manipud iti Marcos for Peace Movement babaen iti pangulo daytoy a ni Ric Agnes ti nangiruangan iti pannakaangay ti maysa a symposium a nangipalgakan dagiti kameng ti MPM kadagiti napipintas nga inar-aramid ti gobierno idi panawen ni Presidente Ferdinand E. Marcos. Naangay ti symposium iti Kapalama Elementary School iti Honolulu idi Septiembre 20, 2015 (oras iti Hawaii). Makita iti ladawan dagiti nangbuangay iti MPM (agpakanawan): Felix dela Cruz, Nenita Jose, Cristina Malate, Luz Tapaoan, Felicidad Gamezon, Catalina Cachola, Marcela Selga, Gloria Cabarrubias ken Roberta delos Reyes. Nakatakder: Dante Jose, Florencio Dagupion, Lina Dagupion, Pacita Saludes, Gil dela Vega, Gladys Menor, Romeo Garcia, Jun Pagtulingan, Lydia Manuel, Benjamin Ranada, Emmy Damo, John Cabarrubias, Eddie Bueno, Berting delos Reyes ken Ruben Cardenas. Awan iti ladawan da Ric Agnes (Chairperson ti MPM), Trini Sanga, Joe Quibuyen, Arlene Pacleb Cabatu, Homer Bustos, Cely Quibar, Pat Ucol, Steve Ribao, Efren Reyes ken Joy Malabed.


(Naipablaak iti Bannawag, Oktubre 5, 2015 a bilang.)

No ditay agtimek, saan a lumung-aw ti kinapudno--MPM

“No ditay agtimek, saanto a lumung-aw ti kinapudno,” kinuna ti Chairman ti Marcos for Peace Movement (PMP) a ni Ric Agnes ti Honolulu, Hawaii.

Gapu iti daytoy, inangay ti PMP ti maysa a symposium mainaig kadagiti kunada a pagimbagan nga indateng ti Martial Law iti Filipinas wenno ti gobierno ni Presidente Ferdinand E. Marcos.

Naangay ti symposium iti Kapalama Elementary School iti Honolulu idi Septiembre 20 a nakadakamatan saan a maag-agapad tunggal maipalagip ti aldaw a pannakayetnag ti Martial Law, ta kas kuna ni Agnes, dagiti laeng maag-agapad, isu ti nalaad ti langa ti Martial Law.

Kinuna ni Agnes a no awan agtimek, saan a maammuan ti agdama a henerasion ti kinapudno no apay a nayetnag ti Martial Law, kas koma iti pannakatiped ti panagraira ti kumunismo.

No saan a nasigudan ni Marcos nga inatipa ti tignay dagiti makakanigid, mabalin a nailinia ti Filipinas iti Vietnam a dinupir ti kumunismo a no nagbanag a kasta, mabalin a napasamak ti gerra sibil a nakaibuisan met ti adu a biag dagiti agsumbangir a puersa a kas iti ken iti napasamak iti Vietnam.

Nangted met iti testimoniada dagiti dadduma a kameng ti PMP a nangipalgakanda kadagiti nasayaat a naaramidan ti Martial Law.

Iti symposium, naiparang met dagiti rally ken demonstrasion a nakatayan ti adu a mannalon idi panawen ni Presidente Aquino iti panangirupirda iti pannakipagtagikuada iti taltalonenda a daga iti Hacienda Luisita a kukua dagiti Aquino.

Naiparang met dagiti pagkamtudan ti nalukay unay a kita ti gobierno a kas iti Hawaii. Maysa nga ehemplo ti Rail Transit iti Honolulu nga idi pay 1963 a nainaw ngem agingga ita, di pay nalnalpas gapu iti adu a rason.


(Naipablaak iti Bannawag, Oktubre 5, 2015 a bilang.)

Generic drug, gatangenyo iti akreditado a botika--DoH

Ibalbalakad ti Department of Health (DoH) iti publiko a kadagiti laeng koma akreditado a botika ti gumatanganda iti generic nga agas.

Segun iti DoH, dagiti generic drug ket kas met laeng kadagiti branded nga agas ti bilegda ken epektiboda met laeng ngem nalaklaka ketdi dagitoy.

Ngem tapno masigurado ti kalidad, bileg ken kinatalgedda, kuna ti DoH a gumatang laeng kadagiti botika nga akreditado wenno rehistrado iti Food and Drug Administration.

Iti babaen ti Republic Act No. 6675, wenno Generics Act of 1988, napalubosan dagiti doktor nga agireseta kadagiti generic nga agas a kas pagpilian dagiti kayatna ti makagatang iti nalaklaka nga agas.

(Naipablaak iti Bannawag, Oktubre 5, 2015 a bilang.)

GUMIL UNP, na-reaccredit

Inawat ti Gunglo dagiti Mannurat nga Ilokano iti University of Northern Philippines (GUMIL UNP), Vigan City nga idauluan ni Wendelyn Castañeda, ti Certificate to Operate iti pannakaited ti reaccreditation dagiti accredited organizations ti pagadalan idi Sept. 1, 2015 babaen ken ni Dr. Mario P. Obrero, Vice President for Student and External Affairs ti nasao a pagadalan.

Nareorganisar ti GUMIL UNP idi Marso 12, 2015 iti salinong ti Center for Ilokano Studies nga indauluan ni Dr. Remigio L. Obrero, direktor ti nasao a sentro, babaen ti pannakitinnulong ti GUMIL Ilocos Sur.

Nabuangay ti GUMIL UNP idi 1976. Idi 1979-1982, nairaman ti GUMIL UNP kadagiti accredited student organizations babaen ti liderato ni Danilo Bautista a maysa met itan a kameng ti Board of Directors ti GUMIL Filipinas. (Alma Campos-Somera)

(Naipablaak iti Bannawag, Oktubre 5, 2015 a bilang.)

OKTUBRE 5, 2015

SARITA
4 Angkel Andro
   Estela A. Bisquera-Guerrero
   
NOBELA
12 Operation: Drop Venus (33)
     Norberto D. Bumanglag, Jr.
16 Siak ni Precious (30)
     Juan Al. Asuncion

DANIW
9 Tallo a Daniw
    Ria Rebolledo
47 Dandaniw a Para Ubbing
    Ronelyn B. Ramones/ Jobert M. Pacnis

SALAYSAY
10 Panagiipon Manen!
      Gloria Lorenzana Agas
20 Apay a Nalatak ti AlDub?
     Neyo Mario E. Valdez
24 Adda Met Marag Underground River
     Rolando A. Seguro, Jr.
40 Agmulaka Man Met iti Daytoy Kasasam-itanen a Salamagi
    Reynaldo E. Andres

KOMIKS
27 Gayang ni Lam-ang (104)
30 Aritosan (155)
32 Miks & Tiks

KOLUM
14 Saludsodem ken ni Apo Hues
15 Dear Doc
22 TIPS
23 Okeyka, Apong
35 Kastoy, Kapid, Ditoy Hawaii
36 Ading Kosinera
42 Padasem Daytoy, Kailian

PAGLINGLINGAYAN
44 Showbiz
48 Sinniriban
48 Sapukas
48 Sudoku
48 Agkatawa ti Mayat

DADDUMA PAY
 2 Ti Makunami
 4 Tao, Lugar, Pasamak
17 Txtm8
18 Siled ti Kararag
19 Ay, Uleg!
34 Ammuem Pay Dagitoy
37 Panangdalus iti Inodoro
38 No Apay a Nasken a Mabalbaliwan ti Sistema ti Edukasion
39 Ti Gasatmo Ita a Lawas
46 Idi Un-unana a Panawen

Makoy Dinengdeng Cook-Off

MAKOY DINENGDENG COOK-OFF. Saan a kompleto ti maidasar iti lamisaan dagiti Ilokano no awan dinengdengna. Idi sibibiag pay daydi Apo Lakay, (nasinged nga awagda ken ni Presidente Ferdinand E. Marcos), daytoy ti pagaayatna a sidaen. Alisto la ngaruden nga isagana, nasustansia pay. Isu nalabit a nakidser latta dagiti Ilokano ta nateng ti paggugustoda. Itay Septiembre 11 a pannakalagip ti panagkasangay ni Apo Lakay, naangay manen ti “Makoy Dinengdeng Cook-off” a nangyalatan dagiti taga-Batac iti umuna a gunggona. (Leilanie G. Adriano)


(Naipablaak iti Bannawag, Septiembre 28, 2015 a bilang.)

Di umno a panagtomar iti antibiotics, delikado

Ad-adu ti dakes nga ibungana iti bagi ngem ti nasayaat ken delikado ti panagtomar iti agas nga antibiotic no saan nga umno ti panagtomar iti daytoy.

Daytoy ti ibalballaag ti Department of Health (DoH). Kas kuna ni Lyndon Lee Suy, pannakangiwat ti nasao a departamento, a ti di umno a panagtomar iti antibiotiko, agbunga iti antimicrobial resistance (AMR) ket saanton a kumna ti ania man nga agas iti asino man a nagusar iti di umno nga antibiotiko.

No kastoy ti mapasamak, kunana nga ad-adda a kumaro ti sakit ket nabibiit la ngarud ti ipapatay.

Tapno maliklikan daytoy, ginutigot ti nasao a departamento a masapul nga agpakonsulta nga umuna iti eksperto ti asino man a pasiente sakbay nga agtomar iti agas.

Imballaag ti DoH daytoy gapu iti umad-adu a kaso ti AMR disease iti sangalubongan.

Iti napalabas a tawen, indeklara ti World Health Organization (WHO) a ti AMR ti maysa kadagiti kangrunaan a pangta iti salun-at dagiti umili.


(Naipablaak iti Bannawag, Septiembre 28, 2015 a bilang.)